Bırde aqtaŋger aqyn Ǧafu Qaiyrbekovtı el jaqtan bır ınısı ızdep keledı. Özı bıldei bır sovhozdyŋ dökei basşysy eken. Aqyn aǧamyz ınısın ertıp meiramhanaǧa barady. Sol jerge auyldan kelgen dämnen auyz tisın dep jaqyn syilasyp jürgen aǧa-ınılerın şaqyrady. Olardyŋ arasynda Syrbai Mäulenov, Aqseleu Seidımbek sekıldı belgılı qalamgerler bar. Qyzyq bolǧanda, elden kelgen direktor dastarqandas bolyp otyrǧan azamattardyŋ eş bıreuın tanymaidy. Ömırınde kıtap betın aşpaǧan, ädebiet pen mädenietten saŋylauy joq jan bolsa kerek.
Osyǧan eptep qysylyp qalǧan Ǧafekeŋ sözdı özı alyp, jinalǧandarǧa ony tanystyrady. – Mynau – menıŋ auyldan kelgen bauyrym. Özı täuır jıgıt. Däulettı, myrza azamat. Sosyn būl taza adam. Taza bolǧanda da möldırep tūrǧan sudai tap-taza, – deidı syr bıldırmei.
Sodan keiın Aqseleu aǧaǧa: – Sender mädeniet, ädebiet, ūlttyŋ tarihy, halyqtyŋ şejıresı, qazaqtyŋ salt-dästürı, taǧy osyndai bırdeŋelerdı aityp bas qatyryp jürsıŋder. Al menıŋ ınımnıŋ ondaimen ısı joq. Taza adam. Sender aitqan düniege pysqyrmaidy. Būǧan özı basqaryp otyrǧan keŋşardyŋ şaruasy oŋ bolsa, bala-şaǧasy aman bolsa, tört qūbylasy tügel. Qalǧan närsege jan auyrtpaidy. Taza azamat bolǧannan keiın söitedı, – dep sözın jandyra tüsedı. Otyrǧandar aqynnyŋ astarlap aitqan aşy mysqylyna mäz bolady. Tüisıgı joq jıgıttıŋ özı Ǧafekeŋe rizaşylyǧyn bıldıredı.
Būl oqiǧa ötken ǧasyrdyŋ toqsanynşy jyldary bolǧan. Odan berı de bıraz uaqyt öttı. Qazır qoǧamda osyndai eşteŋemen şaruasy joq «taza» jıgıtterdıŋ qatary köbeidı. Tıptı solardyŋ qūmalaǧy jürıp tūr dese de bolady. Öitkenı olardyŋ denı bilık basynda otyr. Ǧafu atamyz sony qalai bılgen. Aqyn äulie degen osy şyǧar…
Azamat ESENJOL
