Qūrmettı mūsylman qauym! Araǧa jyl salyp, küllı mūsylman ümmetınıŋ aŋsai kütken ūlyq merekesı – Qūrban aity da kelıp jettı. Aituly mereke biyl 4 qazan künı bastalmaq. Barşaŋyzdy Qazaqstan mūsylmandary dıni basqarmasy jäne «Nūr Astana» ortalyq meşıtı ūjymynyŋ atynan Qūrban ait merekesımen şyn jürekten qūttyqtaimyz!
Ait merekesın toilau
Būl merekede mūsylman qauymy juynyp-tazalanyp, taza jäne ädemı, jaŋa kiımderın kiıp, hoş iıs seuıp, meşıtte oqylatyn ait namazyna jiylady. Ait namazynan soŋ igı mūsylman qauymy bır-bırın ūlyq merekemen qūttyqtap, ızgı tılekterın aitady. Tūrmysy tömen kısılerge kömek retınde sadaqasyn beredı. Būl künderı köŋıl sergıtetın oiyn-sauyqqa tyiym salynbaidy, alaida, şariǧat şeŋberınen şyqqan daraqylyqqa jol berılmeitının qaperde ūstaǧanymyz abzal. Mınäjatpen bastalǧan mübärak mereke barlyq sän-saltanatymen imandylyq dumanyna ūlasady. Al elordamyzdaǧy meşıtterde ait namazy taŋǧy saǧat 08.00-de oqylady.
Osy oraida aita ketkenımız jön bolar, mūsylman qauymynyŋ mübärak ekı ait merekesınıŋ – Oraza aity men Qūrban aitynyŋ özgeşe tūstary bar. Mäselen, oraza aitynda taŋerteŋ ait namazyna qūrma sekıldı jeŋıl taǧamdardan däm tatyp şyǧu dūrys bolyp eseptelse, qūrban aitynda när tatpai şyqqan abzalyraq. Mūnyŋ sebebı, ardaqty paiǧambarymyz Mūhammed (s.a.s.) sol küngı orazasyn jaŋa soiylǧan qūrban etımen aşqandy qūp sanaǧan. Sonymen qatar, Oraza aitta pıtır sadaqasy berılse, Qūrban aitta jai sadaqa berıledı. Arafa – Qūrban aitqa bailanysty kün. Öitkenı, qajylar sol künı qajylyqtyŋ eŋ basty şarty bolyp esepteletın «arafat uaqfasyn» oryndau üşın Arafat tauynda belgılı bır uaqyt tūrady. Arafa künı taŋǧy namazdan bastap, Qūrban aittyŋ törtınşı künınıŋ asyr namazyna deiın ärbır paryz namazynan keiın «taşriq täkbırlerı» aitylady.
Täkbır täşriq
Arafa künı taŋ namazynyŋ paryzynan keiın bastalyp, Qūrban aittyŋ törtınşı künı ekıntı uaqytyna deiıngı bolatyn ärbır paryz namazdyŋ soŋynan myna dūǧany oqu uäjıp bolyp tabylady:
«Allaahu äkbar, Allaahu äkbar, lää iläähä illallaahu uallaahu äkbar, Allaahu äkbar ua lillaahil-hamd».
Biyl Arafa künı 3 qazanǧa säikes kelıp otyr. Demek, 3 qazan künı taŋ namazynyŋ paryzynan keiın bastalǧan täkbır täşriq, 7 qazan künı ekıntı namazynan soŋ toqtatylady.
Süiıktı amal – qūrban şalu
Qūrban ait merekesınde mümkındıgı bar ärbır mūsylman balasy Alla taǧalanyŋ rizaşylyǧy üşın qūrbandyq şaluy tiıs. Tıptı, Alla Elşısı (s.a.s.): «Kımde-kım dünie-mülkı mol bola tūra qūrban şalmasa, bızdıŋ meşıtımızge jaqyndamasyn» dep qataŋ eskertken. Sondyqtan qorada malyŋyz, iaki, qaltaŋyzda qarajatyŋyz bolsa, saraŋdyqqa salynbai, Alla jolynda malyŋyzdy qūrban etıp, mūqtaj jandarǧa ülestırıp bergeisız.
Būl ǧibadat – Qūrban ait namazynan keiın aittyŋ üş künınde oryndalady. Süiıktı paiǧambarymyz (s.a.s.) merekenıŋ bastaluy men qūrban şaludyŋ uaqytyna qatysty: «Bızdıŋ būl künde alǧaşqy atqaratyn ısımız – namaz oqu, sosyn qaityp kelıp, qūrbandyq şalu. Kımde-kım osylai etse, bızdıŋ sünnetımızge ergenı. Al kımde-kım būdan būryn qūrbandyǧyn şalatyn bolsa, būl qūrbanynyŋ otbasyna berılgen etten aiyrmaşylyǧy joq. Mūnyŋ qūrban boluy mümkın emes» degen.
Tört tülık maldan tek qana qoi, eşkı, siyr jäne tüie ǧana qūrbandyqqa şalynady. Qoi men eşkı bır jasqa, siyr ekı jasqa, tüie bes jasqa toluy kerek. Alty aidan asqan toqtynyŋ syrtqy körınısı qomaqty bolsa, qūrbandyqqa jaraidy. Al, eşkı mındettı türde bır jasqa toluy kerek. Qoi men eşkı bır kısı atynan qūrban etıledı. Al, siyr men tüienı bır adamnan jetı adamǧa deiın bırıgıp qūrban etıp şala alady.
Qūrbandyq qalai şalynady?
Eŋ aldymen qūrbandyq maly sol jaǧymen qūbylaǧa qaratyp jatqyzylady. Sosyn bauyzdaityn kısı «Bismilläähi Allaahu äkbar» dep aitady. Maldy iegınıŋ astynan öŋeşın, keŋırdegın jäne küre tamyrlaryn kese otyryp bauyzdaidy. Maldyŋ jany şyqpastan basyn kesıp alu jäne terısın alu – mäkruh amal. Maldy bauyzdap jatqanda «Bismilläh» sözın ädeiı aitpai qoisa, ol maldyŋ etın jeuge bolmaidy.
Etı kımge taratylady jäne terısın paidalanuǧa bola ma?
Qūranda «Haj» süresınıŋ 28-aiatynda: «Qūrbannyŋ etınen özderıŋ jeŋder ärı mıskınder men kedeilerge jegızıŋder» delıngen. Demek, qūrbandyqqa şalynǧan maldyŋ etınen özı jäne özgeler de jei alady. Dūrysy, būl mäselede paiǧambarymyzdyŋ ösietın basşylyqqa alyp, qūrban etın üşke bölıp, bır bölıgın mūqtaj jandarǧa, ekınşı bölıgın tuǧan-tuystaryŋyz nemese körşılerge, al qalǧan bölıgın öz otbasyna alyp qalǧan jön. Sondai-aq, «barlyǧyn Alla jolynda atadym» dep qūrban etın tügeldei tūrmysy tömen jandarǧa taratyp beruge de bolady. Al, qūrban şaluşy adam soiylǧan maldyŋ terısın paidalana almaidy jäne qasapşyǧa aqy retınde de beruıne bolmaidy. Terısı sadaqa retınde berıluı tiıs.
«Jeteudıŋ bırı bol da, Rabbyŋ üşın Qūrban şal!» aksiiasyna bırge qatysaiyq
Qūrmettı jamaǧat! Biylǧy Qūrban ait merekesınıŋ qūrmetıne Astana meşıtterınıŋ ūiymdastyruymen «Jeteudıŋ bırı bol da, Rabbyŋ üşın Qūrban şal!» qaiyrymdylyq şarasy ötedı. Qūrbandyq etterı Astana qalasyndaǧy mūqtaj jandarǧa taratylady. Qūrban şaluǧa jaǧdaiy jetetın barşa mūsylman bauyrlarymyzdy şaraǧa atsalysuǧa şaqyramyz! Sızdıŋ kömegıŋız özgege quanyş syilaitynyn ūmytpaŋyz!
İslam dını – tazalyqty tu etken dın. Sondyqtan ūlyq mereke qarsaŋynda qaladaǧy köp qabatty tūrǧyn üi aulalary men köşe boilarynda tazalyqty saqtau maqsatynda qūrban şalu räsımın arnauly oryndarda ǧana atqaruǧa şaqyramyz.
Jaratqan İemız qūlşylyqtaryŋyzdy qabyl etıp, maqsat-mūrattaryŋyzdy asyl etkei! Qasiettı oryndarda qajylyq paryzdaryn öteu üşın jolǧa şyqqan bauyrlarymyzǧa dın aman elge oraludy jazǧai! Alla taǧala küllı mūsylman ümmetın jarylqap, asyl dınımız islamǧa küş-quat bergei! Qūrban ait merekesı qūtty bolyp, şalǧan qūrbandyqtaryŋyz qabyl bolsyn! Ämin!
NE? QAIDA? QAŞAN?
4.10
- Qūrban ait namazynan keiın «Nūr Astana», «Äzıret Sūltan» meşıtterınıŋ aulasynda jalpy jūrtşylyqqa arnalǧan merekelık järmeŋke ūiymdastyrylady;
- Saǧat 14.00-de «Äzıret Sūltan» meşıtınıŋ aulasynda sporttyq oiyndar saiysy ötedı.
5.10
- Saǧat 16:00-18:00 aralyǧynda «Nūr Astana» ortalyq meşıtınıŋ ūiymdastyruymen «Hanşatyr» sauda oiyn-sauyq ortalyǧynda «Qūrban ait qūtty bolsyn!» atty merekelık konsertı;
- Astana meşıtterınıŋ ūiymdastyruymen «Jeteudıŋ bırı bol da, Rabbyŋ üşınqūrban şal!» qaiyrymdylyq aksiiasy «Altyn taǧa» mal bazarynda ötedı;
- «Äs-Sälam» meşıtınde jalpy jamaǧatqa merekelık dastarqan jaiylady.
4-6.10
- Astana meşıtterınıŋ qyzmetkerlerıqaladaǧy mūqtaj jandardyŋ üilerıne arnaiy baryp, ait merekesımen qūttyqtap, azyq-tülık jäne qūrbandyq etterın taratady;
- Auruhanalardaǧy syrqat jandardyŋ köŋılın sūrap, aittyq syilyqtar tartu etıledı;
- «Qaiyrymdy, ızgı kısı kögerer, ızgı kısı – halyq jügın köterer» atty respublikalyq aksiia aiasynda qala meşıtterınıŋ qyzmetkerlerı Astana äkımdıgımen bırlese otyryp, qūrbandyq etterın mūqtaj jandarǧa ülestıredı;
- 6 qazanda S.Ǧylmani jäne Şeih Künta qajy meşıtterınıŋ ūiymdastyruymen Astana qalasyndaǧyQarttarüiınde «Qarttarym – asyl qazynam» degen atpen merekelık ruhani keş ötedı;
- «Nūr Astana» ortalyq meşıtınde jamaǧat arasynda Qūrban ait merekesıne arnalǧan sūraq-jauap saiysy ötedı.
Nauryzbai qajy Taǧanūly,
«Nūr Astana» ortalyq meşıtınıŋ bas imamy
