Elordada jetı myŋnan astam mümkındıgı şekteulı bala tırkelgen. Olardyŋ bır myŋǧa juyǧyna nauqastaryna qarai ippoterapiiamen ainalysu asa qajet dep esepteledı.
İppoterapiia – atpen jüru arqyly tırek-qimyl apparatynyŋ damuyn yntalandyratyn, koordinasiiany jaqsartyp jäne tözımdılıktı jattyqtyratyn emdeu täsılınıŋ bır türı. Atqa mıngen kezde balanyŋ barlyq būlşyq etterı ärekettenıp, jalpy fizikalyq damuy jaqsarady. İppoterapiianyŋ erekşelıgı mümkındıgı şekteulı balalardyŋ psihikasyna äser etetın üilesımınde jatyr. Būl ädıs insulttan, bas miynyŋ jaraqatynan jäne jūlyn jaraqattarynan keiıngı oŋaltuda tamaşa nätijeler körsetedı. Serebraldy sal auruy, autizm, psihikalyq jäne mınez-qūlyqtyŋ keibır auytquşylyqtaryn emdeude jaqsy nätije beredı.
Elordada mümkındıgı şekteulı balalardyŋ ippoterapiiamen ainalysuy üşın «Arǧymaq» at-sporttyq sauyqtyru keşenı ötken jyldyŋ köktemınen bastap jūmys ıstei bastady. Balalar, onyŋ ışınde erekşe balalar ippoterapiia sabaqtaryna qatysuǧa mümkındık aldy. İppodrom balalardyŋ densaulyǧyn nyǧaityp, psihoemosionaldy jaǧdaiyn jaqsartatyn paidaly ıs-şaralarǧa qol jetkızuge mümkındık beredı.
– Keşennıŋ ǧimarattary, sport alaŋdary halyqaralyq standarttarǧa tolyqtai säikes keledı. Mūnda da respublikalyq jäne halyqaralyq deŋgeidegı türlı turnirler men sporttyq ıs-şaralardy ötkızuge de mümkındık bar. Balalar men jasöspırımder sport mektepterınıŋ balalary da ortalyqtyŋ igılıgın paidalanady, – deidı «Arǧymaq» at-sporttyq sauyqtyru keşenı basşysy Amanjol Hasenov.
Endı ippoterapiialyq balalardy emdeu ärı sport keşenıne onlain kezekke tūra alady. Sifrlandyru baǧdarlamasy 1 säuırden bastap ıske qosyldy. Jaŋa bastama Astana qalasy äkımdıgınıŋ qoldauymen jäne sifrlandyru basqarmasymen bırlesıp jüzege asyryluda. Endı qyzmet türıne aldyn ala tapsyrys berıp, keşen tarapynan üş künde jauabyn alady. Onlain tapsyrys bere almaityn qyzmet aluşy Astana qalasyndaǧy Qarqaraly tas joly, №1 mekenjaiynda ornalasqan «Arǧymaq» at sporttyq sauyqtyru keşenı ǧimaratyna kelıp tapsyrys bere alady.
