Tarihta qalǧan tūlǧa
Äzerbaijan Respublikasynyŋ prezidentı bolǧan älemdık deŋgeidegı saiasatkerlerdıŋ bırı, marqūm Geidar Älievtı halqymyz jaqsy bıledı. Körnektı qairatker közı tırısınde Elbasy Nūrsūltan Nazarbaevpen jaqyn syilasypty. Ony bızge memleket jäne qoǧam qairatkerı Jänıbek Kärıbjanov aityp berdı. Endeşe Jänıbek aǧany tyŋdaiyq.
– 1998 jyly Geidar Äliev jetpıs bes jasqa tolyp, Elbasy atynan qazaqstandyq delegasiiany bastap bardym. Saltanatty şaraǧa Özbekstan, Täjıkstan, Ukraina elderınıŋ prezidentterı men
Reseiden Viktor Chernomyrdin keldı. Geidar Äliev bızdıŋ delegasiiany jyly şyraimen qabyldap, eşqandai qaǧazǧa qaramai qyryq minut söilestı. Būǧan men taŋǧalyp otyrdym. Kezdesude ekı memleket arasyndaǧy dostyq, sauda jäne ekonomikalyq qarym-qatynastar turaly äŋgımeledı. «Kaspii teŋızı bızdı bölmeidı, qaita qosady» dei kelıp, Qazaqstannyŋ teŋızdı böluge bailanysty olardyŋ aitqan pıkırın qoldaǧanymyzǧa alǧysyn jetkızdı. Bızdıŋ elımızge degen yqylasy da keremet. Tarihty da jaqsy bıledı. Äzerbaijanda «Qazaq» degen aimaq bar eken. Sonyŋ tarihyn aityp berdı. X ǧasyrda türık-qypşaqtar men äzerbaijandar tatar-moŋǧoldarǧa qarsy bırge soǧysypty. «Qazaq» degen atau sodan qalǧan deidı. Mereitoi joǧary deŋgeide öttı. Qazaqy jolmen Äzerbaijan basşysyna şapan japtym. Ol kısı oǧan riza bolyp, qazaq halqyna sälemın joldady, – dep sözın qorytqan Jänıbek aǧa Geidar Älievtı tarihta öz ornyn mäŋgıge qaşap qaldyrǧan tūlǧalardyŋ bır dep baǧalady.