Jas alpystan asqanda, jetpıske qadam basqanda, ömırdıŋ aşysy men tūşysyn talai tatyp, soqtyqpaly-soqpaqty jerlerden sürınbei ötken qariialar keŋ otyryp syrlasar qataryn ızdeitını anyq. Auylda bolsa mūnyŋ eş qiyny joq qoi, al qalada qatarlas qariialardyŋ basy qosyluy oŋai emes. Qalanyŋ är būryşynda özımen-özı oŋaşalanyp qalǧandardyŋ belgılı bır bas qosatyn ortasy bolmasa, japadan jalǧyz jabyǧyp kün keşer edı. Osy jaidy eskergen Astana qalalyq ardagerler keŋesı arnaiy şaǧyn ortalyqtardyŋ aşyluyna mūryndyq boldy. Bügınde osyndai ortalyqtar qariialar bas qosar ruhani-mädeni ortaǧa ainalǧan.
Elordadaǧy Qajymūqan köşesındegı 14-şı üide ornalasqan «Janūia» şaǧyn ortalyǧy bız barǧanda qyzu tırlık üstınde eken. «Şaŋyraq» hory kezektı konserttıŋ repertuaryn daiyndauǧa kırısken. Hordyŋ jiyrma şaqty müşesı şetınen önerpaz. Keŋes Tyqmet aǧamyz Abaidyŋ «Közımnıŋ qarasyn» äueletıp şyrqaǧanda, erıksız süisınıp tyŋdap qalasyŋ. Jasy seksennen asqan Fazyl atamyz dauylpazdy düŋkıldetkende, jan dünieŋnıŋ tereŋ tükpırınde jatqan Kök türkınıŋ, älde Kök börınıŋ ruhy oianyp, boiyŋdy kernep, atoi salǧandai sezımge enesıŋ. Düŋkıldete bılseŋ, dauylpaz da talai dünienı qozǧaidy eken-au… Būl şaǧyn ortalyqta hordan bölek, än-küi ansamblı de jūmys ısteidı. Güljazira Barlybaeva esımdı äjemız oŋ sausaǧynan öner tamǧan küişı eken. Talai jerge baryp konsert qoiǧanda, körermender ülken qoşemet körsetıp, qatarynan bırneşe küidı oryndattyratyn jaǧdailar da az kezdespeidı. Mūny osy ortalyqtyŋ direktory Külpaş Ahmetqalieva maqtanyşpen jetkızdı.
– Keşe ǧana L.N.Gumilev atyndaǧy Euraziia ūlttyq universitetıne baryp konsert qoiyp keldık. Odan būryn mektepterde bolǧanbyz. Qariialar künıne orai erteŋ taǧy bırneşe jerde konsert beru josparlanǧan. Bügın soǧan barymyzdy salyp äzırlenıp jatqanymyz ǧoi, – dep män-jaidy tüsındırdı Külpaş apai.
Ortalyqta şahmat, doiby jäne sol siiaqty bırneşe sport türınen üiırmeler bar eken. Būlardyŋ da öz şeberlerı qalyptasyp ülgergen. Qazır äzırge būl sport türlerınen ortalyqtyŋ ışınde bıraz uaqyttan berı özara jarystar ötıp jatqan körınedı. Bolaşaqta ortalyqtyŋ şahmatşylary men doibyşylary qalalyq ardagerler arasynda ötetın jarystarda öz baqtaryn synamaq. Qyzu daiyndyq üstındegı ardagerlerdı alaŋdatpau üşın Külpaş apaidy qaitadan äŋgımege tarttyq.
– Būl ortalyq aşylǧaly da bır jyldan astam uaqyt boldy. Sodan berı būl ardagerlerdıŋ bas qosatyn ornyna ainaldy. Bügınde tuǧan künderdı de osynda atap ötıp jatamyz. Osy ortalyqqa 40-50 şaqty ardager ünemı kelıp tūrady. Osynda Nauryz, Qūrban ait siiaqty meiramdardy da atap ötemız. Bızge Almaty audandyq ardagerler keŋesınıŋ töraǧasy Sailaubek Baibolov ülken qoldau körsetedı. Barlyq ūiymdastyru şaralarynyŋ basy-qasynda sol kısı jüredı. Baryp konsert qoiatyn jerlermen aldyn ala kelısedı. Barǧan jerlerımızde tek konsert qoimaimyz, sonymen qatar ūrpaq tärbiesıne qatysty tälımdı äŋgımeler de jürgızemız. Köbıne jastardyŋ ortasyna baramyz ǧoi, olar bala tärbiesı, ūrpaqtyŋ keleşegı jaily köp sūraqtar qoiady. Ömırden körgen-tüigenderı mol ata-äjelerınıŋ ǧibratty äŋgımelerın tyŋdap, solardan köp närse bılıp qaluǧa tyrysatyny bızdı quantady. Bız osylaişa qoǧamdaǧy tärbie mäselesıne de, mädeni-ruhani ömırge de öz ülesımızdı qosyp kelemız. Ortalyqqa keletın qariialar özderıne jaŋa orta tauyp, qarttyq ǧūmyrdy mändı de, maǧynaly ötkızuge köşkenderı quanyşty. Qalada «Komu za 60» degen klub bar, solar da bızge kelıp, türlı keşter ötkızıp tūrady. Sondai-aq «Masterisa» degen qolöner şeberlerınıŋ üiırmesı de jūmys ısteidı. Onyŋ jetekşısı Olga Matveevna qalada da qolöner būiymdaryna qatysty körme ötkızuge atsalysyp jür, – deidı Külpaş Ahmetqalieva.
İä, Almaty audandyq Ardagerler keŋesınıŋ «Janūia» şaǧyn ortalyǧynda ömır osylai qainap jatyr. Türlı mereke qarsaŋynda mūndaǧylar tıptı tynym tappai ketedı. Öitkenı ata-äjelerınıŋ äserlı konsertterın, oiyn-sauyq keşterın, ǧibratty kezdesulerın Astanada asyǧa kütetın jastar ūiymy köp.
Meŋdolla ŞAMŪRATOV
