Erteŋ elordamyzda HHI respublikalyq «Jas qanat – 2012» jas oryndauşylar baiqauy bastalady. Üş künge sozylatyn būl baiqauǧa elımızdıŋ är öŋırınen 16 önerpaz qatysyp, üş kün boiy ülken sahnada baptary men baqtaryn qatar synamaq. Dei tūrǧanmen, qatysuşylar, mejelı künge deiın dästürge ainalǧan «beiresmi» räsımder men baiqaudyŋ ajyramas bölıgı sanalatyn şaralarǧa qatysty.
«Özara qorqysu keşı»
«Jasqanattyqtardyŋ» özara tanysu, bılısu dästürı osylai atalady.Bır-bırın qorqytyp häm bır-bırınen qorqyp bolǧannan soŋ, qatysuşylar bırınşı jiynǧa qatysty: kostiumderdı tekseru, sahnaǧa şyǧu repetisiiasy, repertuardy aqtyq ret qaitalau.
Kelesı künı de, jas önerpazdarǧa özderın barynşa «jūldyz» sezınuge jaǧdaiattar jasaldy: qalany aralau, telearna üşın «Jas qanat kündelıgı» tüsırılımıne qatysu, belgılı radiostan- siialarda tıkelei efirge şyǧu.
Efirdegı erkın äŋgıme
«Astana» radiosynda belgılı radiojürgızuşılermen bırge bır saǧat kölemınde tıkelei efirde än älemındegı älemdık soŋǧy trendterdı talqylap, özderınıŋ «muzyka pırlerı» turaly sūhbat qūrdy.
Habarlasqan radiotyŋdarmandardyŋ sūraqtaryna jauap bergen Gülnär Damaeva, Meruert Jeldıbaeva jäne İbragim Jantulin tıkelei efirde ärtürlı saiystardy ötkızıp, tyŋdarmandardarǧa än aitu jönınde keŋes berdı.
Sol künı atalǧan radiotolqynda, qatysuşylardyŋ pırlerı Veyonce, Whitney Houston, Bryan McKnight, Christina Aguilera kompozisiialarymen qatar, jasqanattyqtardyŋ öz oryndaularyndaǧy änderı de şyrqaldy.
Astana atynan – Meruert pen Gülnär
Aituly baiqauǧa elorda atynan ılgerıde aityp ötken Meruert Jeldıbaeva men Gülnär Damaeva qatysady.
21 jastaǧy Meruert «Jas qanatqa» qatysu onyŋ atalǧan baiqauǧa Gauhar Qaspaqova qatysqannan bergı maqsaty bolyp kelgenın aitady. Sol kezde, 5-6 jasar kışkene büldırşın Meruert, bügınde Qazaq Ūlttyq Öner universitetınıŋ studentı. Dombyra mamandyǧy boiynşa bılım alyp jatqan ol üşın än önerınıŋ barlyq baǧyttary qyzyq.
Al, Gülnär bolsa, otandyq şoubiznestıŋ bel ortasyna kıruge būǧan deiın de bıraz qadam jasaǧan. Biyl 24 jasqa keletın Gülnär 2006 jyly Super Star KZ jobasyna qatyssa, 2007 jyly «Şabyt» şyǧarmaşyl jastardyŋ halyqaralyq festivalınde baǧyn synaǧan. Al, ötken jyldyŋ soŋynda, Qazaqstan estradasynyŋ ökılı İvan Breusov jazyp bergen «Minuta liubvi» tuyndysy Gülnärdıŋ repertuaryndaǧy alǧaşqy töl kompozisiiasy.
Dei tūrǧanmen, ol «Jas qanat» baiqauyna qatysu būǧan deiıngı jetıstıkterınıŋ barlyǧynan da biık ekenın aitady.
Bırınşı, ekınşı, …on altynşy!
Keşe jasqanattyqtar, baiqau aldyndaǧy soŋǧy räsımderdıŋ bırıne qatysty. Olar, «Bäiterek» basynda sahnaǧa şyǧu rettık nömırlerın taŋdady. Osylaişa, jerebege Aiagözden Aidyn Äbdıjüsıpov, Aqtöbeden Nūrbolat Abdullin men Dimaş Qūdaibergen, Qyzylordadan Aqmarjan Bainazarova, Pavlodardan Eldana Düisenova men Qamsyzbai Qūrmet, Astanadan Meruert Jeldıbeva men Gülnär Damaeva, Kurchatovtan Külaiym Qaiyrbaeva, Tarazdan Aina Qalmaǧanbetova, Semeiden «Kerbez» duetın qūrǧan Jadyra men Jūldyz Särsembaevalar, Petropavldan Ädılhan Makin, Qaraǧandydan Gülsım Myrzabekova, Oraldan Baqytjan Orahaev, Näzira Hibaşeva jäne İbragim Jantulin qatysty.
Osylaişa, öz rettık nömırlerın taŋdaǧan qatysuşylarǧa baiqaudy ūiymdastyruşylar erteŋgı saiysta sättılık tıledı.
Tanytqan talai talantty
1992 jyldan berı 300-den asa jas önerpaz qatysqan būl baiqau Qazaqstannyŋ än önerıne talai talanttardy tanytty. Olardyŋ arasynda – Medeu Arynbaev men Erlan Kökeev, Janna Orynbasarova men Baqyt Şadaeva, Kūrmaş Mahan, Maira Däuletbaqova men Baqytjan Qajymūqanov, Bauyrjan İsaev pen Gauhar Qaspaqova, Seifullin Jolbarys pen Nūrlan Abdullin, Beibıt Qorǧan men Marjan Arapbaeva, Mädina Säduaqasova jäne «Ürker»men «Dervişi» toptary.
Osy jolǧy qatysuşylar arasynan da Qazaqstannyŋ än önerınde özındık orny bar oryndauşylar şyǧady degen ümıttemız.
Nūrbergen MAQYM
