Qazaqtyŋ kapitalisı

Atanǧan Baimūhambet (Baiköp) Qosşūǧylov Aqmolany damytuǧa ülken üles qosqan

Qūrmanǧali Baimūhambetūly Qosşūǧylov 1878 jyly tuǧan, jastaiynan äke tärbiesımen jan-jaqty bolyp ösken. Aqmoladaǧy jergılıktı medresenı, seminariiany bıtırıp, Sankt-Peterburg tehnologiialyq institutynda oqyp, joǧary bılımdı injener-tehnolog, ekonomist atanǧan alǧaşqy qazaqtyŋ bırı. Qosşūǧylovtardyŋ sol kezdegı käsıbınıŋ ozyq damuyna, örleuıne negız salǧan, syrtqy ekonomikalyq bailanysyn jetıldıruge, önerkäsıp salasyn ornyqtyruǧa, qarjy-bank jüiesın jürgızuge bastama jasap, ıske asyrudyŋ bärı aldymen Qūrmanǧali esımımen tyǧyz bailanysty. Sol kezde öz zamanyndaǧy Reseidıŋ, Europanyŋ ekonomikasyn körıp-bılıp, oqyp-toqyp kelgen Qūrmanǧali Baimūhambetūly HH ǧasyrdyŋ alǧaşqy jyldarynan-aq äkesınıŋ ısın jaŋaşa progresşıl jolmen jalǧastyrǧanyn aituǧa tiıspız. Resei patşalyǧy ükımetınıŋ şeşımımen berıletın bar-joǧy ekı därejelı gildiia ataǧynyŋ 1-ınşısıne ie boluy da közıqaraqty Qūrmanǧalidıŋ bılımı men eŋbegı deuımız kerek. Ol sonymen qatar Aqmola oiazynyŋ (uezınıŋ) müşesı, Resei patşalyǧynyŋ äskeri-lauazymdyq şenın iemdengen. Äkesı Baiköptıŋ atymen jalǧasqan käsıptı keŋeite otyryp, Qūrmanǧali Reseiden de ärı şyǧyp, Batys Europa elderıne; onyŋ ışınde Germaniia, Angliia, Avstriia siiaqty memlekettermen sauda-ekonomikalyq bailanys jasauǧa köşedı.

Qūrmanǧali atymen aitylatyn äŋgımelerdı estıp, körıp-bılgen köneközder de aramyzdan azaiyp barady. Bıraq bız būl arada sonyŋ ışınde ol turaly myna bır qysqaşa maǧlūmatty bere ketsek te bolady. Qūrmanǧali Sankt-Peterburgte oqyp jürgende, sol zamandarda-aq el-elge endı ǧana şyǧyp, tarala bastaǧan kädımgı avtomobildı alǧaşqy igergen qazaq dep te aitatyn äŋgımege negız bar. Ol sonda özınıŋ instituttaǧy negızgı oquymen bırge avtomobil jürgızudıŋ oquyn qosa igere otyryp, ony aidaudyŋ jarystaryna qatysqan alǧaşqy sportşy da bolǧan eken. Bırde alǧaşqy bır ülken jarysta bırınşı oryn alyp, syilyqqa avtomobilge ie bolǧan desedı. Jarysqa qatysu üşın özı köp aqşa tıkken deidı. Ol sol avtomaşinany HH ǧasyrdyŋ (şamamen 1905-07 jyldar) alǧaşqy jylynda Aqmolada, tıptı qazaq dalasynda deuge bolady, alǧaşqy äkelıp mıngen qazaq ekenın közkörgen talai kuälar aityp ketken bolatyn. Tıptı ol ol ma, Qūrmanǧali endı özımen ärıptes, qaltasy qalyŋ bailardyŋ tapsyrysy boiynşa avtomobil saudasyn jürgızıp, ony alǧaş ret satumen ainalysqan. Ol alǧaşqy avtomobildı Aqmoladaǧy fotograf K.Şahovqa, qala merı, köpes A.Kubringe satqan. Aqmola turaly derektı kıtaptarda K.Şahov pen A.Kubrindı alǧaş avtomobil mınuşıler dep körsetse, al mūny olarǧa äkelıp satqan Q.Qosşūǧylov ekenın kım de bolsa bılmeuı zaŋdy.

Ol turaly endıgı bır maŋyzdy derek – avtomobil ataulynyŋ bolaşaǧyn baiqaǧan Qūrmanǧali öz mümkındıgın paidalanyp, ülken bır jospardy jüzege asyrmaqşy bolǧany. Būl jospar Aqmolada avtomobil zauytyn salyp, osyndai temır kölık şyǧaru bolatyn. Būl jönınde älı naqty derek jinaqtaudy qajet etedı. Bıraq ta bızdıŋ süienıp aitarymyz, onyŋ tuǧan kışı ınısı, Baimūhambettıŋ kenje ūly Bekmūhambettıŋ aituyna qaraǧanda, Qūrmanǧali Germaniia ükımetımen, onyŋ bır avtomobil jasau zauytymen (keibır derekterde «Opel» kompaniiasy deidı) 1912-1913 jyldary Aqmolaǧa osyndai zauyt salu jönınde kelısımşart jasasqan. Öitkenı būǧan deiın mūndai naqty mysaldar Aqmola töŋıregınde bolǧan. Mäselen, Atbasarda, Aqmolada Qūrmanǧalidıŋ ūiymdastyruymen germaniialyq ataqty «Zinger», «Salamandra», «Iаkor» kompaniialarynyŋ ökıldıkterı men filialdary jūmys ıstegen. Qosşūǧylovtar osy kompaniialardyŋ jūmysyn qazaq dalasynda alǧaş ūiymdastyruşylar retınde tanylǧan. Qazaq dalasyna «Zinger» ıs-tıgın maşinalarynyŋ, «Salamandranyŋ» nebır kiımderınıŋ, «Iаkordıŋ» de kiımderı men tūrmysqa qajettı sömke-şabadannan bastap nebır terı-tersek būiymdary tauarlarynyŋ taraluyna mūryndyq bolǧan.

Qūrmanǧali Qosşūǧylov Germaniiadan özımen bırge zauyt pen avtomobil jasaudyŋ büge-şıgesıne deiın qattalǧan jobasy men barlyq qūjattary bar ülken katalogyn jäne 4 nemıs injenerın äkelıp, 1913 jyldyŋ jazynda qūrylys jūmysyna kırısedı. Alaida būl ülken ıstıŋ aiaqsyz qaluyna 1914 jylǧy Germaniia men Resei arasynda bastalǧan, arty Bırınşı düniejüzılık soǧysqa ūlasqan halyqaralyq jaǧdaidyŋ örşuı sebep bolady. Sodan keiıngı qoǧamdyq ömır de belgılı: 1918 jyl aralyǧyna deiın sozylǧan Bırınşı düniejüzılık soǧys, sol ekı ortadaǧy 1917 jylǧy qazan töŋkerısı, azamat soǧysy, keŋes ökımetınıŋ ornauy. Osy kezeŋderde qazan töŋkerısınen keiın alǧaşqy jyldarda qazaq dalasynda Alaşorda ökımetı ornaǧan kezde Qosşūǧylovtardyŋ ūlt müddesı üşın qūrylǧan olardy negızgı qarjylandyruşy bolǧany jönınde de äŋgımeler bar. Būl oraida, Bekmūhambet atamyzdyŋ aituy boiynşa, olar osy kezeŋde qazaqtyŋ igı jaqsylary Ä.Bökeihanūly bastaǧan ūltjandy tūlǧalarymyzben bailanys jasaǧan. Sonyŋ ışınde Maǧjan Jūmabaevpen kezdesken, Aqmolada 1917 jyldyŋ jazynda oblystyq qazaq sezın ötkızuge kömek körsetedı. Aqmola oblysy atynan Maǧjanmen bırge Qūrmanǧali qairatker ärı demeuşı retınde Mäskeuge Bükılreseilık mūsylman sezıne delegat bolyp qatysqan.

Olardyŋ ökılderı Aqmolaǧa kelıp, Qūrmanǧali üiıne tüsıp, sonda kelelı mäslihat qūratynyn, zamanaui mäselelerdı söz etkennıŋ kuäsı bolǧanyn da atalarymyz aityp otyratyn. «Sonyŋ bır şeşımınde Qosşūǧylovtar tarapynan tiıstı qarjy, materialdyq, basqa da kömek berılıp, bölıngenın özım hattap, şottaǧan edım. Säken Seifullin Aqmolada tūrǧanda naǧaşy dep bızdıŋ üiımızde jiı bolatyn. Sol kezde oqudy jaŋa bıtırıp, mūǧalım bolyp jürgen jas jıgıt qoǧamdaǧy özgerıske belsene aralasyp edı. Özım de müşe bolǧan Aqmoladaǧy qazaq jastarynyŋ qūrǧan «Tırşılık» ūiymyna, sol atpen şyqqan «Tırşılık» gazetıne Qūrmanǧali barynşa qarjylai, materialdyq qoldau körsetıp edı» deitın Bekmūhambet atamyz.

Keŋes ökımetınıŋ ornauyna bailanysty bai, önerkäsıp ielerı ataulynyŋ bärı quǧyndalyp, aqyr aiaǧy olardy qyryp-joiǧanyn da jaqsy bılemız. Qosşūǧylovtar äuletı de quǧyndalyp, olardyŋ barlyq mülkı tärkılenıp, keŋes ökımetıne köşedı. Qosşūǧylovtardyŋ sonda barlyq dünie-mülkın, önerkäsıp, sauda-sattyq, basqa da oryndaryn sanamaǧanda, banktegı qarjysyn 1 million somnan asa eseptep ötkızgenın Bekmūhambet atamyz aityp otyratyn. Bıraq ta qazan töŋkerısınen keiın keŋes ökımetınıŋ alǧaşqy jyldarynda Bükılreseilık halyq deputattary keŋesınıŋ töraǧasy V.Leninnıŋ käsıpkerlerge, sonyŋ ışınde äsırese önerkäsıp ielerıne raqymşylyq jasap, olardyŋ ärı qarai jaŋa qoǧamǧa qyzmet etuın közdegen arnaiy dekrettık şeşımıne bailanysty Qosşūǧylovtarǧa bırden tiıse qoimaǧan. Endı olardyŋ bärı būrynǧy özderınıŋ menşıktı käsıbın keŋes ökımetıne tapsyryp, soǧan jūmys ısteidı.

Qyzyl imperiia bärıbır mūndai būrynǧy bai ataulynyŋ soŋynan qalmai, atyşuly kämpeskesımen tübın qūrtqany belgılı. Solardyŋ ışınde Qosşūǧylovtardy da 1927 jyly qoldaǧy qalǧan bar dünie-mülkımen, üiımen qosa kämpeskege ılıktırıp, aşyq qudalauǧa ūşyratady. Qūrmanǧalidıŋ özıne bas bostandyǧyn bergenmen, Aqmoladan ketuge mäjbür etedı. Qalǧan aǧaiyndaryn da toz-tozyn şyǧaryp, bırazyn (ınısı Bekmūhambettı, Qūrmanǧalidıŋ balasy Hasendı) ūzaq jylǧa sottap ta jıberedı (Uäli, Mūhametqali, Nūrmūhamed, Qadyrkei taǧdyry tıptı qiyn, bärı de sol kezeŋde türlı jaǧdaida ömırden ötedı). Sodan Qūrmanǧali 1928-1940 jyldar aralyǧynda öz otbasymen el jaqta, atap aitqanda, atamekenı Keltetal, Örkendeu, Bötei boiyndaǧy aǧaiyndar ortasynda, odan Jaŋaarqada bıraz bolady. Qaida barsa da qudalaudy köredı. Odan soŋ Qaraǧandy jaqta tūrady. Arasynda elge jyl aralatyp kelıp otyrǧan. Elge soŋǧy ret 1951 jyly otbasymen (qasynda nemerelerı Rüstem men Şyŋǧys bolǧan) kelıp, jaz boiy bıraz bolyp, endı alysqa oŋtüstıkke ketıp bara jatqanyn aityp, qoştasyp ketedı. Öitkenı onyŋ sol kezderı Şymkent jaqqa auyp ketken qaryndasy Raihan men küieu balasy Ǧalidıŋ qolyna baryp panalaidy. Qairan jalǧan ömır onyŋ degenıne jetkızbedı.

HH ǧasyrdyŋ bas kezındegı qazaq dalasynyŋ osyndai bır belgılı de beimälım tūlǧasy, Aqmola oiazynyŋ (uezınıŋ) müşesı bolǧan, Resei patşalyǧynyŋ äskeri-lauazymdyq şenın alǧan 1-gildiia köpesı, mesenat Qūrmanǧali Baimūhambetūly 1954 jyly Şymkent qalasynda qaitys bolady.

Qūrmanǧalidıŋ Hasen degen ūly bolǧan, ol da halyq jauynyŋ, baidyŋ balasy degen jeleumen sottalyp, bırneşe jyl aidauda bolǧan. Türmeden şyǧysymen-aq äbden älsırep, auru bolyp jetken ol Aqmolaǧa kelısımen qaitys bolady. Odan tuǧan Rüstem, Şyŋǧys degen balalary keiın Qyrǧyzstanda tūryp jatqany turaly habarlar kelıp, sonau jetpısınşı jyldardyŋ basynda tuysqan bır aǧamyzdyŋ arnaiy ızdep baryp, tauyp kelgenı bar. Hasennen tuǧan taǧy bır ūly Naib bertın 2003 jyly osy Astana qalasynda dünieden öttı.

Jalpy Baimūhambetten 6 ūl, 1 qyz tuǧan. Olar: ülkenı joǧaryda bız atap ötken Qūrmanǧali, odan keiıngılerı Mūhametqali (Mükam), Uäli, Nūrmūhambet (Nūrkei), Qadyrkei, Bekmūhambet (Bike), qyzy Raihan. Ärine, kezınde Aqmolada Qūrmanǧali, Mūhametqali, Uäli, Nūrmūhambettıŋ de bır-bır ülken üiı bolǧan. Ärqaisysy da bırneşe düken ūstaǧan, önerkäsıbınıŋ är salasyna ie bolyp, olardyŋ jūmysyn jürgızıp otyrǧan. Tek älı üilenıp, otau kötermegen Qadyrkei ǧana keŋes ökımetınıŋ qyspaǧyna şydai almai, qarsylasyp, jastai qazaǧa ūşyraǧan. Keiın būlardyŋ da taǧdyry qudalauǧa ūşyrap, toz-tozy şyǧyp, sottalǧandary aidalyp, quǧyndalǧandary belgısız jaqqa habarsyz ketkenderı de bar (Mūhametqali men Nūrmūhambet otbasylary). Bertınge deiın ömır sürgen kenje ūl Bekmūhambettıŋ de taǧdyry ökınışpen öttı. Olardyŋ ärqaisysynyŋ taǧdyryna toqtalu da bıraz äŋgımeleudı qajet etedı. Tek sonyŋ ışınde Uälidıŋ ǧana ūrpaǧy bügınde Astanada tūryp jatyr.

Endı osy oraida bızdıŋ erekşe toqtalatynymyz, Baimūhambettıŋ kenje ūly Bekmūhambet (Bike) Baimūhambetūly Qosşūǧylov turaly bıraz söz aita alamyz. Osynau äŋgımenıŋ negızgı jelısı de, naqty dälelderı de özderınıŋ basynan keşken ömırlerınıŋ tolyq kuäsı bolǧan Bike atamyzdyŋ aitqandarynan şyǧyp otyrǧanyn aita ketuımız kerek.

Bekmūhambet Baimūhambetūly 1896 jyly Aqmola qalasynda tuǧan. Äkesınıŋ köpeiı, aǧalarynyŋ ortasynda erke ösken ūl bola otyryp, jergılıktı medrese, gimnaziiada oqyp, üzdık tämamdaǧan. Jastaiynan öte zerek bolǧan, bırneşe tıldı; sonyŋ ışınde qazaqşasynan basqa tatarşa, orysşany bylai qoiǧanda, arab, nemıs, fransuz tılderın erkın bıletın. Bekmūhambet 1914 jyly Mäskeudıŋ politehnikalyq institutyna (aǧaş öŋdeu önerkäsıbı salasy boiynşa) tüsıp, sonda oqyǧan. Özınıŋ aituynşa, äke däuletınıŋ arqasynda taryqpai, aqşany tögıp-şaşyp, kniaz, graftyŋ balalarynyŋ ortasynda emın-erkın jürgen. Özıne arnaiy aldyrtqan küimesımen Mäskeu köşelerın qoŋyraulatyp jüretının de kürsıne eske alatyn. Al oquyna da öte zerektık tanytyp, oqytuşylardyŋ közıne tüsken. Sonda jürıp orys ziialylarynyŋ sol kezdegı aqsüiektık tılı bolǧan fransuz, nemıs tılderın meŋgerıp, erkın söilegen. İnstitutty aiaqtauǧa endı şamaly uaqyt qalǧanda, 1917 jyly qazan töŋkerısı bastalyp, keŋes ökımetı kelıp, aumaly-tökpelı zaman ornaǧan kezde student Bekmūhambet te qudalauǧa tüsıp, sodan elge, Aqmolaǧa qaşyp keledı. Mūnda ol aǧalarynyŋ bedelı arqasynda alǧaşqy jyldary keŋes ökımetıne qyzmet etedı. Bılımdı jıgıt Aqmola sovdepınde qyzmetker bolyp bıraz jyl jūmys ısteidı. Mūnda ol S.Seifullin, A.Asylbekov, J.Nūrkin, B.Ädılov, B.Serıkbaev, Ǧ.Äubäkırov, F.Krivoguz, N.Monin, Z.Katchenko jäne t. b. siiaqty töŋkerıs qairatkerlerımen bırge qyzmet atqarady. Sol siiaqty köptegen osyndai qairatkerlerdıŋ qazaq, orysynyŋ bırazy kezınde Qosşūǧylov kompaniialarynda jūmys ıstegenın de aityp otyratyn. Alaida bai balasy bolǧan soŋ, ärine, taǧy quǧyndalady. Qosşūǧylovtardy, negızınen, 1927 jylǧy kämpeskeden keiın qatty quǧyndalǧanyn joǧaryda aityp öttık. Al solardyŋ ışınde Bekmūhambet 1928 jyly bai tūqymy dep, taǧy basqa sebepsız jalamen 25 jylǧa aidalyp kete barǧan. Ol ataqty Kolyma lagerı türmesınde jan azabyn tartady. Tek özınıŋ bılımınıŋ, bırneşe tılderdı erkın meŋgerıp, jaza bıluınıŋ arqasynda türme keŋsesınde ıs jürgızuşı (pisar), audarmaşy bolyp jany aman qalady. Türme basşylarymen tıl tabysyp, äiteuır odan 18 jyldan soŋ, 1946 jyly aman-esen elge oralady. Aqmolaǧa kelgenmen, NKVD-nyŋ ünemı aŋduynda, quǧyn köruınde bolady. Aqyry olar kün körsetpegen soŋ el jaqqa jyljyp, auyldaǧy aǧaiyndar ortasyna baryp panalaidy. Onyŋ qalǧan ömırı bastapqyda Jaŋaarqa öŋırındegı älı köşıp-qonyp jürgen auyldarda, keiın Qarajal qalasynda öttı. Patşa däuırınde alǧan bılımın halqyna bere almady. Ärine, bükıl ǧūmyryn tas-talqan etken keŋes zamanynyŋ kesırınen mügedek bolsa da, öle-ölgenşe el arasynda syily da tektı qalpynan ainyǧan joq. Bike ata dünieden ozǧanşa bes uaqyt namazyn qaza qylmai, tek imandylyq pen tazalyqty, adaldyq pen qanaǧatşylyqty, ömırge şükırşılık pen täubaşylyqty ǧana mūrat tūtty. Öte prinsipşıl, ädıl bolatyn. Qasynda ömırlık jary bolǧan Liuba apamyzdy türmeden kele jatqanda jolda kezdestırıp, nemısşe söilese kele tıl tabysyp, elge bırge ala keledı. Ömırınıŋ soŋyna deiın Bike atanyŋ qas-qabaǧyna qarap, ömırlık jary bola bılgen Liubov Karlovna Qosşūǧylova mūsylmandyq paryzyn qaza qylmai ūstai bıldı, qazaqtyŋ tılı men salt-dästürın berık saqtady. Bike atamyz qaitys bolǧannan keiın jalǧyz özıŋızge tūru qiyn bolady ǧoi degen aǧaiyndarǧa bai atamyzdyŋ, Bikenıŋ şaŋyraǧyn qūlatpaimyn degen sözın estıdık. Taǧdyr olarǧa ūrpaq berudı jazbady. Ötken ǧasyrdyŋ basynda bükıl qazaqty bailyǧymen taŋǧaldyrǧan bırı Baiköp, bırı Maiköp atap ketken qazaqtyŋ bır äuletınıŋ tarihy da Bike atamyzben bırge kettı. Ol 1981 jyly Qarajal qalasynda dünieden ozdy.

Qazaqtyŋ kapitalisı atanǧan Baimūhambet, Qūrmanǧali Qosşūǧylovtar jaily aitar äŋgıme jeterlık. Ärine, Bike atamyzdyŋ, basqa da közkörgen köne qarttarymyzdyŋ talai äŋgımelerı jalǧyz mūnymen şektelmek emes. Qosşūǧylovtar jaily arhivtık materialdardy qoparsaq älı talai dünienıŋ tabylatyny anyq.

Bike atamyz aityp otyruşy edı, sony armandap ta ketıp edı. Ol armany aǧasy Qūrmanǧalidıŋ Aqmolany qazaqtyŋ ordasy etsem, anau Peterburg, Mäskeu, Europanyŋ qalalary siiaqty bolaşaqta ūltymyzdyŋ önerkäsıptık-ruhani körkeigen ortalyǧyna ainaldyrsaq degen sözın ärdaiym eske alatyn. Ol sözge män bermei, onşa tüsınbeitınbız. İä, olardyŋ Aqmolany da, eldı de zamana talabyna sai damytuǧa degen jospary köp edı deitın. Ätteŋ, sorly qazaqtyŋ basyna jazǧan ömır-baqi baq-däulet tūrǧan ba, bärı de qu jalǧannyŋ, sūm zamannyŋ qūrdymyna ketıp tyndy.

Kämpeskeden keiın 1929 jyldary Qūrmanǧalidıŋ otbasymen elge aǧaiyndar arasyna kelgende, auyldaǧy jūrttyŋ äbden aryǧan, jüdeu türın körgende qatty qaiǧyryp: «Şırkın, jalǧan-ai, baiaǧy däurenımnıŋ kezınde osynau elımdı, jūrtymdy kötersem be dep edım, aqşamdy aiamai tögem be dep edım, bärıŋdı de jaqsy ömırge jetkızsem be dep edım, ätteŋ, myna tarşylyq zamannyŋ basymdaǧy baq-däuletımdı jūlyp alǧany-ai» degen zarly ökınışın sol kezderı kelını retınde qolynan talai däm berıp, bıraz bırge tūrǧan menıŋ äjem, 2001 jyly 90-ǧa jaqyndap ömırden ötken Jaŋylşaq Nūrmaǧambetqyzy da bızge äŋgımelep berıp otyratyn.

Bügınge deiın keşegı Aqmolada, qazırgı qazaqtyŋ astanasynda Qosşūǧylovtar jaily estelık äŋgımelerdı būrynnan kele jatqan qariia tūrǧyndar jaqsy bıledı. Joǧaryda aitylǧan äŋgımelerdıŋ bärın de solardyŋ auyzynan estıp, jazyp alǧan edık. Qala mūrajailarynda da olar turaly el auyzynan äŋgıme, material, fotosuret jinaqtalǧan. Keşegı ötken ǧasyrymyzdyŋ 1970 jyldarynyŋ ortasyna deiın bärı būzylǧanşa Aqmolada «Baiköptıŋ üiı», «Baiköptıŋ atqorasy», «Baiköptıŋ dükenı» degen ataular ūmytylmai aitylyp keldı. Ätteŋ, kezınde onyŋ soŋyna tüsetın eşkım de bolmady, tüsırmedı de. Osy kezeŋderde onyŋ üiın būzu kezınde jerge kömılgen bır sandyq bankılık taŋbalanǧan kırpıştelgen altyndardyŋ şyǧuy, olardyŋ Mäskeudegı ortalyqqa jöneltılgenı turaly, baiaǧy avtomobil zauyty jobalary jaily jäne basqa da ısterdıŋ taǧdyry jönındegı aitar äŋgımelerdıŋ taqyryby bır basqa.

Al osy oraida aqmolalyq ūlty basqa aǧaiyndar, solarmen qatar ömır sürgen, kezınde qala basşysy bolǧan, 2-gildiia köpesı atanǧan M.Kubrin turaly, onyŋ osy qalaǧa, elge tigızgen eŋbegı jönınde būrqyratyp talai dünie jazdy. Tıptı Aqmola astana bolysymen-aq ony kökke köterıp, elorda ortasynan oiyp tūryp Kubrin köşesı atauyn da bergızdı. Al bız bolsaq bügınde bolaşaq astana üşın, qazaq halqy üşın qandai jaqsylyq ıstesem dep qiialmen emes, naqty ısımen eŋbek etken Qosşūǧylovtar jaily älı mardymdy eşteŋe aita alǧan emespız. Olardyŋ eŋbegınen qalǧan dünielerdı özımız qūrttyq. Bügınde olardyŋ sarǧaiǧan fotosuretınen basqa atap körseterlık ız de qalǧan joq. Qanşa desek te tek bailyǧymen ǧana emes, elın äleumettık-ekonomikalyq naqty ısımen körkeitıp, köteremın degen maqsatpen eŋbek etken progresşıl Qosşūǧylovtar turaly äŋgıme älı jalǧasyn taba beredı dep senemız.

Erlan KÜZEKBAI, jurnalist