Elımızdıŋ bas sanitarlyq därıgerı Jandarbek Bekşin jaŋa epidemiologiialyq mausymda qazaqstandyqtarǧa tūmaudyŋ üş türı (A(H1N1) – «Michigan»; A (H3N2) – «Singapur»; V ştammy) qauıp töndıretının habarlaǧan bolatyn. Därıgerlerdıŋ boljauynşa, tūmau jūqtyrudyŋ alǧaşqy oqiǧalary qazan aiynyŋ soŋy men qaraşa aiynda tırkeledı. Al tūmau qysqy kanikuldan keiıngı kezeŋde, şamamen 2019 jyldyŋ qaŋtar aiynda beleŋ aluy mümkın. Osyǧan orai, elımızde 5 myŋǧa juyq nauqas emdeletın oryndar daiyndalǧan. Sondai-aq tūmau men özge de jūqpaly infeksiialardyŋ jappai taraluy bolǧan jaǧdaida nauqastardy qabyldaityn ūiymdar da anyqtalypty.
Jandarbek Bekşin Astana men Qostanai oblysynda tūmauǧa qarsy egetın därı-därmek pen vaksinanyŋ tapşylyǧy baryn jasyrmai aitty. «Vaksina satyp aluǧa bız baiqau ötkızdık. Astanada osy mäselenı şeştık. Özımızde būryn 30 myŋ doza bar edı, taǧy 50 myŋ doza vaksina satyp aldyq» dedı ol. Būǧan qosa, elımız boiynşa nauqastarǧa kömektesetın tūmauǧa qarsy egıletın 50 myŋ qorap «Tamifliu» jäne 10 myŋ qorap «Relenza» preparattarynyŋ qory jinalǧan. Demek, astanalyqtarǧa alaŋdauǧa negız joq.
Bas sanitarlyq därıger J.Bekşin düiım jūrtty eleŋdetken tūmauǧa qatysty bırer saualdarǧa jauap berdı. Onyŋ aituynşa, tūmauǧa qarsy egıletın vaksina qauıpsız. «Köptegen elderde nauqasty köşede, metroda egedı. Būryn bız vaksinany inemen egetın edık, al qazır jeke ine-dozamen salamyz. Is jüzınde vaksinalaudan eşqandai qauıp joq» dedı ol. Sonymen qatar biyl tūmauǧa qarsy egılgenderdıŋ sany artqan körınedı. Mäselen, 2016 jyly 250 adam bas tartsa, 2018 jyldyŋ 8 aiynda 2220 adam özınıŋ pıkırın özgertıp, vaksinany ekkızgen. Atap aitarlyǧy, epidemiologiialyq mausymǧa daiyndyq aldynda elımızdegı barlyq emhanalar jūmys künderın 20.00-ge deiın ūzartady. Al demalys künderı kezekşı därıgerler nauqastardy qabyldaidy.
