Astana qalasynda 2016 jyly qūrylǧan «Tarlan batyrlary» jauapkerşılıgı şekteulı serıktestıgı memlekettık-jekemenşık ärıptestık aiasynda el öŋırlerınde dene şynyqtyru jäne sauyqtyru şaralaryn damytudy maqsat etken bırden-bır mekeme bolyp otyr.
Bügıngı taŋda «Tarlan batyrlary» mekemesı Türkıstan, Qyzylorda, Semei, Üşaral jäne Şu qalalarynda öz küşterımen paidalanuǧa bergen 5 dene şynyqtyru-sauyqtyru keşenderınıŋ jūmysyn üilestırıp keledı. Būl keşenderde, negızınen, mektepke deiıngı jäne mektep oquşylary türlı sport türlerımen ainalysady. Bırınşı kezekte äleumettık tūrǧydan osal sanatyn otbasylarynyŋ balalaryna jan-jaqty jasalady.
«Tarlan batyrlary» käsıporny är jyl saiyn memlekettık-jekemenşık ärıptestık aiasynda kelısımşarttardy jaŋartyp, Almaty, Jambyl, Qyzylorda, Türkıstan jäne Şyǧys Qazaqstan oblystarynyŋ dene şynyqtyru jäne sport basqarmalarymen jūmys jüiesın üilestırıp otyrady.
Mäselen, Şu qalasyndaǧy «Tarlan» dene şynyqtyru jäne sauyqtyru keşenınde bügıngı taŋda 350 bala tūraqty türde boks, dziudo, taekvondo, auyr atletika jäne küres türlerımen ainalysady. Mūnda tek qana sportpen ainalysyp qoimai, jasöspırımderdıŋ jarystarǧa qatysyp, joǧarǧy körsetkıştı sportşy boluyna airyqşa män berılgen. Atap aitsaq, 2017-2022 jyldar aralyǧynda osy sport keşenınen 24 Qazaqstan chempiony, halyqaralyq jarystardyŋ bırneşe jüldegerlerı tärbielenıp şyqty. Al Qyzylorda qalasyndaǧy «Tarlan» keşenınde sportpen ainalysatyn jas sportşylardyŋ jetıstıkterı tıpten jaqsy. Atap aitsaq, osy keşennen tärbie alǧan 35 jasöspırım Qazaqstan chempiony ataǧyn jeŋıp alsa, 50 sportşy sport şeberı, 7 sportşy halyqaralyq därejedegı sport şeberı, 1 sportşy Qazaqstannyŋ eŋbek sıŋırgen sport şeberı normativın oryndaǧan.
Semei qalasyndaǧy keşende 53 sportşy respublika chempiony atansa, 72 sport şeberı, 23 halyqaralyq därejedegı sport şeberı tülep östı.
Türkıstan men Üşaral qalasyndaǧy «Tarlan» keşenderınıŋ sporttyq körsetkışterı de tolaiym tabysty desek artyq emes. Būl keşenderdıŋ şäkırtterı de Qazaqstan, Aziia, Europa bırınşılıkterınde talai jülde alyp, el namysyn abyroimen qorǧaǧanyn bılemız.
«Tarlan batyrlary» jüzege asyryp otyrǧan igılıktı ıstıŋ män-jaiyn jaqynyraq bılmek oimen käsıporyn basşysymen tıldestık. Būl rette JŞS direktory Bolat Abdrahmanov atqarylyp jatqan jūmystyŋ basty baǧyty el öŋırlerındegı sportty damytuǧa, aimaq tūrǧyndaryn būqaralyq sportqa tartuǧa baǧyttalǧanyn atap öttı.
– «Tarlan batyrlary» qūrylǧan kezınen bastap öŋırlerde sportty damytudy maqsat etken. Būl ısımızdı memlekettık-jekemenşık ärıptestık aiasynda qoldauşylar da tabyldy. Aldymen keşender salu mäselesı qolǧa alyndy. Bırınen soŋ bırı bes aimaqta sport keşenderı boi köterdı. Sodan keiın mamandarmen jūmys jürgızdık. Jüielı jūmystyŋ nätijesınde bügıngı taŋda myŋdaǧan balalar men jastar bızdıŋ keşenderde tūraqty türde sportpen, jalpy dene şynyqtyrumen ainalysyp jür. Bız qazırgı jaǧdaimen şektelıp qalmai, aldaǧy uaqytta elımızdıŋ taǧy bırneşe eldı mekenderınde osyndai dene şynyqtyru jäne sauyqtyru keşenderın ıske qosqymyz keledı. Būl rette, ärine, jergılıktı bilık ökılderı de öz qoldaularyn bıldırıp jatsa, nūr üstıne nūr bolar edı, – deidı serıktestık basşysy Bolat Ükıbaiūly.
El öŋırlerınde sporttyŋ damuyna aitarlyqtai üles qosyp kele jatqan, jüielı jūmystan jetıstıkke qol jetkızıp otyrǧan «Tarlan batyrlary» ūjymyna bız de tabys tıledık. Öŋırlerdıŋ örkendeuıne üles qosatyn osyndai ūiymdarǧa qoldau körsetetın ūiymdar köp bolsa dep oilaimyz. Eŋ bastysy, qanşama balalar men jastardyŋ salamatty ömır saltyn ūstanuǧa, joǧary därejelı sportşy boluyna jaǧdai jasalyp jatqany quantady. Olai bolsa, «Tarlan batyrlary» serıktestıgıne de osyndai jūmysty qolǧa alamyz dep maqsat qoiǧan azamattar tabylyp jatsa, bärıne de sättılık pen tabysty eŋbek tıleimız.
