Aldaǧy mamyr aiynda elordadaǧy memleket menşıgındegı 88 jer telımı bässaudaǧa şyǧarylmaq. Onyŋ jai-japsaryn Astana qalasy jer qatynastary basqarmasy basşysynyŋ orynbasary Nazymbek KENJEBAEVTAN bılgen edık.
– Qatelespesek, elordada jer telımderın bässaudaǧa şyǧaru ısı bırınşı ret qolǧa alynyp otyr. Būǧan ne sebep boldy?
– Aǧymdaǧy jyldyŋ basynda Qazaqstan Respublikasy Jer kodeksınıŋ 48-babyna özgerıster engızıldı. Soǧan säikes memleket menşıgındegı jäne paidalanuǧa berılmegen jer telımderın bastapqy kezeŋde ielıkke beru qūqyǧyn sauda-sattyqqa şyǧaru, sonyŋ ışınde konkurstar, auksiondar ötkızu arqyly jüzege asyrylady. Osy şart jer telımderın jalǧa bastapqy kezeŋde beru ısıne de qoldanylady. Bır atap öter jait, bässauda ony ötkızudıŋ tiıstı erejesı zaŋdy küşıne engennen keiın ǧana ıske asyrylady. Qazırgı taŋda būl ereje belgılengen tärtıpke sai ädılet organdarynda memlekettık tırkeuın kütude.
– Bässaudaǧa şyǧarylatyn jer telımderın qandai maqsatta paidalanuǧa bolady?
– Uäkılettı organdar bässaudaǧa şyǧarylatyn ärtürlı maqsattaǧy jer telımderın anyqtap, solardyŋ qatarynda önerkäsıptık-azamattyq maqsattaǧy, jedel tamaqtanudyŋ uaqytşa nysandaryna, tūrǧyn üi saluǧa jäne şaǧyn jäne orta bizneske arnalǧan jer telımderınıŋ alǧaşqy 88-ınıŋ tızımın daiyndady. Ol jer telımderı Astanany damytudyŋ 2015-2017 jyldarǧa arnalǧan bas josparyna säikes qalanyŋ igeruge jatatyn audandarynda ornalasqan. Jäne olar magistraldyq injenerlık jelılermen qamtamasyz etıluı tiıs.
– Bässaudaǧa şyǧarylatyn jer telımderı qalanyŋ naqty qandai audandarynda ornalasqan? Bastapqy baǧasyn aita alasyz ba?
– Jer telımderı Tūran daŋǧylynda, Telman jäne İlinka tūrǧyn alaptarynda, sondai-aq, kıru magistraldarynyŋ maŋynda jäne elordanyŋ özge jerlerınde ornalasqan. Mäselen, Alaş tas jolyndaǧy audany 0,30 ga jer telımınıŋ nysanaly maqsaty «Jol maŋynda qyzmet körsetu nysany» bolyp sanalady. Ony jobalau men saludyŋ normativtık merzımı – 18,2 ai nemese 1,5 jyl. Jer telımınıŋ memlekettık kadastrlyq baǧalau qūny – 14 034 000 teŋge.
– Bässaudaǧa qatysuǧa müddelı adamdar qandai qūjattar tapsyrulary qajet?
– Bırınşıden, auksionǧa qatysuǧa ötınış jazady. Odan keiın kepıldık jarna tölemı turaly qūjatty, jeke kuälıgın nemese zaŋdy tūlǧalar memlekettık tırkelu turaly kuälıktı, qajet bolǧan jaǧdaida senımhatty tapsyruy qajet. Sonda ol bässaudaǧa qatysuǧa tırkele alady.
Auksionǧa qoiylatyn jer uchaskelerınıŋ sipatamasyn www.saulet.astana.kz/news/17/ aluǧa bolady.
Amanǧali QALJANOV
