Elımızde auyl şaruaşylyǧy maqsatyndaǧy jerdi tiımdı paidalanudy baqylau jūmysy küşeitılıp, jüielı jolǧa tüstı. Būlai dep keşe ötken QR Prezidentı janyndaǧy Ortalyq kommunikasiialar qyzmetınıŋ brifingınde Agrohimiialyq qyzmet boiynşa respublikalyq ǧylymi-ädıstemelık ortalyǧynyŋ basşysy Erbolat Bazyljanov mälımdedı.
Taiauda agrohimiialyq qyzmettıŋ materialdyq-tehnikalyq bazasy nyǧaitylady. Qazırdıŋ özınde atalmyş qyzmettıŋ körsetkışterı köŋıl könşıterlık. Mäselen, agrohimiialyq zertteu kölemı 1,5 mln gektardan 3,5 mln gektarǧa deiın ösken. Sonyŋ ışınde egıstıktegı köŋnıŋ, jeŋıl gidrolizdenetın azottyŋ, jyljymaly fosfor men auyspaly kaliidıŋ körsetkışterı topyraqty agrohimiialyq zertteu nätijesınde anyqtalatyn körınedı. Būl jūmys suarylmaityn jerdegı egıstıkte jetı jylda bır ret jäne suarmaly jerde bes jylda bır ret jürgızıledı.
E.Bazyljanovtyŋ sözınşe, auyl şaruaşylyǧy maqsatyndaǧy jerdı tiımsız paidalanǧandar qataŋ jauapkerşılıkke tartylady. Tıptı, būl üşın jer olardan tartyp alynady. Jalpy, jer ielerı men jerdı paidalanuşylarǧa jerdıŋ qūnarlyǧy men meliorativtık jaǧdaiyn tüsırmeu talaby qoiylady. Būl talap Jer kodeksıne osydan bır jarym jyl būryn özgerıster men tolyqtyrular engızılgende küşeitılgen.
Sondai-aq, agrohimiialyq qyzmet basşysy jerdı jalǧa beru tärtıbın tüsındırıp öttı. Onyŋ sözıne sensek, şeteldıkterge jäne şeteldık kompaniialarǧa jerdı jalǧa beru mäselesın oblys äkımdıkterı şeşedı. Audan äkımderınıŋ būǧan qūqyǧy joq. Al, oblys äkımderı ondai şeşımdı ortalyq organdarmen kelısıp şeşedı jäne jalǧa beru merzımı 25 jyldan aspaidy.
«Eger jerdı paidalanuda zaŋ būzuşylyqtar oryn alsa nemese belgılengen maqsatta paidalanbasa tiıstı şaralar qoldanylady. Būl şaralar şetel azamattaryna da, Qazaqstan azamattaryna da bırdei jüredı. Aldymen eskertu jasalady, odan keiın aiyppūl salynady. Eger būdan keiın de zaŋ būzuşylyqtar tiylmasa, sot arqyly jer memleketke qaitarylady» deidı E.Bazyljanov.
Amanǧali QALJANOV
