Erkeǧali Rahmadiev atyndaǧy Memlekettık akademiialyq filarmoniiasy klassikalyq vokal bölımınıŋ änşısı, respublikalyq jäne halyqaralyq baiqaulardyŋ laureaty Şahrizada Tynyştyqqa öner qan arqyly daryǧan. Onyŋ ata-anasy Qairat Jälımbetov pen Maqpal Şäkırova – Syr elıne belgılı muzykanttar. Olar qyzdarynyŋ auyr öner jolyn taŋdauyn qalamaǧan edı. Degenmen, boiyndaǧy būlyqsyǧan önerdı baiqaǧannan keiın baǧyn bailamady.
Şahrizada kışkentaiynan sahnanyŋ syrtynda östı. Qyzylorda qalasynda sol jyldary balabaqşa jaǧy qiyndau bolǧandyqtan, ata-anasy ony konsertterge daiyndyqtarǧa, muzykalyq keşterge ertıp keluge mäjbür edı. Osylaişa ata-ana ülgısı öner jolyna alyp keldı. Qairat pen Maqpal qyzdarynyŋ taŋdauyn estıgennen keiın muzykalyq kolledjdı «qyzyl» diplommen bıtıresıŋ degen şart qoidy. Şahrizadaǧa kolledjde öŋırge belgılı pedagog Samal Baiseiıtova sabaq berdı. Ärine, ata-ana da qyzdarynyŋ oquyn qadaǧalap, kerek jerınde keŋesterın berıp tūratyn.
Kolledjdıŋ ekınşı kursynda oqyǧanda alǧaşqy baiqauǧa qatysty. Būl Pavlodar qalasynda ötken respublikalyq Delfii oiyndary edı. Onda ekınşı oryndy ielendı. Bır jyldan keiın Almaty qalasynda P.Chaikovskii atyndaǧy jas oryndauşylardyŋ XXXII respublikalyq baiqauy ūiymdastyryldy. Onda Şahrizada jeŋımpazdar qatarynan tabyldy. Muzykalyq kolledjdı de «qyzyl» diplommen bıtırıp, Astanadaǧy Qazaq ūlttyq öner universitetıne grantpen oquǧa tüstı.
Osy oqu orny professory Roza Tılenşievadan därıs aldy. Elordada oqi jürıp, bırneşe baiqauǧa qatysyp, top jardy. Atap aitqanda, respublikalyq studentter olimpiadasynyŋ jäne N.Tılendiev atyndaǧy «Öz elım» III halyqaralyq muzyka festivalınıŋ laureaty atandy. 2019 jyly osy baiqau altynşy ret ūiymdastyrylyp, elordada öttı. Şahrizada onda aidy aspanǧa şyǧardy dep aitsaq bolady. Baiqaudyŋ bas jüldesın, elorda äkımınıŋ kubogyn, Nūrǧisa Tılendiev şyǧarmasyn üzdık oryndaǧany üşın arnaiy syiyqyny jäne Tūŋǧyş Prezident qorynyŋ syilyǧy elektrondy fortepianoǧa ie boldy.
Daryndy qyzdyŋ önerdegı jetıstıkterın körgen Qazaq ūlttyq öner universitetınıŋ basşylyǧy İtaliiaǧa taǧylymdamadan ötuge jıberdı. Rim qalasyndaǧy Santa Chechiliia konservatoriiasynda tört ai boiy oqydy. Milan konservatoriiasynyŋ professory, «Giacosa di Ivrea» teatrynyŋ körkemdık jetekşısı Paolo Boizionyŋ şeberlık sabaqtaryna qatysty.
Erkeǧali Rahmadiev atyndaǧy Memlekettık akademiialyq filarmoniiasyna änşı bolyp qabyldanǧanyna biylǧy qyrküiek aiynda 10 jyl bolady. Öner ūjymyna älı student kezınde kelgen edı. Keiın Qazaq ūlttyq öner universitetınıŋ magistraturasyn bıtırıp, osy oqu orny kolledjınıŋ oqytuşysy boldy.
Şahrizada Tynyştyq Şämşı Qaldaiaqov atyndaǧy «Menıŋ Qazaqstanym» halyqaralyq baiqauynda 1-oryndy, keiınnen osy baiqauda bas jüldenı aldy. Ahmet Jūbanov atyndaǧy «Jūbanov köktemı» V halyqaralyq festivalınde bas jüldenı jäne «Şabyt» 18-şyǧarmaşylyq jastardyŋ halyqaralyq baiqauynda gran-pri ielendı.
«Şabyt» festivalınde daryndy änşı «Akademiialyq vokal» atalymynda top jardy. «Sol kezde quanyşym qoinyma syimady. Qazylar alqasynyŋ qūramynda Qazaqstan, Resei, Belarus, İtaliia, İzrail, Germaniia, Qytai elderınıŋ körnektı öner qairatkerlerı, belgılı muzykanttar boldy. Osy jeŋısımmen maqtanamyn» deidı Şahrizada.
Erkeǧali Rahmadiev atyndaǧy Memlekettık akademiialyq filarmoniiasynda änşı «Qyz Jıbek pen Sansyzbai» qoiylymyna qatysty, J.Offenbahtyŋ «Gofman ertegılerı» qoiylymynda Antonia partiiasyn oryndady, Ahmet jäne Ǧaziza Jūbanovanyŋ «Qūrmanǧazy» operasynda Äues partiiasyn şyrqady.
Osy uaqytqa deiın önerı tolysyp, bıraz täjıribe jinaqtaǧan Şahrizada jeke konsertıne şaqyrady. Baǧdarlamada älem klassikasy oryndalady.
