Elordada qazaq drama teatrynyŋ qūrylysy bastalady. Ǧimarat qazırgı zaman talaptaryna sai, jaŋa tehnologiialardy qoldanumen boi köterıp, onda eŋ zamanaui qūral-jabdyqtar ornatylady.
Nomad City Hall konsert zalynda Halyqaralyq teatr künıne orai ötken saltanatty şarada qalalyq Mädeniet jäne sport basqarmasynyŋ basşysy Bolat Majaǧūlov osylai dep süiınşıledı. Jinalǧandardy käsıbi merekelerımen qūttyqtap, bır top ärtıs pen teatr qyzmetkerlerıne elorda äkımı Baqyt Sūltanovtyŋ Alǧys hatyn tapsyrdy.
Bas qaladaǧy qazaq drama teatry qūrylysyn qarjylandyru jaqynda Ükımet qaulysymen «Samūryq-Qazyna» ūlttyq äl-auqat qory» AQ-qa jükteldı. Tiıstı jer telımı de belgılendı. Teatr A.Baitūrsynov jäne J.Näjımedenov köşelerınıŋ arasyndaǧy jobalyq atauy № 23-15 köşede salynady.
«Täuelsızdık jyldary elordamyz mädeniet pen öner salasynda jaŋalyqtar men innovasiialar jarşysyna ainaldy. Öner salasy üşın teatrdyŋ orny bölek. Körermen köŋılın nūrǧa, jüregın jyrǧa bölep, qoǧamnyŋ ruhyna dem berıp, ışkı jan düniesıne em bolady. Qalamyzdyŋ bügıngı mädeni ömırındegı jetken jetıstıkterı eŋ aldymen önerdegı özderıŋızdei önegelı jandardyŋ eselı eŋbekterı men jalyndy jıgerlerınıŋ jemısı ekenı dausyz. Teatrdyŋ tūǧyryn nyǧaityp, bedelın bekemdeudegı eŋbekterıŋız ūşan-teŋız» degen Bolat Majaǧūlov Nūr-Sūltan qalasynyŋ äkımı Baqyt Sūltanovtyŋ, qala basşysynyŋ orynbasary Nūrlan Nūrkenovtyŋ jäne öz atynan Alǧys hattardy tapsyrdy.
Marapatqa ie bolǧandardyŋ qatarynda Q.Quanyşbaev atyndaǧy memlekettık akademiialyq qazaq muzykalyq drama teatrynyŋ ärtısterı Ainūr Jetpıspaeva, Erjan Nūrymbet, İnabat Äbenova, M.Gorkii atyndaǧy memlekettık akademiialyq orys drama teatrynyŋ akterlerı Danil Homko, İgor Sedin jäne baletmeister Roza Belgıbaeva, «Jastar» teatrynan Nūrlybek Tölegen, Eldos Şaikenov jäne körermendermen jūmysty ūiymdastyru bölımınıŋ basşysy Liazima Saibanova, Quyrşaq teatrynyŋ körkemdık jetekşısı Qūralai Eşmūratova, osy teatr direktory Toǧjan Hasanǧalieva, «Naz» bi teatrynan Jūldyz Begmanova jäne Äliia Äbılqasymova, Komediia teatrynan Erniiaz Bırımqūlov, Äli Bidahmetov pen Albina Valieva boldy.
Jalpy qyzyl kılemmen jürıp ötuden bastalǧan merekelık keşte elorda äkımdıgıne qarasty alty teatr ūjymdary qūrmet-qoşametke bölendı. Öz önerlerın de ortaǧa salyp, körermenderdıŋ köŋılın köterdı.
