Jaqsy künderdegı jūma namazynan keiın «Nūr-Astana» meşıtınen aǧylyp ötetın jamaǧat bırde bolmasa bırde «Ziiandy qūmarlyq dükenı» qasynan ötıp bara jatyp şamdanyp qaluy äbden mümkın-au. Būl ne eken dep dükenge kırgenderı de bar bolar. Mūnyŋ qaladaǧy köp dükenderden aiyrmaşylyǧy sol, atyna zaty sai ziiandy qūmarlyqty äsıre nasihattap, şımırıkpei satatyndyǧynda. Ol ne «qūmarlyq» dersız. Būl – adamnyŋ boiyndaǧy jaman ädet, der kezınde toqtau bolmasa auyr ındet. Iаǧni ışımdıkke salynu, araqqūmarlyqty jai «qūmarlyqqa» balap juasytyp, menmūndalap şaqyryp tūr. Tıptı «qūmarlyqtyŋ» saldarynan basyŋyz auyryp meŋ-zeŋ bolyp tūrsa, osy dükennen bır qyrly stakanmen araq satyp alyp, tük bolmaǧandai ärı qarai jūmysyŋyzben jüre beresız. Qor-qor şegıp te körgıŋız kelse, marhabat! Şylym turaly endı ne deiın?! Jaman ädettıŋ asqynuyna müddelı iesı azannyŋ dauysy dükenınıŋ ışın jaŋǧyrtyp tūrsa da tiynyn sanap älek. Sol tiyn üşın dabyraityp, maŋdaişasyna «AlcoBrand’s» dep jazyp, «Ziiandy qūmarlyq dükenı» dep anyqtap şegelep qoiypty.
Bır dükenge nesıne sonşalyqty ılınıp otyr deisız ǧoi. Işımdık qaida satylmaidy dersız. Alaida halqynyŋ 70 paiyzy mūsylman sanalatyn, tūs-tūstan meşıt aşyp jamaǧatyn jiyp otyrǧan elordada alkogoldı ışımdıkter dükenderınıŋ ielerı osylaişa atauyn dabyratyp qoiyp nasihattauy qanşalyqty dūrys? Bız söz etıp otyrǧan «AlcoBrand’s» dükenınıŋ myna jazuy etikalyq normaǧa sai ma? Jalpy, kışıgırım düken, meiramhanalardyŋ atauyna kelgende qazaqy sanaǧa ersı emes, qala sänın ketırmeitın, qalaǧa qonaqqa kelgenderdıŋ riza bolyp, önege alatyndai etıp qoiu kerektıgın tügendeitın talaptar qarastyrylǧan negızdeme bar ma?
Aitatyny joq, käsıpker aşqan dükenınıŋ atyn «ataŋnyŋ basy» dep atasa da, qala tūrǧyndarynyŋ müddesın qorǧaityn basqarmanyŋ naqty eşqandai şara qoldana almaitynyn bılemız. Tıl tüzeitın mekemenıŋ qyzmetkerlerı qajet dese ūsynys aitudan ärı asa almaidy. Käsıpkerdıŋ kemşılıgın aityp «mazasyn» jiı alsa, olardyŋ prokuraturaǧa aryzdanuyna mümkındık berıp qoiǧan.
Jergılıktı mäslihat osy mäselege män berıp, kelelı şeşım şyǧarsa, aspandap ketken astanalyq käsıpker qiialyna erık bermei, käsıbın bastar aldynda äreketımız aldymen ūlttyq sanamyzǧa, qūndylyqtarymyzǧa qiǧaş kelıp tūrǧan joq pa dep oilanar ma edı…
