Astana qalasy mäslihatynyŋ deputattary jaŋadan salynǧan «Sana» oquşylar saraiyn aralap kördı. Oquşylar saraiynda 50-den astam üiırme jūmys ısteidı. Ortalyq jobalyq quaty boiynşa bır mezgılde saǧatyna 700 oquşyny qabyldai alady.
«Sana» jaŋa ūrpaq ortalyǧy – mektep oquşylaryna qosymşa bılım beruge, önerge bauluǧa arnalǧan nysan. Biık ärı sändı ǧimarat zamanaui tehnologiialarmen, sapaly qūrylys materialdarymen boi köterıp, barlyq qajettı qūral-jabdyqpen jasaqtalǧan.
– Qūrylysy aiaqtaluǧa taiau ortalyqtyŋ resmi aşyluy 1 qyrküiekte bolmaq. Bes qabatty ǧimarat 7 aida salynyp bıttı. Soŋǧy 2 aida jöndeu jūmystary jürgızıldı. Biudjetı 5 mlrd teŋgenı qūrady. Kölemı – 7 500 şarşy metr. Jobalyq quaty boiynşa bır mezgılde saǧatyna 700 oquşyny qabyldai alady. Būl – memlekettık mekeme emes, jekemenşık mekeme, – dedı «Sana» jaŋa ūrpaq ortalyǧynyŋ direktory Janserık Sattar.
Ortalyq jyl boiy qyzmet körsetetın bolady. Degenmen, öz jūmysyn mektepterdıŋ oqu kestesımen bailanysta jürgızetındıkten, ortalyqtyŋ jūmysy turaly jarnamalar taratu, kurstar men üiırmelerge qabyldau jūmystary äzırge bastalǧan joq. Ortalyqtyŋ äkımşılık direktory Äsel Bılälovanyŋ aituynşa, mūndaǧy qosymşa sabaqtar aqyly. Mysaly, oquşy basseinde jattyqtyruşymen bırge aiyna 8 ret sabaqqa qatysatyn bolsa, onyŋ qūny 20 myŋ teŋge boluy mümkın.
Oquşylar saraiynda 56 baǧyt boiynşa 50-den astam üiırme qyzmet körsetpek. Negızgı baǧyttar – äleumettık ǧylymdar, qolöner, beineleu, muzyka jäne bi önerı
Oquşylar saraiynda 56 baǧyt boiynşa 50-den astam üiırme qyzmet körsetpek. Negızgı baǧyttar – äleumettık ǧylymdar, qolöner, beineleu, muzyka jäne bi önerı. Sabaq uaqyttary ärtürlı. 50, 60, 80 minut boluy mümkın.
– Ortalyqta därıs beretın mūǧalımderdıŋ 99 paiyzy jinaqtaldy. 1 qyrküiekten bastap tolyq qūram jūmys ısteitın bolady. Üiırme jūmystary balanyŋ qabıletıne qarai ūiymdastyrylady. Bır bala baǧdarlama jasauǧa beiım boluy mümkın, bır bala qūrastyruǧa ikemdı boluy mümkın, mūnyŋ bärı eskerıledı. Oquşy özı beiımdelıp jatqan sala boiynşa jas erekşelıgıne qarai eŋ tömengı deŋgeiden joǧary deŋgeige deiın şyŋdala bermek. Mysaly, tehnologiialar kursynda bala äuelı tehnikanyŋ qūrylysymen tanysady, bırte-bırte robotpen jūmys ısteuge deiın jattyǧady. Äleumettık ǧylymdar baǧyty, tıl, biznestıŋ älıppesıne üiretuden bastap edık, keiın ata-analar sūranysy boiynşa matematikany da qostyq. Mūnda sondai-aq zamanui jurnalistika daǧdylaryna üiretu kursy da bar, – deidı ortalyqtyŋ bılım jäne tärbie bölımınıŋ jetekşısı Qazbek Elubaiūly.
Onyŋ aituynşa, tamyz aiynda osy ortalyqta halyqaralyq olimpiada ötkızu josparlanyp jatyr. Balalarǧa jeŋıl tamaqtanuǧa mümkındık jasalǧan, al ata-analar üşın balasyn kütıp otyratyn oryn jasaqtalǧan, tıptı olardyŋ kışkentai büldırşınderıne motorikalaryn damytatyn bölme de oilastyrylǧan.
Osyǧan orai ortalyqtaǧy üiırmelerdı aralap, olardyŋ jūmysymen tanysqan deputattardyŋ pıkırın de bılgen edık.
– Mūndai ortalyqty Astanada bırınşı ret körıp tūrmyn. Jaqsy joba. Balalar osyndai oryndardan qosymşa bılım alatyn bolsa, bolaşaqta öndırıste, energetikada, aviasiiada jetıspei jatqan mamandardyŋ qataryn tolyqtyrar edı. Bolaşaq bılıktı maman üşın öz ısınıŋ älıppesın osy jerden bastap üirenuge tolyq jaǧdai jasalǧan. Bärı bar, tek ynta bolsa bolǧany. Keŋes kezınde öndırıstık oqu kombinatyna qatysqan bolatynbyz. Onda jürgızuşı, sylaqşy, metall jonuşy siiaqty qosymşa mamandyqtardy oqyp şyqqanbyz. Söitıp, mektepten qosymşa mamandyqqa ikemdeletın. Būl jastardyŋ ömırıne de, mekemege de kerek bolady, – dedı mäslihat deputaty Ǧabit Täjımūratov.
– Bügın käsıpker, mesenat Abzal Saǧymbaev mynadai ülken ǧimarat aşyp jatyr. Balalarǧa arnalǧan öte ädemı, sapaly salynǧan eken. Osyndai ǧimarattar köbeie bergenı dūrys dep oilaimyn. Öitkenı million jarymǧa jaqyn tūrǧyny bar elorda üşın mūndai ortalyqtar älı de kerek, – dedı Astana qalalyq mäslihaty töraǧasynyŋ mındetın atqaruşy Asqar Smaǧūlov.
