Taiauda «Qazaq elı» monumentınıŋ aldynda elordanyŋ 20 jyldyq mereitoiyna arnalǧan «Open Air» konsertı öttı. «Ūly dala bırlıgı» dep atalatyn konsertte otandyq önerpazdarǧa qosa Resei ärtısterı de öner körsettı.
Künı keşe Parlament Senatynyŋ töraǧasy Qasym-Jomart Toqaev myrza özınıŋ äleumettık paraqşasynda «Elordamyzdyŋ 20 jyldyǧyna arnalǧan ıs-şaralarǧa şetel ärtısterınen görı, otandyq oryndauşylardy köbırek qatystyru kerek» degen pıkır bıldırdı.
Jalpy, elımızdegı mädeni şaralarǧa otandyq ärtısterge qaraǧanda Resei änşılerınıŋ köp şaqyrylu sebebı nede degen saualǧa jauap ızdep, äleumettık jelılerde köptegen tyŋdarman türlı pıkır bıldırdı. 50 myŋnan astam körermen jinalǧan aşyq aspan astynda ötken konsert 6 saǧatqa sozyldy. Astana qalasy Mädeniet jäne sport basqarmasynyŋ töraǧasy Bolat Majaǧūlov aitqandai, jinalǧandardyŋ basym köpşılıgı Resei änşılerıne qūmartyp kelgen joq eken, «Ninety one» tobyn tyŋdau üşın kelgen. Bıraq «91» toby konserttıŋ aiaǧynda öner körsettı. Sonda qazaq änşılerın tyŋdauǧa kelgen halyqty 5 saǧat Resei änşılerın tyŋdauǧa nege mäjbürlep otyrmyz?
«Ūly dala bırlıgı», qarapaiym tılmen aitqanda, tatulyqtyŋ belgısı. Osylai atalatyn ıs-şarada nege tek Resei jūldyzdary öner körsetuı kerek? Basqa bauyrlas, körşı memleketter ökılderı qaida qaldy? Osy oraida Mädi Manatbek, Qalqaman Sarin, Maqpal Jūmabai, Bauyrjan Qaraǧyz sekıldı azamattar bastaǧan bır top belsendı äleumettık jelı arqyly «Resei änşılerın toqtausyz şaqyra beremız be?» degen mazmūnda saual tastaǧan bolatyn. Tatulyqtyŋ belgısı retınde ūiymdastyrylǧan ıs-şaraǧa şet elderden öner jūldyzdaryn şaqyru qajet bolsa, nege Özbekstan, Qyrǧyzstan, Qytai syndy körşıles elderden de ärtıster şaqyrylmaidy?
Astana tūrǧyny retınde men de elımızdıŋ şaralaryna otandyq jūldyzdar köptep öner körsetuı kerek dep esepteimın. Al Astananyŋ konsertterıne öz önerpazdarymyz qatysatyn bolsa, olarǧa tölenetın aqşa öz elımızde qalady. Ol memleket qarjysyn da syrtqa şaşpai, özımızdıŋ öner jūldyzdarymyzdy kötermeleuge sep bolar edı dep oilaimyn.
Astana sahnalarynan kımdı körgıŋız keledı?
Janbota QARAQŪLOVA, student:
– Şeteldık änşılerdı meiram saiyn emes, tek elordanyŋ aituly künderı şaqyrǧan dūrys dep oilaimyn. Bızge köbıne reseilık änşıler keletını jasyryn emes. Eger jastardyŋ pıkırıne qūlaq asatyn bolsa, aldaǧy Astana toiynda reseidıŋ şou-biznesınde jürgen özımızdıŋ qazaqtar Jah Khalib pen Motty körgımız keledı.
Äsem BATYRBEK, student:
– Biyl – elordanyŋ mereilı 20 jyldyǧy. Osynau merekede köptegen ıs-şara ötkızıletını belgılı. Qala künı meiramynda Qazaq elın älemge tanytyp jürgen Dimaş Qūdaibergenovtıŋ önerın tamaşalaǧym keledı.
Şynar MŪRATQYZY,
student:
– Jaz mausymyn «Open Air» merekelık ıs-şarasymen aşu jyldaǧy dästürge ainalyp keledı. Alaida ünemı baiaǧy kelıp jürgen Resei änşılerın şaqyrtady. Biyl özgeşe bolsa deimın. Iаǧni älemdık deŋgeidegı Adel, Beyonce, Rihanna sekıldı öner jūldyzdarynyŋ kelgenın qalaimyn. Sonymen qatar, tek jastarǧa ǧana köŋıl bölmei, qazaq estradasynyŋ Altynbek Qorazbaev, Roza Rymbaeva, Ramazan Stamǧaziev sekıldı aǧa buyndaryn da köpşılık jyly qabyldaityny sözsız.
Erkınbek ZERLEN, student:
– Astananyŋ 20 jyldyq mereitoiynda özımızdıŋ estrada jūldyzdaryn köbırek körgım keledı. Şeteldık änşıler bolsa da qarsy emespın. Özımızdıŋ Janar Doǧalova, Säken Maiǧaziev, Qairat Nūrtas, Nūrbolat Abdullin, Töreǧali Töreälı syndy jas talantty änşılerdıŋ köp bolǧanyn qalaimyn.
Azamat MAHAMBET, student:
– Şetel jūldyzdaryn şaqyru kerek emes. Elordamyzdyŋ meiramy bolǧandyqtan, Astanada tūratyn, Astananyŋ qūrylu barysynda bolǧan, Astana turaly änı bar, Astanamen qūrdas, jüregı Astana dep soqqan änşılerımızdıŋ önerın tamaşalaǧym keledı. Öz elımızde bız tanymaityn talanttar köp qoi. Eŋ bastysy, jany qazaq bolǧan öz otandastarymdy körgım keledı.
Jadyra ŞYNARBEK, L.Gumilev atyndaǧy
Euraziia ūlttyq universitetınıŋ studentı
