Astana äkımdıgı jaŋa jerasty qoqys konteinerlerın ornalastyru üşın konteiner alaŋyn anyqtady.
Astana qalalyq qorşaǧan ortany qorǧau jäne tabiǧatty paidalanudy retteu basqarmasynyŋ mälımetınşe, üş audanda nebärı jaŋa tiptegı 36 konteiner paida bolady. Qatty tūrmystyq qaldyqtardy jinauǧa arnalǧan syiymdylyǧy tereŋdetılgen jäşıkter Baiqoŋyr (14), Saryarqa (10), Almaty (12) audandaryna ornatylmaq.
«Tūrǧyn üi qūrylysynyŋ tyǧyzdyǧy men jüretın joldardyŋ tarlyǧy, ırı gabarittı arnaiy tehnikanyŋ qoqysty şyǧarar kezdegı qiyndyǧyna bailanysty qalanyŋ üş audanynda tereŋdetılgen konteinerlerdı ornatatyn 12 oryn anyqtaldy. Alǧaşqy bes konteinerdıŋ montaj jūmystary Abylaihan daŋǧyly, 25 jäne Puşkin köşesı, 15 mekenjailarynda aiaqtaldy. Qazır sol uchaskenı abattandyru jürgızılıp jatyr» delıngen resmi habarlamada.
Aita keteiık, jerasty qoqys konteinerınıŋ kölemı – 3,5 tekşe metr. Qatty tūrmystyq qaldyqtardy saqtaityn jäne jerasty jinau tehnologiiasyn Finliandiianyŋ öndırısı äzırlegen. Syiymdylyǧy 3 tekşe metrdı qūraityn bır konteiner 3 qoqys jäşıgın almastyrady dep josparlanuda. Būl auladaǧy alaŋnyŋ kölemın keŋeituge mümkındık berıp, bakteriianyŋ taraluy men kün ysyǧan kezde jaǧymsyz iıstıŋ şyǧuyn azaitady. Sebebı konteinerdıŋ teŋ jartysy jer astynda ornalasady.
Jerasty konteinerlerındegı qatty tūrmystyq qaldyqtardy qoqys tasymaldaityn «Clean city» kompaniiasy jüzege asyrady. Qatty tūrmystyq qaldyqtardy tereŋnen jinau üşın kompaniia arnaiy manipuliator satyp alǧan. Ol kün saiyn jaŋa konteinerlerdegı qoqystardy şyǧarady.
