ŪLY MEREKENI ŪLYQTADY
Astanadaǧy «Jastar» teatrynda Täuelsızdıktıŋ şirek ǧasyr toiyna arnalǧan qalalyq Tılderdı damytu basqarmasynyŋ ūiymdastyruymen «Tarih tolqynynda» atty ädebi-sazdy keş öttı.
İgılıktı şaranyŋ maqsaty täuelsızdık qūndylyqtaryn ūlyqtap, öskeleŋ ūrpaqty otansüigıştıkke, eljandylyqqa baulyp, ana tılımızdıŋ märtebesın köterıp, mereiın asyrudy közdegen.
Keş barysynda elımız egemendık alǧan kezdegı oqiǧalar men Elbasy jaiynda tüsırılgen beinebaiandar körsetılıp, belgılı qalamgerler sol uaqyttaǧy tarihi kezeŋder jaiynda salmaqty söz sabaqtady. Äsırese, jazuşy Aldan Smaiyl asqaq Astana turaly parasatty oi qorytsa, Tıl komitetınıŋ alǧaşqy töraǧasy bolǧan Sūltan Orazaly azattyq alǧan şaqtaǧy ana tılımızdıŋ abyroiy üşın atqarylǧan jūmystar jaiynda saliqaly äŋgıme örbıttı. Belgılı ǧalym, akademik Ǧarifolla Esım de derbestık alǧan jyldardaǧy eleulı oqiǧalarǧa toqtalyp, jinalǧan qauymǧa täuelsızdık degen eŋ asyl dünienı közdıŋ qaraşyǧyndai saqtap, ony qaster tūtyp, ardaqtap jürıŋızder degen ızgı lebızın bıldırdı.
Ädebi keştıŋ körıgın elordalyq Qalleki teatrynyŋ ärtısterı qyzdyrdy. Olar sahnada qazaq aqyndarynyŋ azattyqqa arnaǧan aibyndy jyrlaryn oqyp, ruhymyzdy köterdı. Ana tılımızdıŋ qadır-qasietın tüsınuge, baǧalauǧa bügıngı jastarǧa oi salatyn qyrǧyz dramaturgı Mar Baidjievtıŋ «Tıl tabysqandar» qoiylymynan üzındı qoidy. Daryndy akter Quandyq Qystyqbaev Memleket basşysynyŋ «Täuelsızdık tolǧauynan» üzındı oqydy. Ondaǧy: «Bız täuelsızdıktı aqylmen, ata-baba jolymen aldyq. Täuelsızdıktıŋ qaita oralǧany – bızdıŋ ata-babalarymyzdyŋ san ǧasyrlyq azattyq küresınıŋ zaŋdy öteuı. Jaratqan İenıŋ jasaǧan ädıldıgı. Ata-babalarymyzdyŋ osynşama baitaq jerdı aq naizanyŋ ūşymen, aq bılektıŋ küşımen qorǧap qalǧanynyŋ arqasy. Bügıngı bızdıŋ täuelsızdıgımızdıŋ qainar közı – qazaq halqynyŋ san ǧasyrlar boiǧy küresınde, azattyqqa ūmtylǧan qaisarlyǧynda jatyr» degen oily sözderden azattyqtyŋ qūny men bäsın ıştei ūǧynasyz.
Körkem jyrmen örılgen sazdy keşte otansüigıştık ruhtaǧy änderdıŋ bairaǧy jelbıredı. Endı ǧana köpşılıkke tanylyp kele jatqan jas änşı Jasmina Tūraşeva «Otanym üşın» degen än şyrqasa, talantty önerpaz Altynai Jorabaeva «Qazaqstanym, alǧa!» dep atalǧan patriottyq änımen körermenderdıŋ ystyq yqylasyna bölendı. Keş şymyldyǧyn Janat Şybyqbai arqaly aqyn Qadyr Myrza Älınıŋ sözıne jazylǧan Eskendır Hasanǧalievtıŋ «Atameken» änımen qorytyndylady.
Tüiındep aitqanda, täuelsızdıktıŋ mereilı belesıne arnalǧan tamaşa keşten taǧylymǧa toly tanymdyq dünielerdıŋ köp bolǧany köŋılımızdı köterdı.
Azamat ESENJOL