Parlament Mäjılısınıŋ deputaty Iýrii Li «Elorda Aqparat» mediaholdingı tılşılerımen qazırgı qoǧamdaǧy özektı mäselelerdı talqylady.
– Jaqyn uaqytta bız üş jobany jüzege asyrudy josparlap otyrmyz. Bırınşı joba qarjylyq alaiaqtyqpen küreske baǧyttalǧan. Sait stop-piramida.kz dep atalady. Bız ony qaŋtarda ıske qosamyz. Ekınşı sait nesie naryǧyndaǧy qarjylyq qyzmetterdı tūtynuşylardyŋ qūqyǧyn qorǧauǧa arnalǧan. Al üşınşı jobamyz elektrondy sauda salasyndaǧy tūtynuşylardyŋ qūqyǧyn qorǧaudy közdeidı, – dedı Iý.Li.
Mūnymen qosa ol halyqtyŋ qarjylai sauatyn arttyruda BAQ-tyŋ rölı zor ekenıne erekşe toqtaldy. «Özgenıŋ atynan nesie räsımdeitın alaiaqtar jaily köp estıp jürmız. Solardyŋ köpşılıgın alyp qarasaq, sondai oqiǧaǧa kezıkken adamdardyŋ qarjylyq sauaty tömen ekenın baiqaimyz. Äitpese ädette nesie räsımderde adamnyŋ jeke ūialy telefonyna kod jıberu, sausaq taŋbasyn sūrau, qūjatty jükteu degen siiaqty räsımderdı oryndau talap etıledı. Eger özınıŋ äreketıne jauapkerşılık alyp, aqparattyŋ şyn ne jalǧan ekenın tekserıp, köz jetkızer bolsa, mūndai ökınıştı jaǧdailar azyraq bolar edı. Osy tūsta sızderdıŋ, iaǧni BAQ-tyŋ halyqty qarjylyq sauattylyqqa şaqyruda, közın aşuda rölı ülken dep bılemın» dedı Iýrii Li.
Söz kezegınde elordalyq Işkı saiasat basqarmasynyŋ basşysy Däuren Babamūratov būl pıkırdı qostady. «Basylymdarymyz būl mäselege tereŋırek nazar audaratyn bolady. Halyqtyŋ qarjylyq sauatyn arttyruda bızdıŋ redaksiialar oqyrmandarǧa dūrys baǧyt berıp otyruy kerek» dep qorytyndylady ol.
Sondai-aq basqosu barysynda Mäjılıs deputaty «Astana aqşamy» jäne «Vecherniaia Astana» gazetterınıŋ tılşılerı äzırlegen el täuelsızdıgınıŋ 30 jyldyǧyna arnalǧan «Nur-Sultan – täuelsızdık tūmary» – «Nur-Sultan – simvol nezavisimosti» atty jaŋa kıtappen tanysty.
