Biyl Astanada jaŋa temırjol vokzaly keşenı jūmysyn bastaidy. Osyǧan orai «Astana» konsert zalynda bos jūmys oryndary järmeŋkesı öttı. Şara barysynda «Qazaqstan temır joly» ŪK» AQ jäne elordalyq Halyqty jūmyspen qamtu ortalyǧy arasynda yntymaqtastyq turaly kelısımge qol qoiyldy.
Qos taraptyŋ resmi türde kelısımge qol qoiu räsımıne «Astana» jaŋa temırjol vokzaly keşenınıŋ direktory Dınmūhamed Qūsaiynov, qalalyq Jūmyspen qamtu, eŋbek jäne äleumettık qorǧau basqarmasynyŋ basşysy Ermek Ospanov jäne Halyqty jūmyspen qamtu ortalyǧynyŋ direktory Oljas Omarov qatysty.
– Jaŋa temırjol vokzaly 1 mausymda tolyqqandy paidalanuǧa berıledı. Sol uaqyttan bastap Qazaqstannyŋ barlyq aimaqtaryna baǧyttar aşylady. Täulıgıne 56 poiyz qatynaidy. Bügın bız qyzmetkerler jinau maqsatynda elorda äkımdıgınıŋ Halyqty jūmyspen qamtu basqarmasymen bırlesıp, bos jūmys oryndar järmeŋkesın ötkızıp jatyrmyz. Alty qabattan tūratyn «Astana» temırjol vokzaly keşenınıŋ būl filialynda ştattar sany 217 adamdy qūraidy. Al negızgı qūramda 190 adam jūmys ısteidı. Kadrlardy ırıktegende vokzal jäne perron kezekşılerı, anyqtamalyq-aqparattyq bölımnıŋ qyzmetkerlerı, diktorlar sekıldı mamandarǧa basymdyq berıledı. Qyzmetkerlerdıŋ aǧylşyn tılın bılgenı de maŋyzdy. Bızdıŋ jūmysymyz – jolauşylardy kütıp alyp-şyǧaryp salu, jaily jaǧdai jasau. Jaŋa vokzal «EKSPO» körmesıne bastaityn Astananyŋ qaqpasy bolmaq, – dedı Dınmūhamed Qūsaiynov.
Al Halyqty jūmyspen qamtu ortalyǧynyŋ direktory Oljas Omardyŋ aituynşa, būl ötkızılıp jatqan järmeŋke – biylǧy üşınşı şara. Jyldyŋ aiaǧyna deiın taǧy alty järmeŋke ūiymdastyru josparlanǧan.
– Bız «Astana» jaŋa temırjol vokzal keşenımen yntymaqtastyq turaly kelısımge qol qoidyq. Būl bastama bıraz jūrtty jūmyspen qamtuǧa, mamandardy qaita daiarlauǧa septıgın tigızedı. Tek jaŋa vokzaldyŋ özı 200-ge juyq jūmys ūsynyp otyr. Būǧan qosa, järmeŋkege taǧy 60-qa juyq jūmys beruşı ūiymdar qatysyp jatyr. Olar 1000-ǧa tarta maman ızdeidı. Jūmyspen qamtu ortalyǧyna jyl basynan berı 3 701 adam jügındı. Olardyŋ jartysy jūmysqa ornalastyryldy, – dedı ol.
Būrynǧy «Kongress-holl» ǧimaratyna ekı qolǧa bır kürek ızdep kelgen jūrttyŋ qarasy qalyŋ boldy. Olardyŋ ışınde temırjol salasynda talai jyl eŋbek etkender de bar. Solardyŋ bırı – Berık Äbiev. Ol bailanysşy bolyp 20 jyldan astam uaqyt jūmys ısteptı. Bügınde jūmystan qysqartylyp qalǧan eken. Endıgı ümıtı osy vokzal ekenın jasyrmady. Oǧan, ärine, mol täjıribesı yqpal etetınıne senımdı.
Jūmys ızdep būl järmeŋkege arnaiy kelgenderdıŋ arasynda oquyn endı bıtırgen tülekter de bar eken.
– Men osy Astanadaǧy Kölık jäne kommunikasiia kolledjın tämamdaǧanmyn. Mamandyǧym – jolauşylar tasymalyn ūiymdastyru. Diplom boiynşa älı eş jerde jūmys ıstep körgen joqpyn. Jaŋa vokzal öz salamda eŋbek jolyn bastauyma jaqsy mümkındık bolyp tūr. Jūmys beruşılerdıŋ üdesınen şyǧamyn dep ümıttenemın, – dedı Abylaihan Äbdıuaqatov esımdı qalanyŋ jas tūrǧyny.
Köp ūzamai ıske qosylatyn jaŋa temırjol vokzalyna jūmysşylar tartu osylaişa qarqyndy jürgızılıp jatyr. Irıktelgen mamandar jūmysqa kırıspesten būryn jaŋa orynǧa üirenısuı üşın säuır aiynan bastap aldyn ala oqytu şaralary ūiymdastyrylady.
Orynbek ÖTEMŪRAT,
«Astana aqşamy»
