Astanada «Şetkı aimaqsyz şahar» degen tamaşa baǧdarlama bar. Būl boiynşa elordanyŋ ortalyǧy ǧana emes, şetkı aimaǧyn zamanǧa sai damytu közdeldı. Dūrys bastama! Bıraq qalanyŋ däl ortalyǧynda ornalasqan Şūbardyŋ «şūbarala mäselesı» tausylmai keledı.
Tūrǧyndar ne deidı?
Redaksiiaǧa habarlasqan Elubai Taibekov köşesınıŋ tūrǧyny Zäure Bektemırova «Oŋtüstıkten elordaǧa gaz keledı degen habardy estıp, endı kömır tasyp, kül şyǧarudan qūtylatyn boldyq dep quanǧan edık. Elordaǧa kögıldır otynnyŋ kelgenı qaşan, bızge älı kelgen joq. 2024 jyldyŋ basynda ıske qosylady degen edı. Endı qyrküiek aiynda berıledı degen aqparatty estıdık. Taŋerteŋgı uaqytta Şūbar kök tütın bolady. Dalaǧa şyǧyp taza aua jūtu mümkın emes» dep entıgın basty.
Bırneşe minuttyq ünsızdıktı būzyp: «Qalanyŋ nyşany ne? Bızdıŋşe, ortalyq kärız jüiesı men auyz suy. Bızde būl da joq. Şūbardyŋ ortalyq köşesı – Taibekovte bırde-bır baǧdarşam joq. Osy sebeptı jiı-jiı avtokölık bır-bırımen soqtyǧysady. Mektep te, balabaqşa da joq. Balalarǧa arnalǧan oiyn alaŋy da joq. Äzırge «joqtan» köz aşpai tūrmyz» dedı Zäure.
Byltyr Prezident Qasym-Jomart Toqaev elordany damytu mäselelerı jönınde keŋes ötkızıp, qys mezgılınde qala tütınge oranyp, tūrǧyndar men diplomatiialyq korpus aldynda yŋǧaisyzdyq tuyndaitynyn aitty. Şūbar aumaǧy diplomatiialyq korpusqa jaqyn ekenın eskersek, Memleket basşysy osy aumaqty tezdetıp gazdandyru kerektıgın aitqanyn tüsınuge bolady.
Şūbarǧa arnaiy baryp, sondaǧy tūrǧyndarmen kezdestık. Qaiyrjan Bäkırov dep tanystyrǧan tūrǧynnyŋ aitary köp eken.
«Şūbardyŋ baiyrǧy tūrǧynymyz. HH ǧasyrdyŋ 90-jyldardyŋ basynda qonystandyq. Aqmolaǧa el astanasy köşkende «bızdıŋ alqapqa örkeniet örısı keledı» dep qatty quanǧan edık. Sodan berı elordamyz damudyŋ jolyna tüstı. Bıraq Şūbar ūmyt qaldy. Astanaǧa gaz keledı degendı estıp taǧy quandyq. Älı künge deiın kömır jaǧyp, kül tasudyŋ beinetın körudemız. Osynda balalarymyz tuyp, jetıldı. Endı nemerelerımız ösıp keledı. Üş ūrpaqtan berı Şūbardyŋ şarapatyn köre almai beinet keşudemız. Äkımder uäde beredı. Alaida ıske asqanyn körgenımız joq, – dep renjısın bıldırdı Qaiyrjan aqsaqal. Al Temırqazyq köşesınıŋ tūrǧyny Mūrat Aralbaev: «Şūbardyŋ bır mäselesı – qoqys. Qoqys jäşıgı tūrǧyndarǧa arnalǧanmen, köbıne kommersiialyq qūrylymdar qoldanady. Osyndai nysandardan şyqqan qaldyqtyŋ iısı tym jaǧymsyz. Köşelerı tar, ekı kölık qatar jüruı qiyn. Solai bola tūra, käsıpkerlık subektılerı köptep aşylady. Byltyr bır nysannan gaz ballon jarylyp, adam qaitys bolǧan-dy. Bıraq kafe qaita aşylyp, jūmysyn jalǧastyruda. Är üi şama-şarqy kelgenınşe kärız (septik) qazyp alǧan. Onda su tolǧan kezde arnaiy tehnika şaqyrtyp, suyn tartady. Osyndai kezde de Şūbarda jaǧymsyz iıs jailaidy» dedı.
Şūbar tūrǧyn alabynda 50 köşe bar. Jalpy ūzyndyǧy – 27 şaqyrym. Narkesken men Saraişyq köşesı aralyǧyndaǧy Mūqaǧali Maqataev köşesı – eŋ ūzyny. Bıraq köşelerı tym tar, jaiau jürgınşı joly joq, adamdar kölıkpen talasyp, köşede jüredı. Köp köşede jaryq qamtylmaǧan. Būl turaly Şūbardyŋ tūrǧyny Maira Şahmūratova aityp berdı. Qysqasy, bas qalanyŋ ortalyǧynda tūratyn tūrǧyndar özderın şalǧai eldı mekende tūratyndai sezınetının jaiyp saldy.
Basşylar ne deidı?
Tūrǧyndardan män-jaidy bılgennen keiın jauapty basşylarǧa hat joldap, atqarylatyn jūmystar jönınde bıldık. Esıl audanynan qar tazalau jäne abattandyru jūmystaryna ǧana jauapty ekenın bıldık. Gazdandyrudy Otyn-energetikalyq keşenı jäne kommunaldyq şaruaşylyq basqarmasy ıske asyrady. Basqarma basşysy Erlan Syzdyqov: «Şūbardy gazdandyru jobasy boiynşa saraptamanyŋ oŋ qorytyndysy alyndy. Qūrylys-montaj jūmysyn jürgızetın kompaniia anyqtaldy. Qazır merdıger kompaniia 5 şaqyrym gaz taratu jelısın saldy. Gazdandyru jyl soŋyna deiın aiaqtalady. Būdan basqa, alqapty sumen jabdyqtau jäne su būru jelısın salu boiynşa jobany äzırleu jürgızedı. Būl joba 2025-2026 jyly ıske asady» dedı.
Onda mektep te, balabaqşa da bolmauy qyzyq. Qanşa jasöspırım bar? Būl turaly da aqparat qoljetımsız. Äleumettık infraqūrylymy damymaǧan alqapta tūratyn oquşylardan sapaly bılım aludy talap etudıŋ özı artyq syndy. Būl sūraqqa Bılım basqarmasy basşysynyŋ orynbasary Marjangül Qairbaeva jauap berdı.
– Şūbarda tūratyn mektep oquşylary №17 mektep-gimnaziiada bılım alady. Mektepke kölıkpen tasymaldau qarastyrylmaǧan. 2027 jylǧa deiın qalada 60 memlekettık mektepke deiıngı ūiym salu josparlandy. Qazır jer telımın bölu jaǧy qarastyryluda. 2025 jyldyŋ ekınşı jartyjyldyǧynda Şūbarda balabaqşa salu josparlandy. Al mektep qūrylysy, qalanyŋ bas josparyna säikes, 2026-2027 jyldary qarastyrylady, – dedı Marjangül Qairbaeva.
Iаǧni şūbarlyq oquşylar 3-4 jylǧa deiın mektepterge qatynap bılım aluyna tura keledı. Bälkım, basqarma qatynas kölıgın şeşıp beretın şyǧar. Mūndai täjıribe özge öŋırlerde qaralǧanyn jaqsy bılemız.
Al Kölık jäne jol-kölık infraqūrylymyn damytu basqarmasy basşysynyŋ orynbasary Erjan Dihanbaev:
– Şūbarda köşelerdı keŋeitu mümkın emes. Onda kölık qyzmetı №121 marşrutpen jüzege asady. Kestelerdıŋ jalpy sany 5 bırlık jäne qozǧalys aralyǧy 10 minutty qūraidy, – dep qysqa jauap berdı.
P.S: Eldıŋ ainasy – Astana desek, elordanyŋ däl ortasy – Şūbar dep qarastyryp, alqaptyŋ infraqūrylymyn jetıldırıp, tūrǧyndarǧa jaily jaǧdai qalyptastyru maŋyzdy. Tūrǧyndarmen tıldesu barysynda osyndai oi tüidık.
