Köne Rim men Gresiianyŋ säuletşılerı aǧyp jatqan sudy qalany körıktendıruge paidalanbaqqa ainaldyra bezendırıp, jaǧalai märmär tas tösep, sändegen eken deidı bıletınder. Sol körınıske köz toidyrǧan özge elderdıŋ säuletşılerı kele-kele qoldan su közın jasap qoiyp, subūrqaqty oilap tauypty degen boljam bar.
Bertınde, subūrqaqtar aru qalalardyŋ syrǧasy, şolpysy, alqasy siiaqty äşekei qūralyna da ainalyp kettı. Sondyqtan da, uaqyt ötken saiyn onyŋ özınıŋ tür-türı oilap tabyldy. Köşe subūrqaǧy, interer subūrqaǧy, sudyŋ aǧu dinamikasy men jaryqtandyrylǧanyna, bezendırılgenıne qarai – «än salatyn», «bileitın», klassikalyq jäne müsındık subūrqaqtar paida boldy.
Bügınde 122 subūrqaǧy bar elordamyz da onyŋ zamanǧa sai jetıldırılgen, jaŋa türlerınen kende emes. Mamyr aiynyŋ basynda aşylyp, küzdıŋ qoŋyr salqyn künderıne deiın qosylyp tūratyn subūrqaqtar qala tūrǧyndary men qonaqtarynyŋ közquanyşyna ainalǧan.
Qaladaǧy subūrqaqtardy ıske qosyp, olardyŋ trubalaryn tazartyp, tehnikalyq jaǧyn qadaǧalau «Astana-Zelenstroi» AQ qyzmetkerlerınıŋ moinynda.
Subūrqaqtar qalanyŋ sän men säuletıne üles qosqan öner tuyndysy ǧana emes, ol köp jaǧdaida qalada baǧyt-baǧdardy aiqyndap beretın kompas ta siiaqty. Subūrqaq köptıŋ adaspai jolyǧysatyn kezdesu ornyna ainalǧaly qaşan!..
