Nūr-Sūltan qalasynda «Jūmys oryndaryn qūru integrasiialyq kartasy» aqparattyq jüiesı ıske qosylǧaly eŋbek naryǧyndaǧy jaǧdai jaqsara tüstı. Sonyŋ bır aiǧaǧy – jyl basynan berı 9 myŋǧa juyq jūmys orny qūryldy.
Jaqynda osy mäselenıŋ män-jaiyn aiqyndau maqsatynda Nūr-Sūltan qalasy äkımınıŋ orynbasary Erlan Kanalimovtyŋ töraǧalyq etuımen investisiialar jäne käsıpkerlıktı damytu, qūrylys jäne tūrǧyn üi saiasaty, qalalyq ortany regenerasiialau, tılderdı damytu jäne arhiv ısı, otyn-energetikalyq keşenı jäne kommunaldyq şaruaşylyq, strategiialyq jäne biudjettık josparlau, bılım, qoǧamdyq densaulyq saqtau, jūmyspen qamtu jäne äleumettık qorǧau basqarmalarynyŋ jäne jūmyspen qamtu ortalyǧy basşylarynyŋ qatysuymen jiyn öttı. Basqosuda memlekettık, salalyq baǧdarlamalar men jeke bastamalar şeŋberınde jaŋa jūmys oryndaryn qūru mäselesın talqylady. Qūrylatyn jūmys oryndaryn jüielendırudı jäne esepke aludy qamtamasyz etu maqsatynda QR Eŋbek jäne halyqty äleumettık qorǧau ministrlıgı jaŋa memlekettık jäne ükımettık baǧdarlamalardy ıske asyruǧa jauapty ortalyq pen jergılıktı atqaruşy organdardyŋ jūmys oryndaryn qūruyna, sondai-aq jūmys oryndaryn qūru turaly mälımetter ūsynuyna monitoringtı jüzege asyru qaǧidalaryn qabyldaǧan bolatyn.
Bügıngı taŋda ministrlık äzırlegen «Jūmys oryndaryn qūru integrasiialyq kartasy» aqparattyq jüiesı jūmys oryndaryn qūrudyŋ naqty jaǧdaiyn beinelep otyrǧanyn aituǧa tiıspız. Būl rette jüienıŋ jūmyspen qamtu saiasatyn ıske asyru bölıgı memlekettık baǧdarlamalardyŋ tiımdılıgın baǧalaudyŋ jaŋa täsılın qamtamasyz etedı.
Jiyn barysynda Nūr-Sūltan qalasynda 2019 jyly jūmys oryndaryn qūru jönındegı Jol kartasyn jüzege asyru mäselelerı qaraldy. Jūmys oryndaryn qūru, derbes jauapty tūlǧalardy aiqyndau jäne «Jūmys oryndaryn qūru integrasiialyq kartasy» aqparattyq jüiesın süiemeldeu tūrǧysynan memlekettık, salalyq pen jeke bastamaşyl baǧdarlamalar äkımşılerıne tapsyrmalar jükteldı. Jalpy, jyl basynan berı elordada 8846 tūraqty jūmys oryndary qūrylǧan. Äkımdık tarapynan halyqty jūmyspen qamtu jönınen jan-jaqty şaralar ūiymdastyrylyp, jūmys ızdegen adamdarǧa qoldau körsetu boiynşa jüielı jūmystar qolǧa alynyp otyr.
Erteŋ elordada ötetın jūmys järmeŋkesınde 2000 bos jūmys orny ūsynysqa şyǧarylady. Jalpy, qala boiynşa bügınde 7000-nan asa vakansiia bar. Olardyŋ 58 paiyzynda jalaqy mölşerı – 100 myŋ teŋgenıŋ üstınde. Tüptep aitqanda, talaptanǧan adamǧa qalalyq jūmyspen qamtu ortalyǧynan keŋes te, kömek te aluǧa bolady.
