Qaladaǧy №5 emhanada Qarttar künı qarsaŋynda «Densaulyqty bırge küteiık!» atty ekı kündık aksiia öttı. Aksiia aiasynda onkologiia dertın, qant diabetın jäne jürek-qan tamyrlary aurularyn erte anyqtauǧa profilaktikalyq tekseru jürgızıldı.
Emhananyŋ dispanserlık pasientter jäne joǧary jastaǧy top adamdaryn qarau ortalyǧyna tekserıluge osynda tırkelgen sala ardagerlerı, 65 jastan joǧary egde adamdar keldı.
– Emhanada 20 şaqty öz ardagerlerımız, iaǧni būrynǧy ärıptesterımız bar. Olardyŋ keibırı bızdıŋ emhanaǧa tırkelmegen bolsa da, bügıngı aksiiaǧa kelıp qatysuda. Sonymen qatar osy ardagerlerge arnaiy dastarqan jaiylyp, konsert ūiymdastyryldy, syilyq tabystaldy. Jalpy emhanaǧa 65 myŋnan astam adam tırkelgen, atalǧan aksiia aiasynda sonyŋ ışındegı egde jastaǧy azamattar kelıp qaraluda, – deidı atalǧan emhana direktory, Astana qalalyq mäslihatynyŋ deputaty Altynşaş Tabuldina.
Emhana basşysynyŋ aituynşa, biyl mamyr aiynda osy jerde bırınşı ret dispanserlık pasientter jäne joǧary jastaǧy top adamdaryn qarau ortalyǧy aşyldy. Būl ortalyqta dispanserlık esepte tūrǧan azamattar özderı bölek kelıp qaralady, ūdaiy tekseruden ötıp otyrady. Qazırgı taŋda ortalyqta sozylmaly aurulary bar 9508 adam tırkelse, sonyŋ ışınde 3895-ı – 65 jastan joǧary adamdar.
– Tekseru barysynda EKG-den ötkızemız, taldau synamalaryn alamyz. Olardyŋ diagnozyna qarai barlyq tekseru şarasy jürgızıledı, jaǧdaiyna qarai odan ärı tiıstı därıgerlerge jıberıledı. Bır uchaskede tırkelgen myŋ jarymnan astam adamnyŋ eŋ ülkenınıŋ jasy – 85-te. Jalpy 540 tırkeluşı tūrǧyn 65 jastan asqan. Aksiia turaly barlyǧyna özımız qoŋyrau şalyp, habarlap aittyq. Egde jastaǧylardyŋ köbınde kezdesetını – jürek-qan tamyrlary aurulary, – deidı aǧa medbike Külzi Abenova.
