Mädeniet jäne sport ministrı Aqtoty Raiymqūlova 20 mausym künı qazaq tılıne audarylǧan terminderdı qaita qarastyru jönınde ūsynysyn aitty. Ol 3300-den asa jalpyǧa bırdei qabyldanǧan terminderdıŋ 300-ge juyǧyn qaita audaru kerektıgın aitty. Mūndai äreketın ministr halyqaralyq terminderdı qazaqşalaǧan dūrys emes dep tüsındırmek boldy. Osy mäselege qatysty özımnıŋ jeke pıkırımmen bölıskım keledı.
Aqiqatyn aitsaq, köpten berı qazaqşalanǧan terminder tıldık qoldanysymyzǧa, jazuymyzǧa äbden sıŋıp kettı. Olardyŋ bügıngı qoldanysynda eşqandai oǧaştyq joq. Öitkenı «paiyz», «mūrajai», «synyp» siiaqty sözder Abai jäne Ybyrai atalarymyzdyŋ zamanynan berı qoldanylyp keledı.
Menıŋ oiymşa, tıldı tūqyrtyp, qanşama jyldar boiy qazaq halqynyŋ sanasyna sıŋıp qalǧan sözderdı qaitadan audaru – qisynsyz. Demek, basşylardyŋ halyqtyŋ talqylauyna salmastan, özımşıldıkpen «ton pışıp», tılımızdı tūqyrtqany – Tūŋǧyş Prezidentımız, Elbasy Nūrsūltan Nazarbaevtyŋ saiasatyna da qarama-qaişy keledı. Elbasy «Qazaqstannyŋ bolaşaǧy – qazaq tılınde», «Qazaq tılı – küllı qazaqstandyqtardy bırıktıretın quatty qūral», «Öz tılımızben ömır süreiık!», «Qazaq pen qazaq qazaqşa söilessın» degen qanatty sözderın jiı-jiı aityp qana jürgen joq, ol sözder köptegen eŋselı ǧimarattardyŋ törınde jazuly tūr. «Ruhani jaŋǧyrudyŋ» bır belgısı – tuǧan tılımızdı taza ūstau ekenın de Tūŋǧyş Prezidentımız qadap aitty. Endeşe, joǧary lauazymdy şeneunıktıŋ mūnysyna ne joryq?
Saiyp kelgende, tıl – ūlttyŋ jany. Ony oŋdy-soldy tūqyrtuǧa, janşuǧa eşkımnıŋ de qaqysy joq. Bauyrjan Momyşūly atamyz: «Tıl tazalyǧy üşın küres eşqaşan tolastamaityn mäŋgılık küres» degen sözdı beker aitqan joq. Tılın qadırlemegennıŋ ūlty joq deidı dana halqymyz. Olai bolsa, jaŋa ministr asyǧys şeşım şyǧarmaǧany jön dep oilaimyn.
Ramazan ELAMANŪLY,
L.Gumilev atyndaǧy
Euraziia ūlttyq
universitetınıŋ studentı
