Keşe 1 mausym – Halyqaralyq balalardy qorǧau künı Astanada airyqşa merekelendı. Balalar qalada emın-erkın jürıp, qydyruy üşın Astana äkımdıgı būl künı oquşylarǧa qoǧamdyq kölıkterde tegın jüru mümkındıgın jasady.
Biyl Astananyŋ 20 jyldyq mereitoiy atalyp ötpek. Jiyrma jylda elordanyŋ qanşalyq güldenıp, qalai körkeigenın körıp, sezınsın degen maqsatta Astana qalasynyŋ tūrǧyndary men qonaqtary üşın arnaiy «Red Bus» ekı qabatty ekskursiialyq avtobusy daiyndalypty. 1 mausymnan bastap osy avtobuspen kez kelgen adam qalada tegın saiahattai alady. «MEGA Silk Way» jäne «AiLand» (okeanarium) oiyn-sauyq ortalyǧynan bastap qalanyŋ barlyq körıktı jerlerıne alyp baratyn avtobus üş kün boiy qyzmet etpek.
Halyqaralyq balalardy qorǧau künıne orai ūiymdastyrylǧan tosynsyi mūnymen bıtken joq. «Senıŋ jaŋa qyryŋ» respublikalyq chellendjın qoldau maqsatynda QR Tūŋǧyş Prezidentı qorynyŋ futbol komandasynyŋ oiynşylary balalar üiınıŋ tärbielenuşılerıne arnalǧan futbol boiynşa jattyǧular men şeberlık sabaqtaryn ötkızdı.
Balalar merekesınıŋ köŋıldı ötuıne jekelegen ūiymdar da atsalysty. Mäselen, «Aiala» qaiyrymdylyq qory Q.Mūŋaitpasov atyndaǧy olimpiadalyq rezervtık sport mektep-internatynyŋ 54 oquşysyn teplohodpen Esıl özenınde jäne Astananyŋ körıktı jerlerınde qydyrtyp, arnaiy jaiylǧan dastarqannan tamaqtandyrdy.
Sol sekıldı būl künı «Nūr Älem» – «Bolaşaq energiiasy» mūrajaiy 17 jasqa deiıngı balalar üşın şara jariialap, olardyŋ mūrajaiǧa tegın kıruıne jol aşty.
Qaladaǧy saiabaqtar men alaŋdar da balalardyŋ mereke ordasyna ainaldy. Mäselen, «Ǧaşyqtar» saiabaǧynda taŋǧy 10.30-dan bastap büldırşınderge arnalǧan oiyn-sauyq baǧdarlamalary qoiylyp, balalarǧa tegın balmūzdaq, şyryndar ūsynyldy. Ūiymdastyruşylardyŋ aituynşa, būl künı balalarǧa 4000 balmūzdaq pen 3000 tättı şyryn ülestırılgen.
