Ötken jeksenbıde «Jastar» saraiynyŋ aldyndaǧy alaŋda tatar-başqūrt aǧaiyndar «sabantui» ötkızdı.
2002 jyldan berı IýNESKO-nyŋ mädeni mūrasynyŋ tızımıne engen būqaralyq mereke elordalyqtardyŋ da jyl saiyn bas qosatyn dästürlı jiynyna ainaldy. Merekenıŋ aşylu saltanatynda Astana qalasy äkımınıŋ orynbasary Ermek Amanşaev qala tūrǧyndardy qūttyqtap, etnomädeni bırlestıkterdıŋ ökılderıne yntymaqtylyǧy, elordada jäne elımızde beibıtşılık pen kelısımdı damytuǧa eleulı üles qosqany üşın rizaşylyǧyn bıldırdı.
Sondai-aq, Qazaqstan Respublikasyndaǧy Tatarstan Respublikasynyŋ Ökılettı ökıldıgı, Resei Federasiiasynyŋ Elşılıgı, Qazaqstan halqy Assambleiasynyŋ ökılderı de jyly lebızderın jetkızdı. Qonaqtar dästür boiynşa syi-siiapattaryn jasap, etnomädeni ortalyqtarynyŋ belsendı müşelerın marapattady.
Osy toida QR Eŋbek sıŋırgen qairatkerı, Tatarstannyŋ halyq suretşısı, Qazaqstan körkem öner akademiiasynyŋ akademigı Kamil Mullaşevty kezdestırdık. Belgılı suretşı elımızdıŋ täuelsızdıgınıŋ 25 jyldyǧyna arnalǧan körmesın daiyndap jatqanyn aitty.
Jalpy, «Sabantui» – dihandar merekesı. «Saban» tatarşa «soqa» degen sözdı bıldıredı. Erte köktemnen egın salyp, jer öŋdegen egınşılerdıŋ säl tynystaǧan sätı osylaişa merekege ūlasypty. Jyldar öte kele būl toi alǧaşqy ūǧymynan asyp tüsıp, tatar-başqūrttyŋ ūlttyq dästürı men mädenietınen habardar etetın, sol qazynany jarqyratyp şyǧaratyn halyqtyŋ ūlyq merekesıne ainalady. Sodan da bolar, būl künı bükıl elordalyq tatar-başqūrttar bas qosyp, etnomädeni ortalyqtary ökılderınıŋ önerın tamaşalady. Önerpazdardyŋ teatrlanǧan körınısterı merekege män berdı. Sauyqqa jinalǧandar garmonnan tögılgen sazǧa qosylyp, bi bilep demalystyŋ şyraiyn keltırdı. Būl mereke būqaralyq oiyndarymen de tartymdy. Oiynşyl qauym arqan tartyp, iınaǧaşpen su tasyp, qappen de sekırıp oinady. Azamattar bılek küşımen synasyp, gır köterıp te kördı. Sondai-aq, paluandar «Köräş» ūlttyq küresınen baq talastyrdy. Ädılqazylar jeŋımpaz jampozǧa jüldege bailanǧan qoidy jetektetıp jıberdı. Säbiler üşın arnaiy jasalǧan «Äkiiat» ertegı alaŋynda türlı şaralar ūiymdastyrylyp, baldyrǧandardyŋ da köŋılın köterdı.
«Astanada ötetın merekege qala tūrǧyndarymen qatar, elımızdıŋ özge öŋırlerındegı tatar-başqūrt etnomädeni ortalyqtarynyŋ ökılderı men öner ūjymdary keldı. Qazan qalasynan artister kelıp öner körsettı. Halyqtyŋ tuǧan tılın, töl mädenietın, kışıpeiıldıgı men qonaqjailylyǧyn saqtauǧa degen talpynysy men türlı ūlt pen dın ökılderınıŋ basyn qosatyn saltanatymen de erekşelenetın meiramdy keŋ kölemde atap ötuıne eŋ bastysy, qala äkımdıgı tarpynan qoldau körsetılıp otyr» deidı «Taŋ» tatar-başqūrt etnomädeni bırlestıgınıŋ jetekşısı Rafik Valiev.
Aigül UAISOVA
