Nūr-Sūltan qalasynda köktemgı su tasqynyna bailanysty keşendı jūmystar jürıp jatyr. Elordanyŋ är audanynda Tötenşe jaǧdai departamentımen bırlesken ştab qūrylyp, qauıptı degen uchaskelerdı tekseru jürgızılude.
Baiqoŋyr audany äkımınıŋ apparaty men osy audannyŋ TJ basqarmasymen bırlesıp su basu qaupı bar uchaskelerıne tekseru jūmystaryn jürgızdı. Tekseru barysynda osy sanatqa jatatyn bırneşe uchaske bar ekenı belgılı boldy. Qazırgı şaqta barlyq uchaskelerde su tasqynyna qarsy şaralar qabyldanuda. Aqpan aiynan bastap köktemgı kezeŋde erıgen qar suyn jürgızu üşın aryq-naua jelılerın qar men mūzdan tazartu jūmystary jürude.
Bügınnıŋ özınde aryq-naua jelısınıŋ 17000 metrı tazartylǧan. Sol sekıldı 500 tekşe metr ūsaq qiyrşyq tas pen 1000 qap qūm daiyndalǧan. Audan aumaǧyndaǧy 30 assenizatorlyq kölıkter su tasqynynyŋ aldyn aluǧa jūmyldyrylǧan.
Sol siiaqty Saryarqa audanynda audan äkımı J.Jūmaǧūlov bastaǧan äkımdık ökılderı men «Elorda Eco System» mekemesı su tasqyny yqtimal aumaqtardy aralap şyqqan.
Äkımdıktıŋ mälımetınşe, biyl su basu mümkındıgı bar negızgı 3 aimaq belgılengen. Olar: «Agrogorodok» t/a, Jünısov jäne Pavlov köşelerı, Qarauyl men Myŋaral köşelerındegı jeke sektorlar. Onymen qosa, audanda köktemnıŋ basynda su deŋgeiı köterıletın 4 oryn bar. Atalmyş audanda jyl basynan berı ūzyndyǧy 16730 metr (35 köşe) bolatyn aryq-naua jelısı tazartylyp, qar şyǧaru jūmysy qarqyndy jürude.
Mūndai şaralar Almaty audanynda da ötken. Äkımdıktıŋ aituynşa, su jaiylu qaupı bar 7 uchaske belgılenıp otyr. Ūzyndyǧy 8 şaqyrymǧa sozylǧan aryq-naua jelısı artyq zattardan arylǧan. Qar üiındılerın şyǧaru ısı bekıtılgen kestege säikes jürgızılude.
Al Esıl audany äkımdıgınıŋ merdıgerlık ūiymdary täulık boiy erıgen sudy sorumen ainalysuda. Soŋǧy künnıŋ özınde 4 myŋ tekşe metr su sorylǧan. Sonymen bırge äkımdık qar jauǧan kezde äleumettık nysandardyŋ kıreberıs joldaryna erekşe köŋıl bölıp, ūzatpai qardy şyǧaryp otyrǧan.
Baijan Emberdı
