Keşe Qazaqstan Prezidentınıŋ töraǧalyǧymen «Nūr Otan» partiiasy Saiasi keŋesınıŋ keŋeitılgen otyrysy öttı.
Saiasi keŋestıŋ otyrysynda partiiany jüielı jaŋǧyrtu jäne «Prezidenttıŋ bes äleumettık bastamasynyŋ» jüzege asyryluyna qoǧamdyq baqylau jasau ısın ūiymdastyru mäselelerı qarastyryldy. Pıkır almasu kezınde Nūrsūltan Nazarbaev jastardy käsıbi daiyndau jäne beiımdeu, sondai-aq «Bes äleumettık bastamany» oryndaudyŋ detaldary men mehanizmderıne jäne onyŋ ıske asyryluyna qoǧamdyq baqylau jasaudy qamtamasyz etu mäselelerıne toqtaldy.
Basqosudyŋ kün tärtıbındegı mäselelerge bailanysty baiandamalardy tyŋdaǧan Elbasy memlekettık baǧdarlamalardy jüzege asyru jäne olardyŋ oryndaluyna baqylau jasau ısındegı «Nūr Otan» partiiasynyŋ maŋyzdy rölın atap öttı.
Qazaqstan Prezidentı älemdık damudyŋ jäne ekonomikalyq üderısterdıŋ joǧary qarqynyna toqtalyp, jaŋa syn-qaterlerge beiımdelu qajettıgın aitty.
Memleket basşysy «Sifrly Qazaqstan» baǧdarlamasyn jäne partiianyŋ sifrlandyru salasyndaǧy jobalaryn oryndaudyŋ maŋyzdylyǧyna nazar audardy.
Qazaqstan Prezidentı Astana ekonomikalyq forumynyŋ qorytyndysy boiynşa şyǧarylǧan şeşımder jönınde keŋınen äŋgımeledı.
– Jahandyq damudan qalyp qoimau üşın basqarudyŋ sapaly boluy talap etıledı. Būl – memlekettık qyzmettı jetıldıru degen söz. Bız memlekettık qyzmetke qabyldau üderısınıŋ aşyqtyǧyn qamtamasyz etu jäne meritokratiia qaǧidatyn ılgerıletu mäselelerın şeştık. Būl qadamnyŋ oryndaluyn partiia qadaǧalauy kerek, – dedı Nūrsūltan Nazarbaev.
Sonymen qatar, Memleket basşysy investisiia tartu jäne bäsekege qabılettı eldı qalyptastyru qajettıgın atap öttı.
– İnvestisiialar zaŋ üstemdıgı qamtamasyz etılgen, kelısımşarttary saqtalatyn, bılımdı memlekettık qyzmetşıler jūmys ısteitın elge ǧana keledı. Al qazırgı jaǧdaidaǧy bäsekege qabılettılık – sifrlandyrudy damytu, – dedı Qazaqstan Prezidentı.
Sonymen qatar, Nūrsūltan Nazarbaev sybailas jemqorlyqtyŋ aldyn alu jäne oǧan qarsy küres jürgızu ısınde sifrlandyrudyŋ tiımdı ekenın aitty.
Memleket basşysy agroönerkäsıp keşenın damytu, önımdılıktıŋ ösımın qamtamasyz etu jäne auyl şaruaşylyǧy eksportyn arttyru mäselelerıne toqtaldy.
Jiyn soŋynda Qazaqstan Prezidentı jaŋa jobalardy tiımdı jüzege asyrudyŋ jäne Ükımet pen «Nūr Otan» partiiasynyŋ aldyna qoiylǧan mındetterdıŋ maŋyzdylyǧy jönınde aitty.
Keŋeitılgen otyrys barysynda Astana qalasynyŋ äkımı Äset İsekeşev elordanyŋ äleumettık infraqūrylymynyŋ damuy, jaŋa jūmys oryndaryn aşu, halyqqa körsetıletın qyzmet türlerın sifrlandyru jaily josparyn tanystyrdy. «Josparlardyŋ barlyǧy oryndalyp jatsa, menıŋşe, būl basqalar üşın de ülgı bolady. Senı bükıl Qazaqstan tyŋdady. Menıŋ oiymşa, barlyǧy senen ülgı alatyn bolady» dedı Nūrsūltan Nazarbaev elorda äkımıne.
ELGE ÜNDEU JOLDADY
Memleket basşysy Nūrsūltan Nazarbaev 31 mamyr – Saiasi quǧyn-sürgın qūrbandaryn eske alu künıne orai qazaqstandyqtarǧa ündeu joldady. Prezident öz sözınde HH ǧasyrda halqymyzdyŋ basynan ötken qasırettı oqiǧalardyŋ tüp-tamyry men sebepterı nede ekenın tereŋ tüsınuımız kerektıgın atap aitty.
«1917 jyly bolǧan Qazan saiasi revoliusiiasy men odan keiıngı Azamat soǧysy, dästürlı ömır saltynyŋ küireuı, sondai-aq Keŋes bilıgı jürgızgen auyl şaruaşylyǧyn jedel ūjymdastyru nauqany jäne oǧan ılese kelgen jappai aşarşylyq pen zorlyq-zombylyq eldıŋ evoliusiialyq damuyn kürt üzdı. Sonyŋ saldarynan halqymyz bükıl älem tarihynda sirek bolatyn alapat demografiialyq şyǧynǧa ūşyrady. 1929-1933 jyldary 2 millionǧa juyq adam qaza bolyp, taǧy milliondai adam jan sauǧalap, elden bosyp kettı. Odan keiıngı saiasi repressiia qazaq qoǧamynyŋ elitasyn jappai qyrǧynǧa ūşyratty. Saiasi sebeppen 103 myŋ adam sottalyp, onyŋ 25 myŋy atu jazasyna kesıldı. Qazaqstan aumaǧynda 11 jazalau lagerı qūrylyp, onda sottalǧandar men olardyŋ otbasylary adam tözgısız qiyn jaǧdaida kün keştı» dedı Elbasy.
Nūrsūltan Nazarbaev quǧyn-sürgınnıŋ zobalaŋyn qazaqtar ǧana emes, Qazaqstanǧa erıksız, küşpen jer audarylyp kelgen 1,5 million özge etnos ökılderı de körgenıne toqtaldy. «Qazaq halqynyŋ janaşyrlyǧy men kömegınıŋ arqasynda olar jan saqtap, aman qaldy. Mūnyŋ bärı – «kommunizmnıŋ jarqyn bolaşaǧy» atty jalaŋ ūranmen jasalǧan qasırettı täjıribenıŋ saldary. Evoliusiialyq damudyŋ ornyn revoliusiia basqanda, osylai bolady. Elımızdıŋ är qiyrynda boi köterıp jatqan «Qazaq halqyna myŋ alǧys» monumentterı – qazaq jerınen pana tapqan san türlı halyqtardyŋ şynaiy rizaşylyq köŋılınıŋ körınısı» dep mälımdedı Memleket basşysy.
