Täuelsızdık – dübırge toly mereke ǧana emes, azattyq üşın jan qiǧan tūlǧalarǧa taǧzym eter kün dep aituǧa bolady. Sondai asyl erdıŋ bırı – nebärı 33 jasynda qaza bolǧan körnektı memleket jäne qoǧam qairatkerı Smaǧūl Säduaqasov. Keşe elordalyq bır top ziialy qauym alaştyŋ ardaqty perzentınıŋ süiegınıŋ külı jerlengen bas qalanyŋ ortasyndaǧy «Qaraötkel» ziratyna baryp, tūǧyrly tūlǧanyŋ ruhyna dūǧa baǧyştap, taǧzym ettı.
Alaş arysynyŋ basynda tarih ǧylymdarynyŋ doktory, akademik Mämbet Qoigeldiev jas bolsa da elge bas bola bılgen Smaǧūldyŋ küreskerlıgı jaiynda tebırenıp söiledı.
– Ol – HH ǧasyrdyŋ alǧaşqy şiregındegı kürdelı kezeŋnıŋ ūly tūlǧasy. Onyŋ jaulary bız Smaǧūldy öltırdık dep oilady. Bıraq uaqyt körsettı: ony jaulary öltıre alǧan joq, ol ölgen joq. Onyŋ ideiasy, ūstanymy, körsetken ülgısı bügınge deiın tırı. Tuǧan halqy aman bolsa, elınıŋ erkındıgı üşın küresken azamattyŋ öluı mümkın emes, – dedı tarihşy.
Dara tūlǧanyŋ mūrasyn zerttep, ädebi ainalymǧa tüsırgen ǧalym, akademik Dihan Qamzabekūly Smaǧūl Säduqasūly 1933 jyly 16 jeltoqsanda qaitys bolyp, jaqyndary ony soŋǧy saparǧa 19 jeltoqsanda şyǧaryp salǧandyǧyn aitty.
– Qazır elımızde alaş aptalyǧy jürıp jatyr. Ol bas şahardan bastau aldy. Elordada alaşqa qatysty ötken kez kelgen şarada jastar osy jerge kelıp, Smaǧūl aǧamyzdyŋ ruhyna dūǧa baǧyştaidy. Būl ziratta Kenesary hannyŋ sarbazdary jatyr. Ūlt ziialylary Soltüstık Qazaqstan oblysyndaǧy bır audanǧa körnektı qairatkerdıŋ esımın bersek degen ūsynys köterdı. Būiyrsa, astanadaǧy №78 orta mektepke Smaǧūldyŋ esımı berılmek. Onyŋ artynda qalǧan mūrasy köp. Halyq ony oquy kerek, – dedı ol.
