Däl bügın «Astana aqşamy» men «Vecherniaia Astana» respublikalyq qoǧamdyq-saiasi gazetterınıŋ jaryqqa şyqqanyna otyz jyl toldy. İä, otyz jyl… Tarih közımen qaraǧanda būl degen qas-qaǧym uaqyt sekıldı bolǧanymen, qos basylymnyŋ täi-täi basqan qadamy, qalyptasu joly, aqyry, astanalyq basylymǧa ainalyp, jalpaq elge taraluy – taǧylymǧa toly oqiǧa dep aituǧa bolady. Osy mereilı dataǧa orai qos gazet ūjymy dästürge sai otyz aǧaş otyrǧyzdy.
Aituly şaraǧa Nūr-Sūltan qalasy äkımınıŋ orynbasary Baqtiiar Mäken qatysyp, basylym qyzmetkerlerın mereitoilarymen qūttyqtady.
– Bas qaladaǧy «Elorda Aqparat» mediakompaniiasynyŋ qūramyndaǧy «Astana aqşamy» jäne «Vecherniaia Astana» gazetterınıŋ tarihy sonau egemendık jyldarymen tūspa-tūs keledı. Soǧan orai bügın 30 aǧaş otyrǧyzdyq. Qos basylym qalamyzda bolyp jatqan aişyqty oqiǧalar men ıs-şaralardy der kezınde jazyp otyrady. Gazet qyzmetkerlerın otyz jyldyq belespen qūttyqtap, aqparat maidanynda talmai qyzmet etulerıne tılektespın!, – dedı Baqtiiar Mäken.
Qala äkımınıŋ orynbasary söz arasynda aǧaş egu sekıldı igılıktı ıs-şara Elbasy Nūrsūltan Nazarbaev pen Prezident Qasym-Jomart Toqaevtyŋ tapsyrmasymen astanada dästürlı türde jürgızılıp jatqanyn airyqşa atap öttı.
