TÄUELSIZDIKKE TARTU
Biyl – elımız üşın mereilı jyl. Azattyqtyŋ şirek ǧasyr toiy. Osy aituly merekege bailanysty memlekettık jetekşı arnalardyŋ bırı – «Habar» agenttıgı bırqatar jobalardy qolǧa alyp, täuelsızdıkke tartu jasap otyr.
Taiauda ǧana «Habar» telearnasynan körermenge «Pai-pai, 25» dep atalatyn äleumettık tok-şouy jol tartqanyn jaqsy bılemız. Atynyŋ özı alystan şaqyryp tūratyn baǧdarlamanyŋ mazmūny ädettegı qasaŋ qaǧidadan özgeşeleu. Oinaqy, äuezdı, aişyqty. Onda elımızdıŋ şirek ǧasyr aralyǧyndaǧy tolaiym tabystary saralanady. Jūrtşylyq jıtı bıle bermeitın mälımetter, qyzyqty oqiǧalar men taǧylymdy äŋgımeler aitylady.
«Habar» agenttıgı» AQ basqarma töraǧasynyŋ orynbasary Rinat Kertaevtyŋ aituynşa, baǧdarlamanyŋ «Pai-pai, 25» dep ataluy da tegın emes eken. Būl – täuelsızdık jyldarynda jetken tabystarǧa taŋǧaldyryp, tamsandyratyn joba. Azattyqtyŋ tarlan tarihyna şolu jasaidy. Baǧdarlamada bırneşe janr bırıgıp, ädemı üilesım tapqan. Jürgızuşıler astarly äzılmen äserlı äŋgıme örbıtedı. Sondai-aq, sarapşylar da pıkır bıldırıp, öz oilarymen bölısıp otyrady. Tok-şoudyŋ tızgının Qymbat Dosjan, Serıkzat Düisenǧazin, Aigül İmanbaeva, Nūrsūltan Qūrman jäne Darhan Äbduahit sekıldı tanymal adamdar jürgızedı.
Sonymen bırge, «Habar» agenttıgınıŋ tıkelei ūiytqy boluymen Täuelsızdıktıŋ 25 jyldyǧyna arnalǧan «Ekspedisiia-25» jobasy qolǧa alyndy. Joba aiasynda türlı salada qyzmet etetın 12 azamat elımızdıŋ är aimaǧyndaǧy jiyrma bes mädeni-tarihi oryndar men ırı käsıporyndardy aralap, elge eŋbegı sıŋgen tūlǧalardy nasihattauǧa saparǧa şyqqan.
Olar respublika aumaǧy kölemınde 25 000 kilometr qaşyqtyqta jol jüredı. Joba älı jalǧasuda. «Ekspedisiia-25» baǧdarlamasy 10 qyrküiekten bastap telearnadan körsetılıp keledı.
Byltyrdan berı «Habar» telearnasynan «Aqyldyŋ kıltı. Ömırdastan» teleepopeiasyn qyzyǧa qarap jürmız. Ol turaly jūrtşylyqtyŋ da pıkırı joǧary. Öte bır köpşılıktıŋ köŋılınen şyqqan sättı joba dep aituǧa bolady. Qoiylymda halqymyzdyŋ basynan ötken aumaly-tökpelı kezeŋder däl surettegıdei beinelengen. Osy qazan aiynan bastap azattyqtyŋ şirek ǧasyr toiyna arnalǧan jobanyŋ ekınşı mausymy jaryqqa şyqty. Teleepopeianyŋ alǧaşqy mausymynda XIX ǧasyrda ǧūmyr keşken üş buynnyŋ ömırı beinelense, ekınşı mausym parallel siujettık jelıge qūrylǧan. Ondaǧy oqiǧalar ötken ǧasyrdyŋ jetpısınşı jyldarynan bastalyp, elımız täuelsızdık alǧan kezben astasady. Atalǧan tuyndynyŋ rejisserı Mūrat Bidosovtyŋ aituynşa, filmdegı keibır oqiǧalar Erık Baijünısov degen azamattyŋ «Äke mūraty» degen şyǧarmasynyŋ jelısı boiynşa alynǧan. Onyŋ qasyndaǧy Arman, Barbos degen dostarynyŋ da prototipı bar. Tarihi epopeia Jambyl oblysyndaǧy Merke audanynda, Şu özenı men Alatau bökterınde, qalalyq siujetter Almatyda tüsırılgen. Epopeiadaǧy kostium men dekorasiianyŋ erekşelıgı de tartymdy. Ekınşı mausymdaǧy 20 bölımnıŋ barlyǧy da Abaidyŋ qara sözderımen tüiındelıp otyrady. Filmnıŋ ssenariın Arman Sqabylūly, Serjan Zäkerūly jäne Mūrat Bidosov jazǧan. Al muzykasyn änşı-sazger Seifullin Jolbarys ärlegen.
Jalpy, jyl soŋyna deiın telearna ūjymy «Täuelsızdık tolǧauy», «Kod nasii» atty derektı filmder men azattyq toiyna arnalǧan merekelık beinebaiandar men rolikter daiyndap, jūrtşylyqqa ūsynbaq.
Azamat ESENJOL