«Alty Alaştyŋ igı jaqsysy bas qossa, tördegı oryn ūstazdıkı» deptı Maǧjan. Mūǧalım bolu jüregıŋdı qatygezdıkpen kırletpei, sözıŋde qasiettı, ısıŋde adaldyqty, jüzıŋde jylylyqty saqtai bılu. Bır kezderı osy bır baǧa jetpes mamandyqtyŋ qadırın qaşyryp, bedelın tüsırıp aldyq. Biyldyŋ eŋ maŋyzdy jaŋalyǧy mūǧalımderge memleket tarapynan körsetılgen qoldaudyŋ köbeigendıgı ekenı dausyz. Bız bügın elımızdegı eŋ üzdık elordalyq mūǧalım – «Qazaqstan mūǧalımı-2020» ūlttyq syilyǧynyŋ iegerı, Nūr-Sūltandaǧy Nazarbaev ziiatkerlık mektebı himiia pänınıŋ mūǧalımı, «Älem mūǧalımı» jahandyq syilyǧynyŋ Qazaqstandaǧy elşısı Dinara Beisembaeva turaly aitpaqpyz.
Dinara Toqtarqanqyzynyŋ ūstazdyq joldaǧy eŋbek ötılı – 15 jyl. Ol Semei memlekettık pedagogikalyq institutyn biologiia jäne himiia mūǧalımı mamandyǧy boiynşa bıtırgennen keiın, alǧaşqy eŋbek jolyn öŋırdegı «Jas ūlan» äskeri mektebınde bastady. Aldyndaǧy oquşy men sabaq beretın pänın şeksız jaqsy köru mūǧalımnıŋ ömırlık maqsatyna ainalyp ketken. «Şyǧys Qazaqstan oblysynyŋ kışkentai ǧana Şar qalasynda tuyp östım. Bala künımnen biologiia pänınıŋ mūǧalımı boludy armandaitynmyn. Öitkenı maǧan jändıkter men ösımdıkterdı syrttai baqylau, üidegı qūstar men tört tülıkke qarau ūnaityn. Student kezımde jyl saiyn jazda qaraǧaily ormanda ötetın täjıribe jūmystarymyzdy asyǧa kütetınmın. Tabiǧat aiasynda özımdı osy ortanyŋ qorǧauşysy sezındım» dep Dinara Beisembaeva ötken künderın esıne aldy.
Abai Qūnanbaiūlynyŋ «Adamnyŋ adamgerşılıgı jaqsy ūstazdan bolady» degen sözı bızdıŋ keiıpkerımızdıŋ özıne ǧana emes, tälım berıp, jol nūsqaǧan ömırlık ūstazdaryna da qatysty aitylǧandai. Sebebı Dinara Toqtarqanqyzynyŋ bügıngı jetıstıgı – pedagogikalyq joldy taŋdauǧa kömektesken Säule Jılkıbaeva men Oleg Pilguk syndy oqytuşylarynyŋ arqasy. Degenmen ūstazdarynan ozǧan şäkırttıŋ osal emes ekenı de anyq. Qazır ol NZM-de himiiany aǧylşyn tılınde oqyta otyryp, ǧylymi-zertteu jäne täjıribelık-konstruktorlyq jūmystarǧa belsene qatysyp jür. Sondai-aq daryndy balalarǧa arnalǧan bılım beru qajettılıkterı baǧdarlamasyn jasauǧa qatysty. Onyŋ oquşylary – halyqaralyq olimpiadalar men ǧylymi jarystardyŋ jeŋımpazdary men jüldegerlerı.
Qaiyrymdy ūstaz osy baiqaudan ielengen aqşalai jüldesınıŋ 1,5 mln teŋgesın auyl mektebıne arnady. Ol jaqynda ǧana Qaraǧandy oblysyna qarasty Ahmet auylyndaǧy orta mekteptıŋ himiia kabinetıne zerthanalyq qūral-jabdyqtar alyp berdı. Özı de auyl mektebınen tülep ūşqandyqtan, mūndai mektepterdıŋ jaǧdaiymen jıtı tanyspyn deidı qoly aşyq mūǧalım. «Jahandyq syilyqtyŋ basty qaǧidaty – qoǧamǧa qyzmet etu. Baiqau şarty boiynşa saualnama toltyru kezeŋınde-aq jülde qoryn qaida jaratar edıŋız degen sūraqqa auyl mektebıne qoldau körseter edım dep jauap bergenmın. Koronavirus bızdıŋ elımızde älı de ǧalymdardyŋ, biotehnologtar men himikterdıŋ az ekenın körsetıp berdı. Sondyqtan auyl mektepterınde ǧylymmen ainalysuǧa tamşydai bolsa da septıgım tise – azamattyq boryşymnyŋ ötelgenı» dedı ol.
Dinara Beisembaeva bolaşaqta auyldaǧy ärıptesterıne ädıstemelık qoldau körsetudı josparlap otyr. «Sandyq ǧylym – üide» elektivtı kursynyŋ avtory retınde ol himiia jäne biologiia pänderınıŋ mūǧalımderımen täjıribesın bölıspek. Sondai-aq zertteudı sandyq formatta ūiymdastyru boiynşa elektivtı kurs baǧdarlamasyn äzırleude.
İä, ūstaz – ūlt bolaşaǧynyŋ ainasy. Otany üşın şyn küiınıp, oquşysy üşın şyryldap jüretın Dinara Toqtarqanqyzy siiaqty bılım salasynyŋ betke ūstarlary köbeise, ūlt bolaşaǧynyŋ da jarqyn bolary sözsız.
Köktem QARQYN
