Astanada tūrmystyq qaldyqtardy sūryptap tastau jobasy mausym aiynyŋ soŋynda jüzege asyryla bastaǧan bolatyn. Nätijesınde tūrǧyn üilerdıŋ aulalaryna sary jäne jasyl tüstı konteinerler ornatyluda.
Joba boiynşa sary konteinerge qaǧaz, plastik, äinek siiaqty qūrǧaq zattar tastalsa, jasyl konteinerge dymqyl tartatyn organikalyq qaldyqtar salynady. Qanatqaqty jobanyŋ nätijesınde qaita öŋdeu zauytynda tūrmystyq qaldyqtyŋ 45 paiyzyn paidaǧa jaratu közdelude. Al būǧan deiın qaldyqtyŋ tek 10 paiyzy ǧana öŋdeuge jaramdy bolyp kelgen.
Sary konteinerlerdegı qaldyqtardy «Clean City NC» JŞS kompaniiasyna tiesılı 25 Iveco markaly arnaiy jük kölıkterı «KazRecycleService» JŞS-ke tasymaldaidy. Onda qaldyqtar qosymşa sūryptalyp, şikızat daiyndalyp, odan otandyq käsıporyndar şelek, qar tazalauǧa arnalǧan kürek siiaqty tūrmystyq zattar jasap şyǧarady.
«ÖKM Operatory» JŞS mamandarynyŋ mälımetınşe, şılde aiynda elordadan 265,38 tonna qaldyq qala syrtyna şyǧarylypty. Onyŋ 45 paiyzy qaǧaz bolsa, 28 paiyzy – plastik, 17 paiyzy – äinek, 10 paiyzy jalpy qaldyq körınedı.
«Tūrǧyndardyŋ basym köpşılıgı qoqys jäşıgıne qaǧaz ben plastiktı köp tastaidy eken. Al qaldyqty sūryptap tastau jaǧynan äzırge Esıl audanynyŋ tūrǧyndary belsendılık tanytuda. Öitkenı būl joba eŋ alǧaş ret osy audanda jüzege asyrylyp, tūrǧyndarǧa tüsındıru jūmystary jiı jürgızılgen bolatyn. Jobany jüzege asyrudaǧy alǧaşqy aidyŋ nätijesı jaman emes. Astanalyqtar sūryptap tastauǧa qoldau bıldırıp jatyr. Degenmen būl turaly nasihat jūmystaryn älı de jalǧastyru kerek» deidı «ÖKM Operatory» JŞS mamandary.
Qazırgı taŋda Astanada 404 jaŋa konteiner ornatylǧan. Onyŋ 128-ı Esıl audanynyŋ enşısınde bolsa, Baiqoŋyr audanynda – 75, Saryarqa audanynda 201 konteiner qoiylǧan. Al Almaty audanyna mūndai konteinerler 7 tamyzdan bastap ornatylmaq. Jalpy, jyl soŋyna deiın qala boiynşa 6 myŋnan asa jaŋa konteiner qoiylatyn bolady. Osy baǧatqa 1,72 mlrd teŋge qarjy bölınıptı.
