Q.Quanyşbaev atyndaǧy Qazaq memlekettık akademiialyq muzykalyq drama teatrynda atalmyş öner oşaǧynyŋ negızın qalauşylardyŋ bırı, Qalleki teatrynyŋ anasy atanǧan Qazaqstannyŋ eŋbek sıŋırgen ärtısı Rymkeş Omarhanovanyŋ mereilı 80 jasqa toluyna orai şyǧarmaşylyq keşı öttı. Aktrisanyŋ benefisınde basty röldı özı somdaityn «Keş» dramasy körsetılıp, «Qazaq önerınıŋ qarlyǧaşy» kıtabynyŋ tanystyrylymy boldy.
Altyn besıgı – Qarqaralynyŋ halyq teatrynan tülep ūşqan Rymkeş Omarhanova odan keiın jaqynda ǧana akademiialyq märtebenı ielengen Qaraǧandy oblystyq S.Seifullin atyndaǧy Qazaq muzykalyq drama teatrynda ūzaq jyl qyzmet ıstedı. Täuelsızdıktıŋ eleŋ-alaŋynda Aqmolada qazaq teatry aşylǧanda osy teatrdyŋ negızın qalaǧan talantty rejisser, Qazaqstannyŋ eŋbek sıŋırgen qairatkerı Jaqyp Omarovtyŋ şaqyruymen atalǧan öner oşaǧyna keldı. Teatrdyŋ tūsaukeser qoiylymy – Ǧ.Müsırepovtıŋ «Aqan serı – Aqtoqty» tragediiasynda Dämelı esımdı keiıpkerdıŋ beinesın somdady.
Sodan berı otyz jylǧa juyq uaqyt öttı. Jalpy jarty ǧasyrdan astam şyǧarmaşylyq ǧūmyrynda 150-den asa beinenı somdap şyǧardy. Atap aitqanda, U.Şekspirdıŋ «Romeo men Djulettasynda» – Djuletta, Ş.Aitmatovtyŋ «Ana-Jer-Anasynda» – Tolǧanai, Ǧ.Müsırepovtıŋ «Qozy Körpeş –Baian sūluynda» – Maqpal, «Qyz Jıbegınde» – Tölegennıŋ anasy, M.Äuezovtıŋ «Qaragözınde» – Mörjan, «Eŋlık-Kebegınde» – Eŋlık, «Tüngı sarynynda» – Taŋqybike, Q.Bekhojinnıŋ «Ūlan asuynda» – Aitolqyn, Q.Ysqaqovtyŋ «Şyrǧalaŋynda» – Qorlyǧaiyn, S.Jünısovtıŋ «Qysylǧannan qyz boldyǧynda» – Hadişa, «Eskı üidegı kezdesuınde» – Zeinep, Q.Şaŋǧytbaev pen Q.Baiseiıtovtıŋ «Beu, qyzdar-aiynda» – Aisūlu, T.Ahtanovtyŋ «Küşık küieuınde» – Biǧaişa bolyp kete beredı.
Qazır seksennıŋ seŋgırıne şyqsa da, A.Dudarevtıŋ poeziia padişasy Fariza Oŋǧarsynova qazaqşalaǧan «Keş» dramasynda Ganna esımdı keiuanany keiıpteidı. Būl qoiylym 2010 jyly Taraz qalasynda ötken HVIII respublikalyq teatrlar festivalınde gran-pridı ielengenın aita ketken de artyq bolmas.
Kino önerınde de aişyqty ızın qaldyryp kele jatyr. Alǧaşqyda Şäken Aimanov, Elubai Ömırzaqov, Ämina Ömırzaqova, Raisa Mūhamediarova siiaqty qazaq kino men teatr önerınıŋ ataqty tūlǧalarymen bırge «Naizatas bökterınde» körkem filmıne tüsse, keiınnen «Hantalapai», «Alyp qaşu operasiiasy», Oralhan Bökeidıŋ «Apamnyŋ astauy» şyǧarmasynyŋ jelısımen tüsırılgen kinofilmderde äjenıŋ rolın somdady.
Şyǧarmaşylyq keşınde önerdegı osynşama orasan eŋbegı atap ötılıp, Nūr-Sūltan qalasy äkımdıgınıŋ atynan Mädeniet jäne sport basqarmasynyŋ basşysy Nūrlan Sydyqov mereitoi iesın qūttyqtap, syi-syiapat körsettı.
