Elordadaǧy Ūlttyq akademiialyq kıtaphanada rämıztanuşy, aqyn, Qazaqstannyŋ eŋbek sıŋırgen qairatkerı Erbol Şäimerdenūlynyŋ 70 jyldyǧyna arnalǧan ǧylymi-tanymdyq konferensiia öttı. «Ǧasyrlar qoltaŋbasy nemese rämızdık tanymnyŋ baspaldaqtary!» taqyrybyndaǧy ıs-şara aiasynda «Mäŋgılık mūra»: Eltanym..» atty kıtap körmesı de ūiymdastyryldy. 4 mausym – Memlekettık rämızder künıne orai eske alu jiynynyŋ ötuıne Mädeniet jäne aqparat ministrlıgınıŋ Arhiv, qūjattama jäne kıtap ısı komitetı mūryndyq boldy.
Konferensiiaǧa qatysqan qazaq ädebietınıŋ tanymal tūlǧalary, Parlament deputattary, mädeniet jäne qoǧam qairatkerlerı, belgılı ǧalymdar men jalpy ziialy qauym ökılderı qazaq elınıŋ tūŋǧyş rämıztanuşysy jäne Prezidenttıŋ tūŋǧyş baspasöz hatşysy Erbol Şäimerdenūlynyŋ mädeniet, tıl jäne geraldika salasyna sıŋırgen eŋbekterın baiandap, jalpy azamattyq, adami qasietterı turaly közkörgender men bırge qyzmettes bolǧan zamandastary jyly estelıkterımen bölıstı. Jiyn barysynda rämıztanuşy turaly tüsırılgen «Erbol Şäimerdenūly: Tūlǧa» derektı filmı köpşılık nazaryna ūsynyldy.
– Prezidenttıŋ tūŋǧyş baspasöz hatşysy bola jürıp, memleketımızde älı ıske aspaǧan tūŋǧyş rämızderdıŋ jüzege asuyna Erboldyŋ sıŋırgen eŋbegı ūşan-teŋız. Onyŋ syrtynda Tıl komitetınıŋ töraǧasy bola jürıp, talai san qily maqalalar jazdy. Erekeŋ jaiynda Ä.Nūrpeiısovten bastap, Ä.Kekılbaev, Ä.Tarazi, Q.Sūltanov syndy elımızdıŋ ziialy qauym ökılderınıŋ bärı jyly sözder aitqan. Olardyŋ bärı kıtaptarda jazylǧan, saqtauly. Alpysqa jetpei-aq sonşama eŋbektıŋ bärın qalai jazǧanyna älı künge deiın taŋǧalamyz. Oǧan senım artqandar köp boldy, tıptı Äbdıjämıl aǧamyzdyŋ özı «Qan men ter» romanyn kezektı tüzetuden keiın oǧan alǧysöz jazudy jap-jas jıgıt Erbolǧa tapsyrǧan. Būl ataqty qalamgerdıŋ Erboldy tanyǧanyn, boiyndaǧy qabılettı, şyǧarmany taldaudaǧy şeberlıgı bar ekenın baiqaǧanyn bıldıredı, – dedı konferensiiany jürgızgen jazuşy Quanyş Jienbai.
Ädebiettanuşy-ǧalym, Qazaqstan Respublikasy Memlekettık syilyǧynyŋ laureaty Sauytbek Abdrahmanov Erbol Şäimerdenūlynyŋ qairatkerlık bastamalarynan mysaldar keltıre otyryp, şyǧarmaşylyq qyryna da toqtaldy, onyŋ maqalany äbden zerttep, barlyq faktını tızıp, tüzıp, qolyna jinap otyryp jazatyn naǧyz jurnalist bolǧanyn atap öttı. Eltaŋba avtory, belgılı säuletşı Jandarbek Mälıbekūly qazaq degen halyqta myŋdaǧan jyldar boiyna bolmaǧan memlekettık rämızderdı qalyptastyruda marqūmnyŋ eŋbegı zor bolǧanyn jetkızdı. Ol estelık retınde özı jasaǧan Eltaŋbanyŋ tös belgısın E.Şäimerdenūlynyŋ jary Küläş Qaiyrjanqyzyna tabys ettı.
– Erbol aǧa Şäimerdenūly san qyrly azamat, şyǧarmaşylyqqa adaldyǧyn saqtaǧan, özındık orny bar ülken qalamger boldy. Onyŋ jazǧandary ädebi ortada, publisistika salasynda, jalpy şyǧarmaşylyq älemınde jaqsy moiyndalǧan. Sonymen qatar ol qalamgerlıkten qairatkerlık biıkke köterıldı. Söitıp köp qalamgerdıŋ maŋdaiyna jazylmaityn abyroidy, märtebenı ūstap tūrdy jäne soǧan daq tüsırmei ömırden öttı. Sondai-aq ol ūltjandy azamat boldy, onyŋ barlyq eŋbekterı ūlt mäselesımen sabaqtasyp jatady, özı soltüstıktıŋ tumasy, jas kezınen ūltqa ne qajet ekenın, basqa ūlt arasynda özımızdıŋ märtebemız qalai boluy kerek ekenın sezınıp ösken, ūlttyq sanasy erte oianǧan azamat, – dedı Prezident keŋesşısı, publisist-ǧalym Bauyrjan Omarūly.
Jiynda qazaq ädebietınıŋ özge de qazırgı tanymal ökılderı, qoǧam qairatkerlerı, tıl janaşyrlary E.Şäimerdenūly turaly aitqanda onyŋ azamattyq, qalamgerlık, qairatkerlık qyrlaryn şynaiy oi-pıkır, qūndy estelıkterımen barynşa aşuǧa tyrysty. Biyl mamyr aiynda tırı bolǧanda 70 jasqa tolatyn qalamgerdıŋ ömırden ötkenıne 12 jyl bolsa da, jaqsynyŋ atyn öşırmeuge niet bıldırgen jandarǧa onyŋ jary men tuystary alǧys bıldırdı.
