Astana qalasy äkımınıŋ bırınşı orynbasary Sergei Horoşun Ürımşı qalasynyŋ merı İlham Sabyr myrza bastaǧan bır top delegasiia ökılderımen kezdestı.
Ürımşı merınıŋ Astana qalasyna jasaǧan resmi sapary aiasynda ūiymdastyrylǧan kezdesu barysynda Sergei Mihailovich Qytai arqyly tauar ainalymynyŋ jyl ötken saiyn artyp kele jatqanyn tılge tiek ete otyryp, bas qalanyŋ damuyna toqtaldy.
«Biyl jas elordamyz 16 jasqa toldy. Özın-özı qarjylandyra alatyn deŋgeige jettı. Kelesı jyldan bastap respublikamyzdaǧy tört donor qalanyŋ bırıne ainalamyz» dedı qala äkımınıŋ orynbasary. Soŋǧy 16 jylda qala aumaǧynyŋ üş ese öskenın, Astana aumaǧynda 55 myŋ şaǧyn jäne orta käsıpkerdıŋ baryn, elektrovoz, lokomotiv, dizeldı dvigatelder jäne altyn öndıretın zauyttyŋ jūmys ıstep jatqanyn jetkızdı.
Kezdesude Ürımşı qalasynyŋ merı İlham Cabyr Ürımşınıŋ QHR Şyŋjaŋ ūiǧyr avtonomiialy audanyndaǧy qalalyq ärı äkımşılık aimaq ekenın, Qytai derekterınen basqa «Ürımşı qalasy» törtınşı ortalyq qalalyq aimaqqa jatatynyn aitty.
Ötken jyldyŋ qorytyndysy boiynşa ekı el arasyndaǧy tauar ainalymy 22,5 mlrd AQŞ dollaryn qūrasa, soŋǧy alty aidaǧy körsetkış 9 mlrd AQŞ dollaryna jetken. Astana qalasy men QHR arasyndaǧy tauar ainalym kölemı 2013 jyly 1,265 mlrd AQŞ dollary şamasynda bolsa, biylǧy jarty jyldyqta 600 mln AQŞ dollaryn qūraǧan.
Kezdesu barysynda Astana men Ürımşı qalalary arasyndaǧy aldaǧy uaqytqa josparlanǧan bırqatar ıs-şaralar talqylandy. Jalpy, Astana men Ürımşı arasyndaǧy bırlesken jūmystyŋ maŋyzdysy – auyl şaruaşylyǧy salasyndaǧy bailanys. Osy oraida «Astana ÄKK» AQ ŪK men «Ürımşı» memlekettık aktivterdıŋ investisiialyq kompaniiasymen serıktestık turaly jasalǧan memorandumnyŋ maŋyzy zor. Būl qūjat keleşekte jylyjai şaruaşylyǧy, auyl şaruaşylyǧy salasynda bırıge qyzmet etuge mümkındık berumen qatar «Aimaqtyq tūraqty qordyŋ» damuyna oŋ yqpal etedı.
Gülbarşyn ÖKEŞQYZY
