Oŋai olja ızdep, opyq jep qalmaŋyz!

«30 qyrküiekte oilamaǧan jerden tabys tabuǧa arnap balauyz jaǧuǧa bolady. Astana uaqytymen saǧat 16:30-da oŋtüstıkke qarap jasyl maişam jaǧasyz. Basqasy bolmaidy jäne doŋyz jylyndaǧylarǧa arnalmaǧan. Bärıŋızge sättılık.» Būl – özın instagram jelısınde qazaq numerologiiasynyŋ ekspertı, käsıpker, telejürgızuşı retınde jeke blogyn jürgızıp jürgen Ainūr Asanberdınıŋ jazbasy.

Äp-sätte 2500 adamnan qoldau tauyp, jasyl balauyz ızdegen halyqtyŋ sany 300-den asyp kettı. Olarǧa da keregı osy. «Asanberdı komandasy» heştegımen jürgen jelılık biznestegı qyzdar är qaladaǧy dükenderınıŋ mekenjaiy men nömırın qaldyryp, bala­uyz­dyŋ saudasyna kırıstı de kettı.
Ärine, numerologiia ǧy­lymyn joqqa şyǧara almaimyz. Matematikanyŋ naqty formulasy Qūrannan bastau alǧany belgılı. Endeşe bar ǧylymnyŋ bastauy Qūran men Qūdai ekenın bılıp ösken ūrpaqtyŋ bailyq tılep sūraityn bar medetı balauyz bolǧany ma?! «Auruhananyŋ palatasynda otyryp jaqsam bola ma?», «Menıŋ jylym doŋyz edı, küieuıme jaqtyrsam bola ma?», «Aq balauyz bolmai ma?», «Aiaǧym auyr edı, jaqsam bola ma?», taǧy sol siiaqty türlı saualdaryn qarşa boratqan halyqtyŋ pıkırıne qarap bügıngı qoǧamnyŋ hal-ahualyn baǧamdauǧa bolady. Aŋqau­lyq. Aqşaǧa mūqtajdyq. Eldıŋ oŋai oljaǧa kenele salam dep senuı… Taŋǧaldyrmai ma? Qalai bolǧanda da Ainūr Asanberdınıŋ özınen sūraǧandy jön körıp, tömendegı sūraqtaryzdy qoiǧan edık.
«Soŋǧy jazbaŋyz «Feisbuk» oqyrmandary tarapynan synǧa ūşyrady. Nege köbıne bılımı bar, sauatty azamattar qarsy şyqty dep oilaisyz?
Jarnama – tabys qūraly. Özıŋızdıŋ dükenıŋızde satatyn tauarlardy būlaişa jarnamalap ötkızu aqşaǧa şyn mūqtaj jandardy adastyru dep oilamaisyz ba?».
Ökınışke qarai, Ainūr hanym mūndai ūsaq-tü­iek­ke qoly timeitının, būr­malanǧan sūraqtarǧa jauap bermeitının ärı gazet oqymaitynyn aşyq bıldırdı. Kelıstık. Esesıne jasyl balauyz arqyly şaş etekten paidaǧa kenelıp jatqan halyqtyŋ sanynda şek joq ekenın bıldık. Ailyǧyn ala almaǧandar, qaryzdanǧandar, jūmys tappai jürgender, saudasy joqtar, eŋbekaqysyna qol jetpei jürgenderdıŋ bärı tura ertegıdegıdei balauyz jaqqannan keiın paidaǧa kenelıptı-mıs. Özderınıŋ aituynşa, aktivasiiaǧa jasyl balauyz qoldanylatynyn Ainūr hanym men onyŋ komandasyna fenşui mamany Natalia Pravdina aitqan bolyp şyqty. Sondyqtan būlar eşqandai ter tökpei-aq, ǧaiyptan oljaǧa keneludıŋ joldaryn barynşa qorǧap älek.
Jalpy, soŋǧy kezderı «aqyl satqyştardyŋ» mekenıne ainalǧan instagram jelısınde saiahattau, türlı kokteilder, jüz auruǧa em bolatyn nebır kompaniialardyŋ önımderı qaptap kettı. Onyŋ basynda ekranǧa jylt etıp tanymal bola qalǧan jürgızuşıler, trening ötkızgışter, aqyl aitqyştar, motivatorlar, psihologtar jür. Terıs pıkır aita qalsaŋ, «biznesımdı qyzǧanyp otyr» dep attandap şyǧady. Būl jelılık marketingter eşqandai da biznes emes. Öz tauaryn ötkızu üşın jürgızetın marketingtık ädıs qana. Bır qyzyǧy, milliard halqy bar Qytaida mūndailardyŋ sany tıptı jiyrmaǧa da jetpeidı eken. Al bızde jelılık marketingpen ainalysu qyzmetın retteitın zaŋ bolmaǧandyqtan, «aŋqau elge aramza moldalardyŋ» däurenı jürıp tūr. «Olardyŋ seminaryna 40-50 myŋ tölep baryp jürgen äielderdıŋ aqyldy bop ketkenın körmedım. Odan da sol aqşaǧa aǧaiyn-tuysyŋdy şaqyryp, dastarqanyŋa qūran oqyt. Qūdaidyŋ bererı de sol kezde köbe­ier» deidı Aigül Mahanova esımdı oqyrmanymyz. Al ärıptesımız Tılekgül Esdäulettıŋ aituynşa, tegın olja, bailyqqa oŋai jete salu sekıldı jalaŋ ūrandar jastardy psihologiialyq daǧdarysqa ūryndyrady. «Eldıŋ bärı äp-sätte Qūralai hanym, Ainūr Asanberdı, Janar Baisemızova bola salǧysy keledı. Tegın olja, bailyqqa josparly türde oŋai jete salamyn degen arzan senım jastardy psihologiialyq daǧdarysqa ūryndyryp jatyr. Aitpaqşy, Qūralai hanym meşıtte de leksiia ötkızıp jür, islamǧa «tompaq» jerlerı joq pe eken?» dep Qazaqstan mūsylmandary dıni basqarmasyna sūrau salady.
Balauyz jyryna qai­ta oiyssaq. Ainūr Asan­berdınıŋ jazbasyn tany­mal zaŋger Abzal Qūspan myrzaǧa joldap, alaiaq­tyqtyŋ bar-joǧyn sūraǧymyz keldı.
«Kez kelgen qylmystyŋ jäbırlenuşısı bolady. Eger jasyl balauyzdy satyp alyp, oŋtüstıkke qarai baǧyttap, aqşasyn taba almai qalǧandar bolsa «Men aitylǧan talaptardyŋ bärın oryndadym, satyp aldym, alaida eşqandai da bailyqqa kenelmedım» dep aryzdanu kerek. Bır qaraǧanda, külkılı jaǧdai bolyp körınuı mümkın. Bıraq zaŋ sondai. Mındettı türde dälel-dä­iek boluy tiıs. Jäne ol adamdardyŋ sany neǧūrlym köp bolsa, onda alaiaq­tyŋ belgılerı şyǧady. Bärımız mūndai taŋǧaja­iypqa senetın jastan da, jaǧdaidan da kettık. Sondyqtan ärkım öz äreketıne jauap beruı tiıs. Eger BAQ betterınde jariialansa, aryz jazylmasa da, ışkı ıster oryndary qarau kerek. Zaŋger retınde pıkırım, alaiaqtyŋ naqty belgılerı bar» deidı zaŋger.
Äleumettık zertteuler jelılık biznestıŋ körkın öte ısker, köpşılıkpen tıl tabysqyş, aqyldy jandar qyzdyratynyn aitady. Şariǧat tūrǧysynan da, ekonomikalyq tūrǧydan da qoǧamǧa ziiany joq emes. Bılgenımız, būl jüienıŋ ışınde ūlttyq ädebietke, mädenietke, ideologiiaǧa eşqandai oryn joq. Künı keşe «Qazaqstan» ūlttyq arnasynyŋ «Apta» baǧdarlamasynda da däl osy mäsele köterıldı. Bızdıŋ de maqsatymyz bıreudıŋ paida tabar käsıbıne qol sūǧyp, qaralau emes. Kerısınşe, halyqtyŋ adasuyna jol bermeu. Bız üşın bır adamnyŋ bolsa da ǧajaiyp jarnamalarǧa aldanbai, erterek es jiǧany – ülken olja.

Gülmira HALİLA,
qytai tılınıŋ mamany:
– Keide qazaq äielderınıŋ jan düniesı jan-jaqtan ılım äkep qūia beretın quys keude bolyp körınedı. Allany qosady, fenşui, izoterika, numerologiia, NL, endı bai szi degen ılım tarauda. Şynyn aitqanda, botqa bolyp kettı. Ondai botqany ışken adam bır künı jüregı ainyp qūspai ma?!

Aigül BOLATHANQYZY,
jurnalist:
– «Tolǧan närse tübı bır tögılmei qoimaidy, şırene tartqan jıp tübı bır üzıledı» degendı jiı aitady menıŋ apam. Äielderdıŋ köş keruenı de, sol jelılık marketing te şegıne jetken kezde tyiylady bır künı. Soǧan senemın.