Apta basynda Nūr-Sūltan qalasynyŋ äkımı Altai Kölgınovtı qabyldaǧan Qazaqstan Prezidentı Qasym-Jomart Toqaev astanany abattandyru jūmystaryna tyŋ serpın berudı tapsyrdy. Qala basşysy osy tapsyrmany oryndau maqsatynda şahardyŋ Saryarqa audanynyŋ «Biudjetke qatysu» qanatqaqty jobasynyŋ aiasynda abattandyrylǧan 10-nan asa aulany aralap şyqty.
Jalpy biyl elordada barlyǧy 110 aulany abattandyru mejelendı. Sonyŋ ışınde Saryarqa audanynda 40 aula körkeitıledı. Al «Biudjetke qatysu» jobasyna tūrǧyndar tarapynan 22 joba ūsynylyp, halyqtyq dauys beru qorytyndysy men audan äkımdıgı janynan qūrylǧan saraptamalyq keŋestıŋ şeşımımen olardyŋ 15-ı taŋdap alyndy.
Qala äkımı baryp körgen sondai jobalardyŋ bırı Respublika daŋǧyly, 74 mekenjaiy aulasyndaǧy «Balalar – bızdıŋ bolaşaǧymyz» atalatyn oiyn alaŋy. Atalmyş jobany erlı-zaiypty Evgenii jäne Svetlana Truhanovtar ūsyndy. Tūrǧyndardyŋ aituynşa, būdan būryn būl aulada jetkınşekter oinaityndai jaǧdai jasalmaǧan. Joba qabyldanǧannan keiın oǧan 6 mln teŋge bölınıp, tiıstı jūmystar bastalyp, qazır aiaqtaluǧa jaqyn qaldy.
Aulada balalarǧa arnalǧan qos mūnaraly keşen, kürkelı üişık, ärtürlı ätkenşekter, sporttyq trenajerler, özge de qūraldar ornatylady. Däl osyndai alaŋdar I.Esenberlin köşesı 15/1 jäne 11/1 mekenjailarynda da boi köteredı. Sol siiaqty Beibıtşılık köşesı 60, K.Kümısbekov köşesı 7/1 mekenjailarynda jaŋa oiyn alaŋdary salynady.
Būl jobalar «Qauıpsız balalar alaŋy», «Balalar baqyty», «Jas jäne zamanaui astananyŋ balalary», «Qaladaǧy jaily aulada tūrǧym keledı» ataularyn ielengen. Osy aulalardyŋ bärıne barǧan Altai Kölgınov tūrǧyndarmen söilestı. Balalardy äŋgımege tartyp, qandai aulada tūryp, oinaǧylary keletının sūrady. Astanalyqtardyŋ äleumettık jobalarǧa belsendı qatysuynyŋ maŋyzdylyǧyn atap öttı.
«Qalany körkeituge tūrǧyndardyŋ belsendı qatysuy quantady. Jalpy, qala boiynşa 1560 aula bar. Onyŋ 473-ıne jöndeu jūmystaryn jürgızu qajet. Sonyŋ denı – oŋ jaǧalauda. Josparǧa säikes jūmystar jürgızıledı» dedı Nūr-Sūltan äkımı.
Būǧan qosa, qala basşysy Beibıtşılık köşesı 62, Jeŋıs daŋǧyly 25 jäne Gete köşesı 10 mekenjailaryna bardy. Būl aulalarda futbol alaŋdary jäne şaǧyn säulet nysandary ornatylyp, trenajerler qoiylady. Bırjan sal köşesı, 2 üi aulasynda da tiıstı jūmystar jürgızıledı.
Jalpy biyl «Biudjetke qatysu» jobasy aiasynda №187 köşe 21, 23, 25, 27, D. Babataiūly köşesı 9, 9a, Saryarqa daŋǧyly 29 mekenjailaryndaǧy aulalar da abattandyrylady. «Köktal» syndy qalanyŋ şet aimaqtaryndaǧy tūrǧyn alaptar da abattandyrudan şet qalmaidy.
