Tüngı ekıden asqan kez. Bızder mıngen ūşaq Nūrsūltan Nazarbaev halyqaralyq äuejaiyna kelıp qondy. Aldymen astanamyzdyŋ suyq jelı qarsy aldy. Sonda da aramyzdaǧy tompaq bala eldı qatty saǧynǧan eken, borttyŋ esıgı aşylysymen: «O, Qazaqstan!» dedı de, ızınşe «Altyn kün aspany» dep änge de qosyp jıberdı.
Jolsoqty bolǧan jolauşylar balanyŋ köŋılıne riza bolyp, jadyrai külıp, şekaralyq baqylaudan kezegımen ötıp jatty. Odan keiıngı esıktıŋ közınde «PTR»-den ötkenımızdı däleldeitın qūjatty körsetu kerek eken. Synapty ötken täulıkte qonaqüide tapsyryp, terıs nätijesın alyp köŋılımızdı demegen bolatynbyz. Ony ūşarda da teksergen bolatyn. Mädeniettı türde, aǧylǧan jolauşylardyŋ bır-bırıne kedergısın keltırmeitındei jaima-şuaq jaǧdaida ötkenı esımde qalǧan. Iltipatty, şalt qimyly tügıl artyq sözı joq, ızettı körıngen ol jaqtyŋ barşa qyzmetkerlerı.
Bızdıŋ eldegı būl mındettı atqarǧan etjeŋdı, äiel-qyzmetkerdıŋ öktem dauysy qūlaqqa ersı estıldı. Topyrlaǧan jolauşylarǧa jekıp söilep, degbırıŋdı aldy. Künde körıp köz üirenbegen qyzmet formasyna nazarymyz tüstı. Alqymyn bailaǧan şüberektı buǧan qyzyl besjūldyz da ötken zamannyŋ öşken qūrylymyn eske tüsırdı. Osylaişa, az kün şeteldıŋ mädenietıne qanyp, qyzmet körsetu ädebın baiqap, riza köŋılmen kelgen köŋıldı myna äieldıŋ ämırşıdei äkıreŋdegen mänerı bır sätte joq qyldy. Jalǧyz men emes, jolauşylardyŋ arasynda Qazaqstanǧa alǧaş kelgender de bar. Olardyŋ qandai äserde qalǧanyn bılmeimın. Bar bolǧany, arqanyŋ boranyndai būrqyraǧan şekara qyzmetkerınıŋ aldynda qylmysty bolǧandai kışıreiıp, «PTR» körsetıp, ötıp jatty. Bır qarasam, «Altyn kün aspanym» dep asqaqtaǧan balanyŋ da köŋılı päs bolyp, basylyp qalypty. Ras, ındet bar. Aldymen şekaradan keledı dep «Omikrondy» da kütıp otyrǧan bolar. Bıraq, mūnyŋ bärı adam mädenietınıŋ qyzmet sapasyna syn keltırmeuı kerek emes pe?!
