Reseide ötıp jatqan futboldan älem chempionatynyŋ mausymnyŋ 22-sındegı keşten 25-sındegı tünge deiıngı eseptı kezeŋınde 9 match oinaldy. Olarda 34 dop qaqpaǧa tüsıp, är matchta orta eseppen 3,77 goldan soǧyldy. Būl – osy mundialdaǧy eŋ joǧary körsetkış! Būl aralyqta 1 het-trik, 4 dubl jasaldy. Sondai-aq bır oiynşy (Jerom Boateng) alaŋnan quylyp, 28 futbolşy eskertu aldy. Taǧy 5 penalti belgılenıp, olardyŋ 4-ı jüzege asyryldy. Osymen bırge 2-turdyŋ oiyndary oinalyp bıttı. Komandalar keşe keşke şeşuşı, üşınşı turdyŋ oiyndaryn bastap kettı. Chempionattyŋ toptyq turnirı dürbı jolǧa tüstı…
Būl şynynda fantastikalyq oiyn boldy. Germaniianyŋ eŋ berılgen fanattarynyŋ özı matchtyŋ soŋǧy ysqyryǧy estılgenşe, onyŋ 2:1 esebımen almandar paidasyna şeşıletının döp basyp, däl tauyp, aityp bere alǧan joq. Küpşektı küşpen, jılıktı jıgermen ötken kezdesudıŋ nätijesı aqyrynda älem chempiondarynyŋ mundialmen erte qoştasuyn toqtatty.
Bälkım, 1-turda kütpegen jerden Meksikadan ūtylǧan germaniialyqtar bödıretıne jükteler mındettıŋ öte jauaptylyǧynan şyǧar, būl ūşyrasudyŋ aldynda oǧan qatysty aitylǧan boljamdarda da esep bolǧan joq. Solardyŋ bırı – nemıstıŋ tanymal «Bild» gazetı jaŋa oiynǧa şyǧatyn oiynşylardyŋ kımder bolatynyna körıpkeldık jasap baǧypty. Bıraq basylym baiyby tügel tura kelmedı.
Kezınde Sochidıŋ özımız körgen «Fişt» stadionynda janküierlerınıŋ keŋ qoldauyna kömılgen Germaniia sosyn oiynnyŋ basynan soŋǧy sekundyna deiın qarsy qaqpa jaqqa qarai lekıldete şapqylady da tūrdy. Nemıster būryn tap osy kezdesude oryn alǧandai qolaily sättı tiımdı paidalana almauşylyqty bastan keşpegen şyǧar. Sol joiqyn joryqtar barysynda Sebastian Rudi jaraqat alyp qaldy da, bapker onyŋ ornyna İlkai Giundogandy qoiuǧa mäjbür boldy. Sonyŋ artynşa şvedter şabuylşysy Ola Toivonen esep aşyp ülgerdı. Söitıp, nemıster oilamaǧan jerden jaǧdaidy naşarlatyp aldy. Olar būl doptyŋ qarymtasyn kelesı taim bastalǧan boida qaitardy. Būǧan oiynnyŋ ekınşı bölıgınde Iýlian Drakslerdıŋ ornyna şyqqan Mario Gomestıŋ qatysy boldy. Ol aldymen Timo Vernerden pas qabyldap, Marko Roisqa asyrdy. Qaptaldan kelgen dopty şabuylşy sosyn qaqpaǧa baǧyttai saldy. Esep osylai teŋestı.
Nemıster būdan keiın qaqpa aldyndaǧy qauıptı sätterdı qaptatty. Bıraq bır jaǧdaida şabuylşynyŋ şeberlıgı jetıspei jatsa, taǧy bır kezderde sättılık ainalyp ketıp, dop tordyŋ aumaǧyna barmai qoidy. Osy mäurıtterde Germaniia özınıŋ şyn mänınde üiırıp soǧatyn tolassyz şabuylmen ädıptelgen äleuetın tanytsa, sol qolaily mümkındıkterdı golǧa ainaldyra bılmeuımen älı babyna jete qoimaǧanyn körsetıp aldy. Būl mezette şvedter şabuyl degennıŋ ne ekenın ūmytty. Olardyŋ oqta-tekte bır qarsy jaqqa ūmtylǧan qadamdary alaŋnyŋ ortasynan ärı asa almady. Sonyŋ artynşa bundestim dauyldy dürbeleŋge köşıp, skandinavtar qorǧaǧan qaqpanyŋ apşysyn quyryp tastap tūrdy.
Germaniialyqtar osy tūsta qarsylastarynyŋ osal tūstaryn da tauyp aldy. Ol qorǧanystyŋ oŋ qaptaly eken. Sondyqtan osy qanatpen jöŋkılıp alǧa şyqqan nemıs jasaǧy qaqpa aldyndaǧy kezektı qauıptı sätterge erık beruge kırıstı. Būl qanatta Verner şvedterdıŋ qorǧanys şebın qaita-qaita tu-talaqai ete berdı. Ūzaqqa sozylǧan üzdıksız şabuyldar arasynda tynys alǧan mezgılder bolmasa, oiyn bır qaqpaǧa baǧyttalǧan qalpynan ajyraǧan joq. Bıraq 74-minutta Şvesiia qūramasy qūramynda alaŋǧa Djimmi Durmaz şyqqannan keiın jaǧdai bırşama özgerdı. Qaptalmen qūiǧytyp ötkendı jaqsy köretın jüirık oiynşy kelesı qanattaǧy Emil Forsbergpen septesıp, ekeuı ūzamai nemıster darbazasyn alystan kezektesıp atqylauǧa köştı. Nemıster sosyn özderı üşın qolaisyz būl körınıstı şekteuge küş saldy. Sol dürbeleŋ barysynda qorǧauşy Jerom Boateng şved Markus Bergtı art jaǧynan tebemın dep, ekınşı märte «sary qaǧaz» alyp qalyp, alaŋnan quylyp kettı. Būl «mannşaft» üşın oŋai tigen joq. Sonyŋ ızınşe kiper Manuel Noier aiyp doby ūrylǧan kezde sürınıp qūlap, tura kelgen dopty soŋynda ǧana qaiyryp ülgerdı.
Degenmen, nemıster ūjymdyq oiyndy bır qorǧauşynyŋ kemdıgıne qaramastan, tez qalpyna keltıre bıldı. Alaŋǧa 87-minutta şyqqan Iýlian Barndt bırden ekı keremet soqqy jasap, qatarǧa tez qosyldy. Būdan ärı bundestim taǧy «ätkenşek tebudı» qaita jalǧastyrdy. Qaptalda Timo Vernerdıŋ qaitpas qaisarlyǧy arqasynda taǧy būryştama belgılendı. Ony beruge kelgen Marko Rois pen Toni Kroos qulyqtaryn asyryp kettı. Aldymen Marko dopty aqyryn jyljytyp, däl qasyndaǧy Tonige bere qoidy. Öz kezegınde Kroos ony paraşiut tärızdes etıp ūşyryp, şvedter qaqpasynyŋ sol jaq būryşyna solq etkızıp tastai saldy. Gol! Esep osylai 2:1-ge jettı.
Söitıp, F tobyndaǧy Germaniia 2 matchta 3 ūpai jinap, Şvesiiamen ūpai teŋestırdı. Al bırınşı orynda 6 ūpaiy bar Meksika keledı. Endı bärın üşınşı turda Koreia – Germaniia, Meksika – Şvesiia arasynda ötetın oiyndar şeşedı.
Qysqa-nūsqa
* Mausymnyŋ 25-ne deiın chempionatta 32 match oinaldy.
* Būl oiyndarda eŋ köp kezdesken esep – 1:0. Ol 10 ret tırkeldı.
* 32 matchta 85 gol soǧyldy. Är matchqa orta eseppen – 2,65 doptan.
* Osy aralyqta 2 futbolşy alaŋnan quylyp, 97 ret eskertu berıldı.
* 32 matchty 1 407 671 adam kördı. Būl – är kezdesude orta eseppen 43 987 körermen boldy degen söz.
* Janküierler «Lujnikide» oinalǧan Resei – Saud Arabiiasy, Germaniia – Meksika, Portugaliia – Marokko arasyndaǧy oiyndardy 78 011 adam tamaşalady. Būl – eŋ joǧarǧy körsetkış.
* Eŋ az körermen Ekaterinburgte ötken Egipet – Urugvai arasyndaǧy kezdesude tırkeldı. Oǧan
27 015 adam jinaldy.
* Osy kezge deiın qaqpaǧa 16 penalti belgılenıp, olardyŋ 13-ı golǧa ainaldy. Bır dopty qaqpaşy qaǧyp aldy, ekı futbolşy qaqpadan biık jıberdı.
* Chempionatta 2 het-trik, 8 dubl jasaldy, 5 avtogol soǧyldy.
Turnir tablosy
2-tur
22 mausym
Sankt-Peterburg. Braziliia – Kosta-Rika 2:0 Goldar: Filippe Koutino (90+1), Neimar (90+7)
Volgograd. Nigeriia –İslandiia 2:0Goldar: Ahmed Musa (49, 75)Salynbaǧan penalti: Gilfi Tor Sigurdsson (83, qaqpadan joǧary)
23 mausym
Kaliningrad.
Serbiia – Şveisariia 1:2Goldar: Aleksandar Mitrovich (5) – Granit Djaka (52), Şerdan Şakiri (90)
Mäskeu, «Spartak». Belgiia – Tunis 5:2 Goldar: Eden Azer (6, penalti, 51), Romelu Lukaku (16, 45+3), Mişi Batşuaii (90) – Dilan Bronn (18), Vahbi Hazri (90+3)
Dondaǧy Rostov.
Koreia – Meksika 1:2 Goldar: Son Hyn Min (90+3) – Karlos Vela (26, penalti), Haver Ernandes (66)
24 mausym
Sochi. Germaniia –Şvesiia 2:1 Gol: Marko Rois (48), Toni Kroos (90+5) – Ola Toivonen (32)
Nijnii Novgorod.Angliia – Panama 6:1 Goldar: Djon Stouns (8, 40), Garri Kein (22, penalti, 51+2, penalti, 62), Djessi Lingard (36) – Felipe Baloi (78)
Ekaterinburg.
Japoniia – Senegal 2:2 Goldar: Takasi İnui (34), Keisuke Honda (78) – Sadio Mane (11), Mussa Vage (71)
25 mausym
Qazan. Polşa –Kolumbiia 0:3Goldar: Erri Mina (40), Radamal Falkao (70), Huan Kuadrado (75)
Mergender köşı
Garri Kein (Angliia)
Kriştianu Ronaldu (Portugaliia)
Romelu Lukaku (Belgiia)
Dinis Cheryşev (Resei)
Diego Kosta (İspaniia)
Artiom Dziuba (Resei)
Mile Edinak (Avstraliia)
Luka Modrich (Horvatiia)
Filippe Koutino (Braziliia)
Ahmed Musa (Nigeriia)
Eden Azar (Belgiia)
Djon Stouns (Angliia)
Būdan bölek, 51 oiynşy bır-bır goldan soqty
