Apta basynda Astanada «EKSPO-2017» halyqaralyq mamandandyrylǧan körme aiasynda Qaraǧandy oblysynyŋ mädeni künderı bastaldy. Öndırıstı ölkeden elordaǧa aimaq basşysy Erlan Qoşanov bastaǧan 1500-ge tarta adam keldı. Seisenbıde «Etnoauyl» ūlttyq-mädeni keşenınde oblys künderınıŋ aşylu saltanaty ötıp, ülken dumanǧa ūlasty.
Londondaǧy ataqty Gaid-parkte ötken tarihtaǧy alǧaşqy «EKSPO» körmesınen üş jyl būryn Qarqaraly jerınde Qoiandy järmeŋkesı aşylyp, ötken ǧasyrdyŋ otyzynşy jylyna deiın dürıldedı. Qaraǧandylyq öner ūjymdary sol järmeŋkenı jaŋǧyrtyp, jinalǧan qauymǧa onyŋ merekelık atmosferasyn sezındıre bıldı.
Kezınde būl järmeŋkede Bırjan saldan bastap, küi täŋırısı – Tättımbet, Maira Uäliqyzy syndy düldül önerpazdar öner körsettı. Solardyŋ qazırgı ızındei änşı Serjan Mūsaiyn «Bazaryŋ qūtty bolsyn, ardaqty elım, Qoiandy tu kötergen duman jerım» dep şyrqatyp, halyqtyŋ köŋılın bır köterıp tastady.
– Qoiandy järmeŋkesı tarih bolsa, «EKSPO-2017» körmesı – bügıngı künnıŋ aqiqaty, elımızdıŋ eren jemısı, bükıl älemdı auzyna qaratqan Elbasynyŋ tarihi şeşımı, bastamasy. Elbasy eŋbek jolyn bastaǧan Qaraǧandy öŋırı Prezidentımızdı bırınşı bolyp qoldap otyrady. «EKSPO» bastalǧaly üş aidyŋ ışınde 200 myŋnan astam qaraǧandylyq körmenı tamaşalady. Qaraǧandy – Qazaqstannyŋ industriialyq ortalyǧy ǧana emes, önerı örge jüzgen, ruhy biık aimaq. Öŋırde talai düldül önerpazdar, tarihi tūlǧalar ötken. Solardyŋ bügıngı jalǧasy – tanymal ärtısterdı, suretşıler, qol öner şeberlerı, sportşylardy äkelıp otyrmyz, – dedı Erlan Qoşanov.
Sol künı «Etnoauyldan» qazaqtan şyqqan tūŋǧyş ǧaryşker, Halyq qaharmany Toqtar Äubäkırov, osy märtebelı ataqqa ie Mūhtar Altynbaev siiaqty batyrlar, keşegı äigılı änşı jäne daŋqty sportşy, Olimpiada chempiony, bügıngı QR Parlamentı Mäjılısınıŋ deputattary Bekbolat Tıleuhan men Serık Säpiev, Qaraǧandy öŋırınen şyqqan özge de belgılı tūlǧalar tabyldy.
Sahnada Qydyrälı Bolmanov, Qaraqat Äbıldina än salyp, «Ūlytau» toby muzykalyq kompozisiialardy bebeulettı. «Qymyz» jäne «Bauyrsaq» festivalderı ūiymdastyryldy. «Öner közı – halyqta» atty merekelık folklorlyq baǧdarlama şeŋberınde Aqtoǧai audanynyŋ «Toqyrauyn tolqyndary» än-bi ansamblı, Q.Baijanov atyndaǧy konserttık bırlestıktıŋ «Arqa sazy» ansamblı, Qarqaraly audanynyŋ «Saltanat» halyq ansamblı, jaŋaarqalyq «Nazqoŋyr», Būqar jyrau audanynyŋ «Botaqara bauraiynda» ansamblı halyqtyŋ köŋılın köterdı.
«Bäiterek» alaŋy men qalanyŋ ortalyq alaŋynda Qaraǧandy, Balqaş, Jezqazǧan qalalarynyŋ önerpazdary än-küidı şalqytty. Qalleki teatrynda S.Seifullin atyndaǧy oblystyq drama teatry M.Äuezovtıŋ «Qaragöz» spektaklın qoidy. Bügın atalmyş mädeni oşaqtan osy öner ūjymynyŋ «Aiman–Şolpan» qoiylymyn jäne «Astana» konsert zalynan «Qaraǧandy oblysynyŋ mädenietı men önerı» körmesın tamaşalai alasyzdar.
Būǧan qosa, S.Qojamqūlov atyndaǧy Jezqazǧan sazdy-drama teatry, K.Stanislavskii atyndaǧy orys drama teatry, akademiialyq muzykalyq komediia teatry öz qoiylymdarymen keldı.
Keşe QR Ūlttyq akademiialyq kıtaphanasynda Qaraǧandy qalamgerlerımen kezdesu jäne kıtap oşaǧyna oblys äkımdıgınıŋ qoldauymen jaryq körgen «Saryarqa kıtaphanasy» seriiasynyŋ 100 tomdyǧy, Älihan Bökeihannyŋ şyǧarmalar jinaǧy, «Qaz dauysty Qazybek bi» atty ekı tomdyq basylymdy syiǧa tartu räsımı öttı. Onyŋ barysynda söz alǧan Qaraǧandy oblysynyŋ äkımı Erlan Qoşanov osy öŋırden şyqqan körnektı aqyn-jazuşylardyŋ esımderın jaŋǧyrtyp, taiauda Qazybek bidıŋ 350 jyldyǧy dürkırep toilanǧanyn eske saldy. Bidı ūlyqtau şarasy osymen aiaqtalmai, älı de jalǧasatynyn, sonyŋ ışınde derektı film tüsırılıp, ǧylymi-praktikalyq konferensiia ötetının jetkızdı.
Jazuşylar odaǧynyŋ Qaraǧandy oblystyq filialynyŋ töraǧasy, arqaly aqyn Serık Aqsūŋqarūly «Saryarqa kıtaphanasy» seriiasyn daiyndau barysymen tanystyryp, qazaqqa ortaq tūlǧalardy bır aimaqqa ǧana telu, olardyŋ mereitoilaryn tuǧan jerlerınde ǧana toilau ürdıske ainalǧany, būl dūrys emestıgı, eldık deŋgeide Astanada atalu kerektıgı jönınde maǧynaly äŋgıme örbıttı.
Belgılı jazuşy, Memlekettık syilyqtyŋ laureaty Aldan Smaiyl oblysta ruhaniiat salasynda atqarylyp otyrǧan oŋ ısterge toqtalyp, jastarǧa qalamgerlerdı tanytu maqsatynda öŋırdıŋ oqu oryndarynda «Saryarqa kıtaphanasy» seriiasy boiynşa kurs aşudy ūsynyp, Elbasy ūsynǧan «Tuǧan jer» baǧdarlamasy aiasynda ziialy qauymǧa aimaqty aralauǧa jaǧdai jasalsa, soǧan atsalysuǧa daiyn ekenın jetkızdı.Būl öte jaqsy ūsynys ekenın aitqan oblys basşysy aimaqta kielı jerler öte köp ekenın, solardy aralauǧa, özgelerge de aralatuǧa yqylasty ekenın, būl boiynşa jūmystar qolǧa alynatynyn sendırdı.
Sondai-aq, keşe EKSPO qalaşyǧyndaǧy amfiteatrda gala-konsert öttı. Oǧan Maqpal Jünısova, Bekbolat Tıleuhan, Qydyrälı Bolmanov, Qaraqat Äbıldina, «Ūlytau» toby, Bolat Qūsaiynov, Jämila Baspaqova, Erlan Kökeev jäne «K7» toby, Jan Tapin, Qairat Baekenov jäne «Format» toby qatysty.
Qaraǧandy oblysynyŋ mädeni künderı apta aiaǧy, 9 qyrküiekke deiın jalǧasady. Sonyŋ aiasynda älı de türlı konsertter, sporttyq oiyndar ūiymdastyrylady. Bır sözben aitqanda, öŋır önerpazdarynyŋ astanalyqtarǧa jäne qala qonaqtaryna ūsynar qyzyǧy köp.
Amanǧali QALJANOV
