Reseide ötıp jatqan futboldan älem chempionaty märenıŋ dürbı jolyna tüsken kezde de sensasiiadan kende bolyp jatqan joq. Sonyŋ bırın şıldenıŋ 12-sı künı Mäskeude oinalǧan ekınşı jartylai finaldyq kezdesude jasaǧan Horvatiia qūramasy Angliianyŋ bas komandasyn 2:1 etıp ūtyp, finalǧa şyqty. Söitıp, būdan tura 20 jyl būryn jartylai finalda küş synasqanyn maqtanyş körıp jürgen qūrama altyn medal üşın talasa alatyn därejege de jettı.
Osymen horvattar älem chempionaty tarihynda qatarynan üş oiynda plei-off arqyly jeŋıske jetıp, jarys jolyn jalǧastyrǧan tūŋǧyş komanda atandy. Al aǧylşyndar törtınşı märte älem jäne qūrlyq chempionattarynyŋ jartylai finalynda ūtylyp qalyp otyr.
Kezdesudegı bırınşı goldy 5-minutta aǧylşyndar saldy. Ony qaqpadan 16 metr jerde belgılengen aiyp dobyn ūrǧan Kiran Tripper tüsırdı. Aǧylşyndardyŋ qorǧauşysy dopty «qabyrǧalyq qorǧannyŋ» üstınen asyryp tastau arqyly torǧa süŋgıttı. Alaida aǧylşyndar būdan keiın şabuyldy örıstetıp, eseptı ūlǧaituǧa onşalyqty qūlyqty bola qoimady. Olardyŋ sapyndaǧy üzdık mergen Garri Keinnıŋ qaqpanyŋ däl tübınde tūryp, ony torǧa baǧyttai almai qaluyn osymen ǧana tüsındıruge bolar.
Mūnyŋ esesıne, horvattar osydan keiın dür sılkındı. Jappai alǧa ūmtylǧan olar būryştama bere bastady. Degenmen, būl şabuyldardyŋ betın qaitarǧan britaniialyqtar bır kezde qaitadan atqa qondy. Olar 3 minutta ekı būryştama berıp ülgerdı. Ekeuınde de qaqpaǧa tura soqqy jasaldy, ekeuın de Garri Maguair ūrdy.
Aǧylşyndar qaitadan alaŋ üstındegı üstemdıgın qalpyna keltırdı. Bıraq 19-minutta horvat İvan Perişich olardy bır sılkındırıp tastady. Onyŋ tepken doby sol jaq baǧan janynan zu ettı. Sosyn Maguair onyŋ äreketın qaitalady. Al 22-minutta qaqpaşy Daniel Subaşich gol jıberıp ala jazdady. Ol dopty İvan Strinichke tastady. Strinich bolsa, aiaq astynan ony britaniialyq Rahim Sterlingke berıp aldy. Būdan ärı dop alǧan Kein oiynnan tys qalyp qana qaqpa aman saqtaldy.
Angliia qūramasynyŋ oiynşylary ekınşı taimda osy artyqşylyqty öz qoldarynan berıp qoidy. Olar oiyn bastalmai jatyp, aşyqtan-aşyq uaqytty sozuǧa köşıp kettı. Būl kezde tartys negızınen alaŋ ortasynda öte bastady. Bır sät Ante Rebich sol qaptaldan qaqpaǧa şüilıgıp keldı. Bıraq ony qauıptı nüktege kelgenınde Kail Uoker toqtatty. Būdan keiın, 56-minutta Tripper alystan dop ūrdy. Onysy Deian Lovrenge tiıp, būryştamaǧa kettı. Būdan ärı «şarşy şaşaqtylar» qarqyndy kürt arttyryp, aǧylşyndar qorǧanysy maŋynda būlt qoiulana berdı. 58-minutta Luka Modrich qarsy qaqpa alaŋyna äueletıp dop jetkızdı. Ony golkiper Djordan Pikford jūdyryǧymen qaǧyp qaitardy. Arada 10 minut ötkende, osy şabuyldar aqyry golǧa ainaldy. Aldymen oŋ qanattan Şime Vrsalko bergen pasqa Perişich jettı. Ol Tripper men Uokerdıŋ tu syrtynan sekırıp, ketıp bara jatqan dopty qaqpaǧa baǧyttai bıldı. Gol!
Ekı jaqty qanşa şabuyl jasalǧanymen, tablodaǧy esep negızgı uaqytta özgere qoimady. Sondyqtan over-taimǧa kezek berıldı. Mūnda da horvattardyŋ şalttyǧy baiqaldy. Olar jeŋıs dobyn 109-minutta saldy. Būl joly Mario Mandjukich erledı. Äuelı Perişich dop alyp, ony qaitadan Mandjukichke syrǧytty. Sol kezde qasyndaǧy Djon Stounstan sytylyp şyqqan forvard qaqpanyŋ alys būryşyna jerletıp teuıp, tordan bır-aq şyǧardy. Aǧylşyndar osydan keiın bıraz yşqyndy. Bıraq horvattar olardyŋ erkın kösılıp, qausyra şabuyl jasaularyna jol bermedı. Söitıp, turnir bastalǧaly özın qūryştai qūiylǧandai etıp körsetıp kele jatqan Horvatiia qūramasy aqtyq synǧa joldama aldy.
Bügın Sankt-Peterburgte Belgiia – Angliia qūramalary 3-oryndy sarapqa salsa, erteŋ Mäskeude Fransiia – Horvatiia komandalary chempiondyq ataq üşın talasady.
