Elordalyq Azamattyq bastamalar ortalyǧynda qalanyŋ ükımettık emes ūiymdarynyŋ ökılderı Memleket basşysynyŋ Qazaqstan halqyna Joldauyn talqylady.
Is-şaraǧa azamattyq qoǧam ökılderı, sondai-aq memlekettık organdardyŋ qyzmetkerlerı qatysty.
Qalalyq Işkı saiasat basqarmasynyŋ basşysy Däuren Babamūratov Prezident Joldauy qoǧamnyŋ maŋyzdy problemalaryn şeşuge baǧyttalǧan ıs-şaralar keşenı ekenın atap öttı.
«Studentterge jyldyq 2-3 paiyzben bılım nesiesın aluǧa mümkındık berıledı. Būryn memleket oqu üşın qarajat böletın. Grantqa tüspegen studentter aqyly oqydy, oquyn aiaqtaǧannan keiın bolaşaq jūmysy esebınen memleket aldyndaǧy qaryzyn töledı. Qazır studentter üşın jaǧdai odan da jaqsy» dedı Däuren Babamūratov.
Onyŋ aituynşa, Prezidenttıŋ bala kütımı boiynşa tölem merzımın 1,5 jasqa deiın arttyru, äielderdıŋ zeinetkerlık jasyn 2028 jylǧa deiın 61 jasqa deiın saqtau jönındegı tapsyrmasy halyq arasynda oŋ şeşımın tapty. Äsırese, biznestı jürgızu üşın 2%-ben nesie berıletını quantady. Būl – astanalyq jastar üşın öte jaqsy demeu.
«Qazır Prezident Joldauyn talqylaǧanda, ony memleket damuynyŋ trendınen körıp otyrmyz. Qazırgı jastar elımızde demografiialyq jaǧdai qarqyn alǧan 2004-2005 jyldary düniege kelgen. Olar jaqyn arada joǧary oqu oryndaryn bıtırıp, eŋbek naryǧyna şyǧady. Prezident Joldauda kelesı jyly jastar üşın 100 myŋ qosymşa jūmys orny paida bolatynyn mälımdedı» dedı Däuren Babamūratov.
«Kameda» qoǧamdyq qorynyŋ basşysy, «Qazaqstannyŋ Azamattyq aliansynyŋ» resmi ökılı Mahabbat Espenova memleketpen bırlesıp qoǧamdyq maŋyzy bar jobalardy ıske asyru jönınde bırer mysal aityp berdı. Atap aitqanda, ol azamattyq bastamalar ortalyǧynyŋ qyzmetın joǧary baǧalady.
«Būl – azamattyq qoǧam instituttary men memlekette bolyp jatqan oqiǧalarǧa bei-jai qaramaityn belsendıler üşın köpsalaly servistık qyzmet. Eger olar qandai da bır problemany şeşudı josparlasa, maqsatymyz – olardy ıske asyruǧa kömektesu. Sonymen qatar, būl – azamattyq qoǧam instituttary men memlekettık organdar arasyndaǧy özara ıs-qimyldy qūru jönındegı dialog alaŋy. Prezident öz Joldauynda bilık pen qoǧam arasyndaǧy tiımdı dialogtyŋ qajettılıgın atap öttı. Būl tūrǧyda qoǧamdyq ūiymdardyŋ rölı arta tüsude» dedı Mahabbat Espenova.
«Qazaqstan äielderı» qauymdastyǧynyŋ prezidentı Gülnar Baiymbetova Prezident joldauy memleketımızdıŋ damuyndaǧy jaŋa kezeŋ ekenın atap öttı.
«Menıŋ oiymşa, azamattyq qoǧam eldıŋ eŋ ötkır jäne şūǧyl problemalaryn şeşuge belsendı aralasuy kerek. Prezident Joldauynda problemalyq tūstardy qamtu auqymdylyǧy erekşe ūnady» dep atap öttı Gülnar Baiymbetova.
