Elordada halyqaralyq «Jan şuaq» syilyǧy tabystaldy. «Nur Otan» partiiasynyŋ «Kedergısız keleşek» jobasy aiasynda ötken şarada arnaiy körme ūiymdastyryldy. Onda mädeniet, sport, bılım men käsıpkerlık salasynda jetıstıkke jetken jandar 7 atalym boiynşa marapattaldy. Maqsat – äleumettık kedergılerdı joiu men erekşe qajettılıgı bar adamdardyŋ problemasyna qoǧamnyŋ nazaryn audaru.
Atalǧan syilyq jyl saiyn qoǧamdyq jūmystarǧa belsene aralasqan mümkındıgı şekteulı jandarǧa jäne erekşe qajettılıkterı bar adamdardyŋ ömır süru sapasyn jaqsartuǧa üles qosqan azamattarǧa berıledı.
Nur Otan partiiasy Töraǧasynyŋ bırınşı orynbasary Bauyrjan Baibek atap ötkendei, erekşe qajettılıkterı bar adamdarǧa qoldau körsetu – ärqaşan bileuşı partiia jūmysyndaǧy basymdyqtardyŋ bırı. Bügınde elımızde erekşe qajettılıkterı bar 700 myŋnan astam azamat tūrady, onyŋ 14%-y – 18 jasqa deiıngı balalar.
«Elbasy, partiia Liderı Nūrsūltan Nazarbaevtyŋ tapsyrmasy boiynşa osy baǧyttaǧy jūmysty jüieleu maqsatynda bız 2014 jyly «Kedergısız keleşek» partiialyq jobasyn ıske qostyq. Jobanyŋ arqasynda erekşe qajettılıkterı bar 40 myŋǧa juyq azamat jūmysqa ornalastyryldy, 24 myŋnan astam äleumettık nysanynda erekşe qajettılıgı bar adamdar üşın beiımdeu jūmystary jürgızılıp, zaŋnamaǧa özgerıster engızıldı, «Bolaşaq» qorynyŋ qoldauymen 43 inkliuzivtı bılım beru kabinetı aşyldy. Nūrsūltan Nazarbaev Qory qomaqty jūmys atqaruda. Memleket basşysy Qasym-Jomart Toqaev partiianyŋ sailaualdy baǧdarlamasy aiasynda taǧy 22 myŋ äleumettık infraqūrylym nysanyn beiımdeu, erekşe qajettılıkterı bar adamdardy jūmysqa ornalastyru baǧytyndaǧy ısterdı jalǧastyratyn bolady» dedı Bauyrjan Baibek.
Nur Otan «Barlyq balaǧa – bırdei mümkındık» qaǧidasyn jüzege asyra otyryp, elımızdegı barlyq kolledjder men joǧary oqu oryndarynda, sondai-aq mektepter men mektepke deiıngı ūiymdardyŋ 70%-ynda inkliuzivtı bılım berudı engızudı qamtamasyz etpek. Oŋaltu ortalyqtarynyŋ sany ūlǧaitylyp, erekşe qajettılıkterı bar balalardy psihologiialyq-pedagogikalyq jäne korreksiialyq qoldau boiynşa memlekettık tapsyrys engızıledı. Asyrauşysynan aiyrylǧan balalar bır mezgılde mügedektıgıne jäne asyrauşysynan airyluyna bailanysty 2 järdemaqy alatyn bolady.
Öz kezegınde Qazaqstan mügedekter konfederasiiasynyŋ prezidentı Janat Omarbekova «Jan şuaqty» tapsyru räsımı 2008 jyldan berı ötkızılıp kele jatqanyn jäne osy jyldar ışınde syilyqqa 70-ten astam adam ie bolǧanyn atap öttı. Biyl 17 öŋırden 58 adam ūsynylyp, olardyŋ ışınen aşyq dauys beru nätijesınde ūiymdastyru komissiianyŋ şeşımımen 7 üzdık nominant anyqtaldy.
Sonymen «Myqty erık-jıgerı jäne jeŋıske degen ūmtylysy üşın» nominasiiasy boiynşa alpinist, halyqaralyq därejedegı sport şeberı Mariia Äuezova marapattaldy. Biyl ol Everest bazalyq lagerınde 5364 m jäne Kala Pathar tauynda 5640 m biıktıktı baǧyndyrdy.
«Erekşe qajettılıkterı bar adamdarǧa qatysty qoǧamdyq sananyŋ oŋ özgerısterıne qosqan ülesı üşın» syilyǧynyŋ iegerı qoǧam qairatkerı Niiaz Sündetäliev boldy.
«Erekşe qajettılıkterı bar adamdardyŋ problemalary men ömırın aqparattyq qamtuǧa qosqan ülesı üşın» nominasiiasy boiynşa syilyqty tanymal bloger Almas Erjan aldy. «Erıktıler qozǧalysyn damytudaǧy jetıstıkterı üşın» müsınşenıŋ iegerı qoǧam qairatkerı Gülnaz Qosmurzieva boldy. Ol pandemiia kezınde qarajat jinaudy ūiymdastyryp, 2 myŋnan astam mūqtaj janǧa kömek körsettı.
«Käsıpkerlık belsendılıktı damytuǧa qosqan ülesı üşın» nominasiiasy boiynşa syilyqty erekşe qajettılıgı bar balanyŋ anasy Gülmira Parmyşeva ielendı. Ol erekşe balalarǧa arnalǧan damytu oiynşyqtaryn şyǧaratyn Kıshkentai jobasyn ıske qosqan. «Öner jäne mädeniet salasyndaǧy üzdık jetıstıkterı üşın» syilyǧynyŋ iegerlerı bolyp «Bız sızderdı jaqsy köremız!» halyqtyq kloundar teatry tanyldy. Teatr truppasy estu qabıletı būzylǧan ärtısterden tūrady. «Sport salasyndaǧy üzdık jetıstıkterı üşın» atalymynda pauerlifting boiynşa sportşy, 2016 jylǧy Rio-de-Janeiroda ötken jazǧy Paralimpiada oiyndarynyŋ kümıs jüldegerı Rauşan Qoişybaeva marapattaldy.
Resmi derek boiynşa elımızde mügedektıgı bar 700-den astam adam ömır süredı, olardyŋ 25 paiyzǧa juyǧy jūmyspen qamtylǧan. Al 2025 jylǧa qarai būl körsetkıştı 30 paiyzǧa jetkızu josparda bar.
