Ötken qysta bırqatar būqaralyq aqparat qūraldary alpys jylǧa juyq tarihy bar «Qazaqkonsert» bırlestıgınıŋ jabylǧandyǧy jönınde jaŋalyqty taratty. 
Sol kezde: «Şara Jienqūlova, Manarbek Erjanov, Jamal Omarova, Jüsıpbek Elebekov, Rabiǧa Esımjanova, Maǧauiia Hamzin, Nūrsūlu Tapalova, Roza Baǧlanova syndy qazaq än-küi jäne bi önerınıŋ maitalmandary bastauynda tūrǧan ırgelı ūjymnyŋ jūmysyn toqtatqany qalai boldy?» dep, oilanǧanymyz ras. Jurnalister tarapynan aitylǧan «Bırlestık tübegeilı jabylmai, Astanaǧa köşuı mümkın» degen boljam ǧana köŋılımızge demeu boldy. Būl söz şyndyqqa ainalǧanyn estıgen soŋ, elorda törınde qaita qūrylyp, «Qazaqkonsert» memlekettık konserttık ūiymy atauyn alǧan ūjymnyŋ tynys-tırşılıgımen tanysuǧa asyqtyq.
JALYNDAǦAN JASTAR TANYLADY
«Qazaqstan» ortalyq konsert zalynynyŋ negızınde jūmysyn jalǧastyrǧan, älemdegı ozyq tehnologiialyq jetıstıkterdı esepke alyp, jabdyqtalǧan, säulet önerınıŋ bıregei tuyndysy bolyp sanalatyn ǧimaratta oryn tepken ūiym aldynda auqymdy maqsattar qoiylyp otyr. Basty maqsat – ärine, ädebi jäne san salaly öner tuyndylarymen köpşılıktı qauyştyru. Sol arqyly ūiymǧa qarasty öner ūjymdary men jeke oryndauşylardy halyqqa tanystyru. Būl tūrǧydan alǧanda, «Qazaqkonsert» memlekettık konserttık ūiymy attary älı tanyla qoimaǧan jas önerpazdarǧa ülken senım artyp otyr. Ūjym qataryna da negızınen sondai önerpazdar qabyldanǧan.
Al tarihy tereŋ, özınıŋ qalyptastyrǧan dästürlerı bar bırlestıkke kelsek, ol elordadaǧy ūiymnyŋ Almatydaǧy filialy bolyp qala bermek. Filialdy būrynǧysynşa belgılı änşı, kompozitor, Qazaqstannyŋ jäne Qyrǧyzstannyŋ halyq ärtısı Altynbek Qorazbaev basqaryp otyr.
ÖNER MAITALMANDARYNYŊ ÖNEGESI
Ǧimaratty aralatyp, sondaǧy öner ūjymdarymen bızdı ūiymnyŋ şyǧarmaşylyq jönınde direktordyŋ orynbasary Erlan Däkenov tanystyrdy. Astanadaǧy ūiymǧa qarasty ūjymdarǧa da attary köpşılıkke tanymal öner maitalmandary jetekşılık etude eken. Mäselen, «Solister akademiiasy» memlekettık orkestrınıŋ körkemdık jetekşısı – Älem ärtısı degen ataǧy bar Halyqaralyq şyǧarmaşylyq akademiiasynyŋ akademigı, Qazaqstannyŋ halyq ärtısı, elımızdıŋ Eŋbek Erı Aiman Mūsaqojaeva. Folklorlyq-etnografiialyq ansambl basşylyǧyn tanymal küişı, kompozitor, QR eŋbek sıŋırgen ärtısı Seken Tūrysbek qolǧa aldy. Al «Forte-Trio» atty memlekettık triony QR eŋbek sıŋırgen qairatkerı, pianinoşy Timur Urmancheev basqaruda. Būl ūjymdarǧa qosa ūiym qūramynda kameralyq orkestr, estradalyq toptar men jeke oryndauşylar jūmys ısteude.
«ASTANA MUSICAL» ALAR ASU
Juyrda gazetımız arqyly bas qalada «Qazaqkonsert» memlekettık konserttık ūiymy janynan «Astana Musical» atty jaŋa teatr aşylǧanyn süiınşılegenbız. Qazaq körermenıne älı de taŋsyq bolyp körınetın baǧytty taŋdaǧan teatrdyŋ daiyndap jatqan alǧaşqy qoiylymy jaily da jazǧanbyz. Sonda öner ūjymy özınıŋ tūsaukeserın «Dos-Mūqasan» ansamblınıŋ repertuarynan alynǧan änderden qūralǧan miuziklmen ötkızetını aitylǧan. Aqparatty tolyqtyra keteiık, tūŋǧyş qoiylym äigılı ansambldıŋ änderınen ǧana emes, ötken ǧasyrdyŋ alpysynşy-jetpısınşı jyldardaǧy tanymal tuyndylardan tūrady. Mūny bızge qoiylymnyŋ qoiuşy rejisserı Esläm Nūrtazin jetkızdı. Sol jyldardaǧy jastyqtyŋ lebın osy zamanǧa äkeletın, ǧaşyqtyq sezımnıŋ quanyşy men mūŋy syndy mäŋgılık taqyrypty öner tılınde söiletetın qoiylymnyŋ premerasy qyrküiek aiynyŋ aiaǧyna, qazan aiynyŋ bas kezıne josparlanǧan. Oǧan qyryq şaqty ärtıs qatyspaq. Arasynda elgı belgılı önerpazdar da körınıp qaluy tiıs.
ATQARYLAR IS AUQYMY
Memleket basşysy Nūrsūltan Nazarbaevtyŋ «100 naqty qadam» Ūlt josparynyŋ 69-qadamynda Astanany zertteuşılerdı, studentterdı, käsıpkerlerdı, barlyq öŋırlerden turisterdı tartatyn Euraziianyŋ ıskerlık, mädeni jäne ǧylymi ortalyǧyna ainaldyru jönınde aitylǧan. Elordada «Qazaqkonsert» memlekettık ūiymynyŋ qūryluy soǧan bırden-bır jol aşady. Aldymyzda kele jatqan «EKSPO-2017» halyqaralyq mamandandyrylǧan körmenıŋ qarsaŋynda da ūiymnyŋ atqarar qyzmetı maŋyzdy bolmaq. Körme ötetın künderı ūjym önerpazdaryna tüsetın ülken jüktı de bızdıŋşe, şamalau mümkın emes.
Älemdık auqymdaǧy şaranyŋ aldynda da, odan keiın de ūiymnyŋ atqarar qyzmetı kölemdı bolmaq. Onyŋ bärı de Astananyŋ immidjıne oŋ yqpalyn tigızbek.
– Jyl saiyn halyqaralyq jäne respublikalyq konkurstar men festivaldardy ūiymdastyrudy qolǧa almaqpyz. Sonyŋ ışınde Şämşı Qaldaiaqov atyndaǧy halyqaralyq än festivalı, «Ūly dala muzykasy» festivalı, Ortalyq Aziia elderınıŋ teatr festivalı, jeke oryndauşylar, pianister, skripkaşylardyŋ konkurstary, «Elım menıŋ», «Täuelsızdık tolǧauy» respublikalyq konkurstary jäne özge de baiqaular bar. Älemdık klassikalyq jäne qazırgı zamanǧy muzykalyq öner jūldyzdarynyŋ konsertterın ötkızbekpız. «EKSPO-2017» körmesın ötkızu aiasynda klassikalyq jäne estradalyq muzyka konsertterın apta saiyn ūiymdastyrmaqpyz. Sondai-aq, balalarǧa arnalǧan apta saiynǧy abonementtık spektaklder men konsertter, ūlttyq filmderdıŋ tūsaukeserlerı, mädeniet, sport jäne turizm salalary boiynşa halyqaralyq konferensiialar, brifingter, körmeler, döŋgelek üstel mäjılısterı, teatrlandyrylǧan qoiylymdar, şou-baǧdarlamalar jäne özge de auqymdy şaralardy ötkızu ūiym mındetıne jatady, – deidı «Qazaqkonsert» memlekettık konserttık ūiymynyŋ direktory Saltanat Seidımbek.
BÄSEKELESTIK ORTA QALYPTASPAQ
Qarap otyrsaq, osynyŋ bärı az jūmysty qajet etpeidı. Ūiymnyŋ būl eŋbegı arqyly Astana mädenietı jaŋa sapaǧa köterıledı. Ärine, köp närse önerpazdardy käsıbilıgıne bailanysty bolmaq. Eger ärtıster biık deŋgeide öner körsete bılse, elordadaǧy özge öner ūjymdary da sondai därejege köterıluge tyrysady. Būl tūrǧydan alǧanda, «Qazaqkonsert» memlekettık ūiymynyŋ önerpazdary elordada bäsekelestık orta qalyptastyrmaq.
Mäselen, osy künderge deiın «Jastar» teatry qoiǧan miuziklderdı ǧana tamaşalaǧan edık. Onyŋ keiıngısı «Mosart» qoiylymy boldy. Osy tuyndy jaman şyqty dep aitpaspyz, bıraq bızge «Astana Musical» teatry osy janrdaǧy qoiylymdardy qalai qoiatyny qyzyq bop tūr. Būl mäsele miuziklderdı qoiu jönınen täjıribesı bar «Jastar» teatry ūjymyn da qyzyqtyrary sözsız. Demek, qos ūjym bırı ekınşısınıŋ qoiylymdaryn tamaşalap, käsıbi tūrǧydan ösedı. Būdan osy ekı teatr ǧana emes, märtebelı öner ūtady. Halyqqa keregı de jürektı tebırentetın şynaiy öner. Endeşe, «Qazaqkonsert» memlekettık ūiymyna osy üdeden körınuıne şyn jürekten tılektestık bıldırıp, elordada jaŋa bastaǧan qadamdaryna sättılık tıleimız!
Amanǧali QALJANOV
