Şerude şep qūratyn äskerdıŋ erte qamdanyp, bas qalada bas qūraǧandaryna ekı aidai uaqyt boldy. Şahar şetınde jaiǧasqan jauyngerler auylynyŋ şypyrlaǧan şatyrlary alystan közge ūrady. Al qalyŋ qoldyŋ qadamdarynyŋ dübırı qara körınım jerden qūlaqqa anyq estıledı.Qalam-qaǧazymyz ben fotoapparatymyzdy sailap, eleŋ-alaŋnan erte kelgen bız äskeri şeruşılerdıŋ şekarasyna engennen soŋ, bırden pärmendı dauys estılgen aimaqqa qarai bet aldyq.
Daiyndyq alaŋyndaǧy şeptıŋ aldyŋǧy qataryn S.Nūrmaǧambetov atyndaǧy «Jas ūlan» respublikalyq mektebınıŋ ūlandarynan jasaqtalǧan barabanşylar bastap jürdı. «Astana» öŋırlık qolbasşylyǧy äskerlerınıŋ qolbasşysy Qaidar Qaraqūlovtyŋ aituynşa, biyl paradqa jasūlandyqtarmen qatar, basqa da äskeri oqu oryndarynyŋ, äskeri-patriottyq klubtardyŋ tärbielenuşılerı jäne äskeri-tehnikalyq mektepterdıŋ oquşylary qatysady.
Jalpy elımızdıŋ Qaruly Küşterınıŋ quatyn körsetetın paradta 5 myŋnan asa sarbaz sap tüzeidı. Olardyŋ qatarynda ofiserler, kelısımşart boiynşa qyzmet etetın äskeriler, merzımdı äskeri qyzmet jauyngerlerı jäne äskeri oqu oryndarynyŋ kursanttary bar. Sarbazdardyŋ bärı şamamen 30 jaiau äsker paradtyq eseptop qūramynda saltanatty marşpen jürıp ötedı. Oǧan qosa, 300-ge tarta äskeri tehnika men 80-ge juyq ūşu apparatyn tamaşalaimyz.
Özın Öskemen garnizony 27943 äskeri bölımınıŋ qatardaǧy jauyngerı Mūhamedin Seiıtkenov dep tanystyrǧan sarbaz äskerge kelgenıne jarty jyldai uaqyt bolǧanyn, Qaruly Küşterdıŋ qūrylǧanyna 25 jyl toluymen tūspa-tūs keletın paradqa qatysatynyn maqtanyş tūtatynyn, daiyndyq jūmystary öte jaqsy ūiymdastyrylǧanyn, tamaqtarynyŋ köŋılderınen şyǧatynyn aityp berdı.Bız barǧan künı aua raiynyŋ qolaisyzdyǧynan jattyǧu jūmystary tüske deiın jalǧasty. Negızı eseptoptar künıne 8-9 ainalym jasap, qadamdaryn nyqtaidy. Olardyŋ qatarynda näzık jandy äskeriler de bar.
– Men äielderden qūralǧan topty bastap jüremın. Būl joly paradqa jalpy 154 äiel qatysady. Rezervte taǧy 10 adam bar. Olardyŋ bärı ärtürlı äskeri qūrylymdardan ırıktelınıp alyndy. Özım de şeruge bırınşı ret qatysqaly tūrmyn. Sondyqtan daiyndyq jūmystaryna erekşe ekpınmen kırısıp jürmın, – dedı podpolkovnik Amangül Aldabergenova.
Dalalyq lagerde 250-den astam şatyr tıgılgen. Olardyŋ ärqaisysyna 40 sarbazdan syiady. Būǧan qosa, 12 şatyr tamaqtanu orny üşın jasaqtalǧan. Azyq-tülık bölımıne jauapty Nūrlan Şaqaşovtyŋ aituynşa, ashanalar 15 nauryzdan bastap qūryla bastapty. Būl jolǧy äskeri şeruge elorda äkımdıgınıŋ qaulysymen 8 säuır men 8 mamyr aralyǧynda Astana qalasynyŋ 50 aumaqtyq qorǧanys brigadasy şaqyryldy. Olardyŋ bärı paradqa alǧaş ret qatysqaly otyr.
Dulat Adyrbekov, Qūrlyq äskerlerı bas qolbasşysynyŋ tärbie jäne ideologiialyq jūmystar jönındegı orynbasary, polkovnik:
– Äskeri şerude basty maqsatymyz – Qaruly Küşterdıŋ 25 jylda qalai damyǧanyn, elımızdıŋ täuelsızdıgı men jerımızdıŋ tūtastyǧyn qorǧauda bızge jüktelgen mındetterdı oryndai alatynymyzdy körsetu. Paradqa qatysu üşın taŋdauly qyzmetşıler, bölımder men bölımşeler ırıktelınıp alyndy. Sonymen qatar, şerude Qaruly Küşterdıŋ qūryluynyŋ basynda jürgen ardagerler de qatysady.
Dästür boiynşa alaŋnan 5000-nan asa adam jäne 300-den astam tehnika jürıp ötedı. Sondai-aq, Astana aspanynan äue paradyn da tamaşalaimyz. Biylǧy äskeri şerudıŋ erekşelıgı – qatysuşylar sanynyŋ artuynda. Būl – būryn bolmaǧan jeke qūram men tehnikanyŋ rekordtyq körsetkışı.
Qaidar Qaraqūlov, «Astana» öŋırlık qolbasşylyǧy äskerlerınıŋ qolbasşysy, polkovnik:
– Äskeri paradqa daiyndyq säuır aiy nan bastaldy. Dalalyq lagerge 250-den astam şatyr ornalasqan. Onda 4 myŋnan asa adam tūryp jatyr. Jalpy daiyndyq 18 nauryzdan bastaldy. 27 nauryzdan bastap negızgı qūramdar kele bastady. Tehnikalardy da osy uaqyttan bastap aldyrtyp, soŋy 3 säuırde keldı. Qazır sarbazdar daiyndyq alaŋynda tüske deiın 3 saǧat, tüsten keiın 3 saǧat uaqyt ötkızıp, saptyq jürısterın naqtylap jatyr.
Orynbek ÖTEMŪRAT
