Qazaqstan Respublikasynyŋ Tūŋǧyş Prezidentı – Elbasy kıtaphanasy ūly Abaidyŋ tuǧan künın eleusız qaldyrmady. Jastardyŋ oqu mädenietın, ädebi talǧamyn qalyptastyru maqsatynda äleumettık jelılerde «II Abai oqulary» jyl saiynǧy ädebi saiys jariialanǧan bolatyn. Būl mädeni oşaqta atalmyş baiqau jeŋımpazdaryn marapattau räsımı öttı.
– «Abai sözı – qazaqtyŋ boitūmary, Abai mūrasy – halyqtyŋ eŋ qasiettı qazynasy» dep Elbasymyz aitqandai, qazaq halqy Abaidy özınıŋ ruhani ūstazy, ūlttyq jaŋǧyruymyzdyŋ qainar közı dep qabyldaidy. Ūly aqyn eŋbekterınıŋ uaqyt ötken saiyn özektılıgı artyp, qoǧamdyq, ruhani ärı mädeni ömırdegı baǧyty aiqyndala tüsude. Bügıngı künı elımızdıŋ eldıgın ūly Abaidyŋ asyl sözderınsız elestetu mümkın emes, – dedı saltanatty räsımdı aşqan Elbasy kıtaphanasy direktorynyŋ orynbasary Ämırhan Rahymjanov.
Qazaq ruhaniiatyna ölşeusız eŋbek sıŋırgen ǧalym Aqseleu Seidımbek kezınde «qazaqtardy Abaidy oqyǧandar jäne oqymaǧandar dep ekı topqa bölemın» degen bolatyn. Osyny eske alǧan belgılı qoǧam qairatkerı Orazgül Asanǧazy adamnyŋ eŋ asyl qasietterın jyrlaǧan ūly oişyldyŋ bai şyǧarmaşylyq mūrasy qazaq elın mäŋgılık ruhtandyratynyn aityp öttı.
Būl jolǧy «Abai oqulary» saiysyna Astana, Almaty qalalary, Aqtöbe, Qyzylorda, Almaty, Aqmola, Soltüstık Qazaqstan oblystarynan 70 ötınım kelıp tüstı. Būǧan qosa, feisbuk jäne instagram jelılerınıŋ qoldanuşylary saiysqa aq tılekterı men ızgı lebızderın bıldırıp, qatysuşylar oqyǧan öleŋderdı jelı ışınde taratuǧa atsalysty.
Baiqaudyŋ «Abai mūrasyn älemdık deŋgeide nasihattauşy» atalymynyŋ jeŋımpazy Polşadaǧy Jeşuv aqparattyq tehnologiialar jäne menedjment universitetınıŋ studentı Gülnaz Qalieva Abaidyŋ taǧylymy mol ösietterı eşqaşanda özektılıgın joǧaltpaidy dep esepteidı.
Ädebi saiystyŋ eŋ täjıribelı qatysuşysy Aqmola oblysy Şortandy audany Qaraadyr auylynyŋ 7-synyp oquşysy Arai Arharova boldy. Ol 1-synyptan bastap ädebi saiystarǧa qatysyp qana qoimai, osy jyly audandyq Abai oqularynyŋ «Öleŋ – sözdıŋ patşasy, söz sarasy» atalymynda bırınşı oryndy ielengen. Arai Abaidyŋ 102 öleŋın jatqa oqidy eken. Al baiqaudyŋ eŋ kışkentai qatysuşysy Astana qalasy №5 mektep-gimnaziiasynyŋ 2-synyp oquşysy Aqmonşaq Serıkbai boldy.
Filologiia ǧylymdarynyŋ doktory Serık Negimov, aitysker aqyn, ädebiettanuşy ǧalym Serıkzat Düisenǧazy, ǧylym men mädeniet qairatkerlerı, Astana qalasynyŋ pedagogikalyq qauymdastyǧynyŋ ökılderı qatysqan saiysta qazylar alqasynyŋ şeşımımen M.H.Dulati atyndaǧy Taraz memlekettık universitetınıŋ studentterı Meruert Toqmoldaevaǧa bırınşı jäne Dana Mūhametıldaǧa üşınşı oryndar berıldı. Ekınşı oryn Almatydaǧy №81 mektep-gimnaziiasynyŋ 8-synyp oquşysy Aqtoty Asanovaǧa tidı.
Sondai-aq, «Eŋ kışkentai ümıtker», «Bır äulettıŋ önerpazdary», «Abai mūrasyn älemdık deŋgeide nasihattauşy», «Üş tıldıŋ dänekerı»,
«Eŋ alǧaşqy oqyrman» atalymdarynda top jarǧandar marapattaldy.
