Şıldenıŋ şılıŋgır ystyǧy kelgelı Astanada şomylu mausymynyŋ däurenı jürıp tūr. Qalalyq saiabaqtaǧy jaǧajaiǧa asyǧatyndardyŋ qatary molaia tüsken. Sebebı, elordalyqtardy künnıŋ aptabynan qūtqarar erke Esıl biylǧy jazda naǧyz demalys mekenıne ainalypty. Suǧa tüsuşılerge arnalǧan özen jaǧasyndaǧy jaǧdaidy körıp qaittyq.
Tabaldyryqty attamas būryn özgerıstıŋ eŋ alǧaşqysy közge tüsedı. Jaǧajaiǧa kıru qūny eresekterge – 500 teŋge bolsa, 16 jasqa deiıngı balalarǧa – 200 teŋge. Zeinetkerlerge, mektep jasyna deiıngı büldırşınderge, mümkındıgı şekteulı azamattarǧa tegın bilet qarastyrylǧan. Mūndai baǧaǧa narazylyq tanytyp, jaǧajaidyŋ aqysyz boluyn qalaityn tūrǧyndar kezdesedı. Alaida, jaǧajaidyŋ jūmysy kıru qūnyn aqtaidy ärı bärı Astana qalasy äkımdıgınıŋ tıkelei baqylauynda jüzege asuda.
TAZALYǦY TAŊDAI QAQTYRADY
Mäselen, biyldan bastap jaǧajaiǧa taza su tartylǧan. Iаǧni, özennen şomylyp şyqqan demaluşylar ystyq pen suyq su aǧatyn duş qabyldai alady. Alty kabinaly duş er men äielderge teŋ bölıngen. Aşyq aspan astynda aiaq-qol juuǧa arnalǧan oryn da salynǧan eken.
Bırneşe jyldan berı talqydan tüspegen mäselenıŋ taǧy bırı şeşımın tapqan. Ystyqta örşıp ketetın biodärethananyŋ jaǧymsyz iısı jūrtty mazalamaidy. Endı jaǧajai aumaǧynda tūraqty äjethana ornalasqan. Kiım auystyratyn bölme de bar.
Qalalyq jaǧajai äkımşılıgı mūndaǧy tazalyq pen qauıpsızdıktı bırınşı orynǧa qoiady:
– Şyny ydystaǧy susyndy küzetten ötkıze almaisyz. Sebebı, bötelkenıŋ synyqtary bıreudı jaralauy mümkın. İt-mysyǧyn erte şyqqandardy mülde kırgızbeimız. Būryndary özen jaǧasynda bır rettık ydystyŋ qaldyqtary, sellofan sekıldı neşe türlı närseler şaşylyp jatatyn. Arnaiy qoqys jäşıkterın qoiyp edık, tūrǧyndar qazır öz zattaryna ūqypty. Adamdar temekı tūqylyn qūmnyŋ üstıne tastai salatyn. Qoǧamdyq oryn bolǧan soŋ, şylym tartatyndarǧa arnaiy ekı jerdı belgılep berdık, – deidı jaǧajai basşysy Arsen Tüsıpbekov.
QAUIPSIZDIK QATAŊ QADAǦALAUDA
Saǧat 10.00-20.30 aralyǧynda qyzmet körsetetın qalalyq jaǧajaida ädemı äuender oinap tūrady. Ara-tūra jüzuşılerge habarlandyru aitylady. «Suǧa tüskende abai bolyŋyzdar, mejeden ary asuǧa tyiym salynady» dep dauystady äkımşılık. Qauıpsızdık qyzmetın sūradyq osy kezde. 5 qūtqaruşy, 1 qaiyq bar eken jaǧajaida. Qaiyqtyŋ sanyn azsynyp edık, Arsen: «Kerısınşe, qaiyqty otaldyryp jürgızemın degenşe uaqytty joǧaltamyz. Qūtqaruşylar 50 metr qaşyqtyqty 42 sekundta ötkeredı. Al, qalqyma belgınıŋ jaǧadan ūzaqtyǧy – 4 metrdei. Iаǧni, batyp bara jatqan adamǧa 10-12 sekundta jüzıp barady. Qūdai betın aulaq qylsyn, mausym bastalǧaly suǧa batqandar bolǧan joq» deidı. Qaiǧyly oqiǧalardyŋ sireuınıŋ bırden-bır sebebı – jaǧajaida alkogol, syra ışuge tyiym salynǧan. Mas adamdarǧa da kıruge bolmaidy. Sondai-aq, köpırden sekıruge de rūqsat joq.
Taǧy bır eskeretın jait, 16 jasqa tolmaǧan jetkınşekter qalalyq jaǧajaiǧa özderıne jauapty ülkendermen ǧana kıre alady eken.
Demaluşylarǧa ūsynylatyn qyzmet türıne keler bolsaq, jaǧada 38 künşatyry qoiylǧan. Sürtınetın taza oramaldar, jüzuge arnalǧan döŋgelekter, jatuǧa yŋǧaily oryndyqtar, dämhana da bar. Biylǧy jaŋalyqtyŋ taǧy bıreuı – balalar alaŋqaiy. Būl jerde kışkentailarǧa şaqtalǧan bassein, balyq aulaityn oiynşyqtar sekıldı qyzyqtar köp.
Suǧa tüsıp salqyndaisyz, köleŋkede jatyp demalasyz, tıptı boi jazyp futbol, voleibol oinaityn sporttyq alaŋ da nazardan tys qalmaǧany quantarlyq.
ESILDIŊ BOIY ROMANTİKA
Astanalyqtardyŋ belsendı demalysyna laiyqtalǧan Esıl audanyndaǧy jaǧajaidaǧy qyzmettıŋ bärın Astana qalasy Kommunaldyq şaruaşylyq basqarmasy retteidı.
Esıl özenınıŋ sapasyna toqtalar bolsaq, biyldyqqa özennıŋ tübın ekı ret tazalaǧan. Süŋguırler äuelı sudyŋ astynda jinalǧan bögde zattardy alyp şyqqan. Būdan keiın arnaiy qūrylǧymen saz-balşyǧy soryldy. «Mamandar sudyŋ sapasyn tekseru maqsatynda jüielı türde synamalardy alyp ketedı. Nätijesı – şomyluǧa jaramdy. Bügınde Esıldıŋ boiynan ondatr, kämşat sekıldı terısı baǧaly januarlardy kezdestıruge bolady. Tabiǧat zaŋyna säikes, olar tek taza jerlerdı mekendeitını belgılı» deidı Arsen Ämırjanūly.
Esıldıŋ jaǧajaiy – romantikalyq meken. Jyl saiyn mūnda süiıktısıne tosynsyi jasap, sezımın bıldıretın jıgıtter jiı keledı, aq köilek pen smoking kigen jas jūbailar da özen jaǧasynda seruendep qaitudy dästürge ainaldyrǧan.
Mädina JAQYP
