«Şabyt» şuaǧy

Keşe Astanada «Şabyt» şyǧarmaşyl jastardyŋ HHI halyqaralyq festivalınıŋ jabylu saltanaty öttı. Bes kün boiy konkursanttar «Klassikalyq muzyka», «Halyq muzykasy», «Estradalyq vokal», «Horeografiia» jäne «Jurnalistika» atalymdarynda öner jarystyrdy. Soŋǧy atalymda ärıptesterımız de biıkten körındı. «Astana aqşamy» gazetınıŋ şoluşysy Gülmira Aimaǧanbet üşınşı oryndy, «Elorda.info» saitynyŋ tılşısı Ainūr Şoşaeva «Sputnik» halyqaralyq aqparat agenttıgı jäne radiosynyŋ arnaiy syilyǧyn ielendı.

«Telejurnalistika» (jaŋalyqtar siujetterı, baǧdarlama siujetterı men derektı filmder) jäne «İnternet resurs­tar» atty ışınara seksiia­laryna bölıngen «Jurnalistika» atalymyna kelıp tüsken materialdar şart boiynşa Astananyŋ 20 jyldyǧyna jäne qalanyŋ damuyna, bügıngı tynys-tırşılıgıne arnaldy. Mūnda Şerhan Mūrtaza atyndaǧy arnaiy jüldenı Dinara Tıleubek («Aiqyn» gazetı), ekınşı oryndy Aigözel Qadyr («Sputnik» halyqaralyq aqparat agenttıgı), al bırınşı oryndy Nazerke Jūmabai («Egemen Qazaqstan» gazetı) aldy. Telejurnalister arasynda Asylbek Toibek (Qaraǧandy oblystyq «Saryarqa» telearnasy), Dulat Äbibullaev («Qazaqstan» ūlttyq arnasy), Limara Udasova («Profi S Agensy» kompaniiasy) jäne Laura Baipatchanova («Habar» telearnasy) top jardy. Al būl atalymdaǧy bas jüldenı Nartai Särsenǧaliev («Qazaqstan» ūlttyq arnasy) jeŋıp aldy.
«Halyq muzykasy» atalymy qobyz, prima qobyz, prima dombyra, şerter, bas şerter seksiialary­nan qūraldy. Baiqau qorytyndysy boiynşa Şolpan Şarapatova üzdık qobyzşy atanyp, gran-pri aldy. Al Mädina Tıleubaeva bırınşı oryndy ielendı.
Prima dombyra, şerter, bas şerter seksiiasynda bas jülde Ädılhan Godjanovqa būiyrdy. Baian Myrzabekova jäne Qazannan kelgen Vera Ledianina bırınşı oryndy bölıstı.
«Prima qobyz» seksiia­synda qazylar alqasy Aiym Meiırhanovany jeŋımpaz dep tanydy, al bırınşı oryn Aida Äbduǧalige berıldı. Dosymjan Tezekbaev jäne Düisenbek Tolymbekov atyndaǧy arnaiy jüldeler iegerlerın tapty.
238 bişınıŋ basyn qosqan «Horeografiia» atalymy halyq bilerıne negızdeldı. Mūnda qazylar alqasynyŋ bırauyzdan qabyldaǧan şeşımımen astanalyq «Naz» bi teatryna bas jülde tapsyryldy. Bırınşı oryndy Soltüstık Qazaqstan oblysynyŋ «Mäŋgılık» ansamblı jäne jergılıktı «Şalqyma» bi ansamblınıŋ ärtısı Aisūlu Mūratqalieva bölıstı. Osy atalymda Şara Jienqūlova atyndaǧy arnaiy jülde iegerı de anyqtaldy.

«Estradalyq vokal» atalymyna qatysqan 117 ümıtkerden astanalyq Ahmet Sūltan bas jülde aldy. Mūnda bırınşı oryn türkıstandyq Erık Tölenovke berıldı.
«Klassikalyq muzyka» atalymyna qatysuşylar aǧaş jäne mys ürmelı aspaptar, soqpaly aspaptar jäne kameralyq ansamblder seksiialaryna bölındı.
Meiırjan Keŋesbaev, Aiia Ǧabbasova, Leonid Mysovskii, Baǧjan Esırkep syndy muzykanttardan qūralǧan kvartet üzdık kameralyq ansambl bolyp tanylyp, bas jülde ielendı. Būl seksiiada «Sardor» ışektı aspaptar kvartetı bırınşı oryn aldy.
«Mys ürmelı aspaptar» seksiiasynda Azat Äbılqasymov top jardy. Aǧaş aspaptarda oinauda Tılek Däuıtqan men Vladimir Ardaşev köş bastady. «Soqpaly aspapta» Arys­tan Äbıldin gran-pri ielense, bırınşı oryn Hudoibergan Bahromovqa būiyrdy.
«Aǧaş ürmelı aspaptar» atalymynda bas jülde alǧan goboişy İslam Äliev osy festivaldıŋ eŋ üzdıgı bolyp tanylyp, Qazaqstan Respublikasy Prezidentınıŋ kubogyn ielendı. Kubokty oǧan Astana äkımınıŋ orynbasary Ermek Amanşaev tapsyrdy.

Jalpy biylǧy baiqauǧa qatysuǧa 613 adam niet tanytty. Olardyŋ basym bölıgı Astananyŋ atynan qatysty. Qatysuşylardyŋ arasynda elımızdıŋ daryndy jastarymen qatar Äzerbaijan, Belarus, Gruziia, İzrail, Qyrǧyzstan, Resei, Ukraina jäne Özbekstan memleketterınıŋ önerpazdary boldy. Bas jülde iegerlerıne – 350 myŋ teŋge, bırınşı oryn alǧandarǧa – 300 myŋ teŋge, ekınşı oryn üşın – 250 myŋ teŋge jäne üşınşı orynǧa 200 myŋ teŋge berıldı. Arnaiy jüldeler 80 myŋ teŋgenı qūrady. Mädeniet jäne sport basqarmasy atynan da arnaiy syilyqtar tapsyryldy.